ହାଇଦ୍ରାବାଦ: ଭାରତୀୟ ରେଳଓ୍ବେ ବିଭାଗର ଅନଲାଇନ ଟିକେଟ ବୁକିଂ ପ୍ଲାଟଫର୍ମ IRCTC ଓ୍ବେବସାଇଟ ଓ ଆପ ସେବା ଠପ୍ । ଆଜି (ସୋମବାର) ସକାଳ ୧୦ ସୁଦ୍ଧା ଏହି ଅସୁବିଧା ଦେଖିବାକୁ ମିଳିଥିଲା । ଅନଲାଇନ ଟିକେଟ ବୁକିଂ, କ୍ୟାନସେଲନ ହେଉ ବା ତତ୍କାଳ ଟିକେଟ କରିବାରେ ଭାରତୀୟ ରେଳଯାତ୍ରୀମାନଙ୍କୁ ନାହିଁ ନଥିବା ଅସୁବିଧାର ସମ୍ମୁଖୀନ ହେବାକୁ ପଡିଛି । ସର୍ଭର ଡାଉନ ଥିବା ଯୋଗୁ ଏଭଳି ଅସୁବିଧାର ସମ୍ମୁଖୀନ ହୋଇଛନ୍ତି ଯାତ୍ରୀ । ମେଣ୍ଟେନାନ୍ସ କାର୍ଯ୍ୟ ପାଇଁ ଓ୍ବେବସାଇଟରେ ସମସ୍ୟା ଦେଖାଯାଇଥିବା ନେଇ IRCTC ଓ୍ବେବସାଇଟରେ ମେସେଜ କରାଯାଇଥିଲେ ମଧ୍ୟ ଏହାକୁ ନେଇ ଯାତ୍ରୀମାନଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି ।
IRCTC ଓ୍ବେବସାଇଟ୍ ସର୍ଭର ଡାଉନ:
ଓ୍ବେବସାଇଟ ଟ୍ରାକିଂ ଟୁଲ୍ ଡାଉନଡିଟେକ୍ଟର ଡଟ୍ କମ୍ ଅନୁଯାୟୀ, ପାଖାପାଖି ୫୦ ପ୍ରତିଶତ ୟୁଜର୍ସ ଓ୍ବେବସାଇଟ ବ୍ୟବାହର କରିବାରେ ଅସମର୍ଥ ହୋଇଥିବା ବେଳେ ପାଖାପାଖି ୪୦ ପ୍ରତିଶତ ୟୁଜର୍ସ ଆପକୁ ବ୍ୟବହାର କରିବାରେ ଅସୁବିଧାର ସମ୍ମୁଖୀନ ହୋଇଛନ୍ତି ଏବଂ ୧୦ ପ୍ରତିଶତ ଟିକେଟ ବୁକିଂ କରିପାରିନାହାନ୍ତି । ଯାହାକୁ ନେଇ ଯାତ୍ରୀମାନଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି । ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ TATKAL ଓ IRCTC ଟ୍ରେଣ୍ଡ୍ କରୁଥିବାର ଦେଖିବାକୁ ମିଳିଛି । ସାଧାରଣତଃ ରାତି ୧୧ଟା ପରେ ଏଭଳି ମେଣ୍ଟେନାନ୍ସ କାର୍ଯ୍ୟ କରାଯାଉଥିବା ବେଳେ ସକାଳ ସମୟରେ ଏହି ଅସୁବିଧାକୁ ନେଇ ୟୁଜର୍ସମାନେ ଭାରତୀୟ ରେଲଓ୍ବେ ସେବାକୁ ସମାଲୋଚନା କରିଛନ୍ତି ।