ହାଇଦ୍ରାବାଦ:ନିକଟ ଅତୀତରେ ଅନେକ ବିବାଦୀୟ ବୟାନ ଦେଇ ଚର୍ଚ୍ଚାରେ ରହିଆସିଛନ୍ତି ପୂର୍ବତନ କଂଗ୍ରେସ ନେତା ସାମ ପିଟ୍ରୋଡା । କେତେବେଳେ ଭାରତୀୟଙ୍କୁ 'ମାଙ୍କଡ଼' କହିଛନ୍ତି ତ ଆଉ କେତେବେଳେ ଭାରତୀୟଙ୍କ ବିଭେଦତାକୁ ନେଇ ସମାଲୋଚନା କରିଛନ୍ତି । ଗତ କିଛି ଦିନ ତଳେ ଏକ ସାକ୍ଷାତକାରରେ ଭାରତୀୟଙ୍କୁ ନେଇ ଦେଇଥିବା ଏକ ବିବାଦୀୟ ବୟାନ ନେଇ ତାଙ୍କୁ କଡ଼ା ସମାଲୋଚନାର ଶିକାର ହେବାକୁ ପଡ଼ିଛି । ସେ ଦେଶର ପୂର୍ବୋତ୍ତର ରାଜ୍ୟବାସୀଙ୍କୁ ଚାଇନିଜ ଓ ଦକ୍ଷିଣ ଭାରତୀୟଙ୍କୁ ଆଫ୍ରିକୀୟ ବୋଲି କହିଛନ୍ତି । ତେବେ ଓଡ଼ିଶାରେ ଜନ୍ମ ନେଇଥିବା ଏହି ବ୍ୟକ୍ତି ଜଣକ କିପରି ପରବର୍ତ୍ତୀ ସମୟରେ ସତ୍ୟନାରାୟଣରୁ ସାମ ପିଟ୍ରୋଡା ପାଲଟିଲେ ଆସନ୍ତୁ ଜାଣିବା ।
ଏହି ବିବାଦୀୟ ବୟାନ ଦେବା ପରେ ସାମ ପିଟ୍ରୋଡାଙ୍କୁ ବିରୋଧୀ ଓ ଦେଶବାସୀଙ୍କ ଆକ୍ରୋଶର ଶିକାର ହେବାକୁ ପଡ଼ିଛି । ଏହାପରେ ସେ ନିଜ ପଦରୁ ଇସ୍ତଫା ଦେଇଛନ୍ତି । ବୁଧବାର ଏକ ଜାତୀୟ ଗଣମାଧ୍ୟମକୁ ଦେଇଥିବା ସାକ୍ଷାତକାରରେ ପିଟ୍ରୋଡା କହିଥିଲେ, "ଭାରତ ଭଳି ବିବିଧତାପୂର୍ଣ୍ଣ ଦେଶକୁ ଆମେ ଯୋଡି ରଖିପାରିବା । ଭାରତର ପୂର୍ବୋତ୍ତର ଲୋକେ ଚାଇନିଜ ଭଳି ଦେଖାଯାନ୍ତି, ପଶ୍ଟିମ ଭାରତ ଲୋକେ ଆରବ ଭଳି ଦେଖାଯାନ୍ତି, ଉତ୍ତରରେ ଲୋକେ ଶ୍ବେତବର୍ଣ୍ଣର ହୋଇଥିବା ବେଳେ ଦକ୍ଷିଣ ଭାରତ ଲୋକେ ଆଫ୍ରିକୀୟ ଭଳି ଦେଖାଯାଆନ୍ତି । ଏଥିରେ କିଛି ଫରକ ପଡେନି । ଆମେ ସମସ୍ତେ ଭାଇ ଭଉଣୀ ।"
ପିଟ୍ରୋଡାଙ୍କ ବାଲ୍ୟ କାଳ:- ଗୁଜୁରାଟୀ ପରିବାରରୁ ଆସୁଥିବା ସାମ ପିଟ୍ରୋଡା 1942 ମସିହାରେ ପଶ୍ଚିମ ଓଡ଼ିଶାର ଟିଟିଲାଗଡ଼ରେ ଜନ୍ମଗ୍ରହଣ କରିଥିଲେ । ତାଙ୍କର 7 ଭାଇ ଭଉଣୀ ଥିବା ବେଳେ ସେ ତୃତୀୟ ସନ୍ତାନ ଥିଲେ । ତାଙ୍କ ପରିବାର ଗାନ୍ଧୀବାଦୀ ଥିଲେ । ମହାତ୍ମା ଗାନ୍ଧୀଙ୍କ ବିଚାରଧାରାରେ ସେ ବେଶ ପ୍ରଭାବିତ ଥିଲେ । ଏହାପରେ ସେ ନିଜ ଭାଇଙ୍କ ସହ ଗୁଜୁରାଟ ଆସିଥିବା ବେଳେ ଏଠାରେ ପ୍ରାଥମିକ ଶିକ୍ଷା ଗ୍ରହଣ କରିଥିଲେ । ଭୌତିକ ବିଜ୍ଞାନରେ ଭଦୋଦରା ସ୍ଥିତ ମହାରାଜା ସୟାଜିରାଓ ବିଶ୍ବବିଦ୍ୟାଳୟ ସେ ସ୍ନାତକୋତ୍ତର ହାସଲ କରିଛନ୍ତି । ଏହାପରେ 1964ରେ ଆମେରିକା ଗସ୍ତ କରି ଇଲେକ୍ଟ୍ରିକାଲ ଇଞ୍ଜିନିୟରିଂରେ ସ୍ନାତକୋତ୍ତର ହାସଲ କରିଥିଲେ ।