ହାଇଦ୍ରାବାଦ:ଆନ୍ଧ୍ରପ୍ରଦେଶ ଓ ତେଲେଙ୍ଗାନାରେ ଲଗାଣ ବର୍ଷା ପରେ ବନ୍ୟା ପରିସ୍ଥିତି । ପ୍ରବଳ ବର୍ଷାରେ ଧସିଲା ପାହାଡ, ଧୋଇ ହୋଇଗଲା ଟ୍ରେନ ଲାଇନ । ତୁହାକୁ ତୁହା ବର୍ଷା ହେବାରୁ ଉବୁଟୁବୁ ଦକ୍ଷିଣ ଭାରତର ଏହି ଦୁଇ ରାଜ୍ୟ । ବର୍ତ୍ତମାନ ବର୍ଷା ଯୋଗୁଁ ଦୁଇ ରାଜ୍ୟରେ 25 ଜଣଙ୍କର ମୃତ୍ୟୁ ହୋଇଛି । ଆଜି ମଧ୍ୟ ଦୁଇ ରାଜ୍ୟରେ ଅନେକ ସ୍ଥାନରେ ପ୍ରବଳ ବର୍ଷା ନେଇ ଭାରତୀୟ ପାଣିପାଗ କେନ୍ଦ୍ର ରେର୍ଡ ଆଲର୍ଟ ଜାରି କରିଛି । ହାଇଦ୍ରାବାଦରେ ସ୍କୁଲ ଓ କଲେଜକୁ ଛୁଟି ଘୋଷଣା କରାଯାଇଛି । ବନ୍ୟା ପରିସ୍ଥିତି ଯୋଗୁଁ ଦୁଇ ରାଜ୍ୟର ଅନେକ ଅଞ୍ଚଳକୁ ଯୋଗାଯୋଗ ବିଚ୍ଛିନ୍ନ ହୋଇଛି ।
ଆଜି 6 ଟ୍ରେନ ବାତିଲ:
ଆନ୍ଧ୍ର-ତେଲେଙ୍ଗାନାରେ ବର୍ଷା ପରିସ୍ଥିତି ଲୋକଙ୍କ ନିଦ ହଜାଇ ଦେଇଛି । ବର୍ଷା ପାଣିରେ ଅନେକ ସ୍ଥାନରେ ଟ୍ରେନ ଲାଇନ ବୁଡ଼ିଯାଇଛି । ଗତକାଲି(ରବିବାର) ପ୍ରାୟ 140 ଟ୍ରେନକୁ ବାତିଲ କରାଯାଇଥିବା ବେଳେ ଏକାଧିକ ଟ୍ରେନର ଗତିପଥ ପରିବର୍ତ୍ତନ କରାଯାଇଥିଲା । ଆଜି ମଧ୍ୟ ସମାନ ପରିସ୍ଥିତି ରହିଥିବାରୁ ସାଉଥ ସେଣ୍ଟ୍ରାଲ ରେଲଓ୍ବେ କିଛି ଟ୍ରେନ ବାତିଲ କରିବା ସହ କିଛି ଟ୍ରେନର ଗତିପଥ ଓ କିଛି ଟ୍ରେନକୁ ଆଂଶିକ ଭାବେ ବାତିଲ କରିଛି । ଆଜି 6 ଟି ଟ୍ରେନକୁ ବାତିଲ କରାଯାଇଥିବା ବେଳେ 2ଟି ଟ୍ରେନକୁ ଆଂଶିକ ଭାବେ ବାତିଲ କରାଯାଇଛି । ସେହିପରି 10ଟି ଟ୍ରେନର ଗତିପଥ ପରିବର୍ତ୍ତନ କରାଯାଇଛି । ବର୍ଷା ଯୋଗୁଁ 17,000 ରୁ ଅଧିକ ବିପନ୍ନଙ୍କୁ 107ଟି ରିଲିଫ୍ କ୍ୟାମ୍ପକୁ ସ୍ଥାନାନ୍ତରିତ କରାଯାଇଛି । ବର୍ଷା ଯୋଗୁଁ 1.1 ଲକ୍ଷ ହେକ୍ଟର ଚାଷ ଜମି ଜଳମଗ୍ନ ହେବା ସହ ବ୍ୟାପକ କ୍ଷୟକ୍ଷତି ହୋଇଛି ।