पुणे ड्रग्ज प्रकरण; 8 आरोपींना अटक, दोन पोलीस आणि दोन बीट मार्शल निलंबित - Pune Drug Case

Pune Drug Case : पुण्यातील नामांकित हॉटेलमध्ये ड्रग्ज विक्री प्रकरणात मोठी अपडेट समोर आलीय. या प्रकरणातील आठ आरोपींना पुणे पोलिसांनी अटक केलीय. या प्रकरणात दोन पोलीस आणि दोन बीट मार्शल यांना निलंबित करण्यात आलं आहे. या प्रकरणाचा पुणे गुन्हे शाखा पथकाकडून पुढील तपास सुरू आहे.

पुणे Pune Drug Case : शहरात ललित पाटील ड्रग्ज प्रकरण घडलेलं असताना, पुणे शहरात पुन्हा एकदा हॉटेलमध्ये ड्रग्ज विक्री केली जात असल्याचा प्रकार समोर आलाय. शहरातील फर्ग्युसन रोडवर असलेल्या 'एल 3 द लिझर लाउंज' या पबमधील एक व्हिडिओ समोर आलाय. या व्हिडिओत काही तरुण बाथरूममध्ये ड्रग्ज घेताना आढळून आले. या प्रकारात पुणे पोलिसांनी 9 जणांवर गुन्हा दाखल करून 8 आरोपींना अटक केलीय.

आरोपींवर गुन्हा दाखल :पुण्यातील शिवाजी नगर पोलीस स्टेशनमध्ये या प्रकरणी, संतोष विठ्ठल कामठे रा. ४४७/४, रंजनीगंध अपार्टमेंट शिवाजीनगर पुणे, सचिन विठ्ठल कामठे, उत्कर्ष कालीदास देशमाने, योगेंद्र गिरासे, रा. दवन सोसायटी, श्रीराम स्वीट मार्ट भुगाव मुळशी, रवि माहेश्वरी रा. उंड्री पुणे, अक्षय दत्तात्रय कामठे, रा. हडपसर माळवाडी पुणे, दिनेश मानकर, रा. नाना पेठ, रोहन राजू गायकवाड रा. भोसले पार्क हडपसर पुणे याला अटक केली आहे. तर एका आरोपीचा शोध सुरू आहे.

पबमधील एक व्हिडिओ आला समोर : याबाबत अधिक माहिती अशी की, पुणे शहरातील फर्ग्युसन रोडवर असलेल्या 'एल 3 द लिझर लाउंज' या पबमधील एक व्हिडिओ समोर आला. हा व्हिडिओ शनिवारी मध्यरात्रीचा असून या ठिकाणी तरुण बाथरूममध्ये ड्रग्ज घेताना आढळून आले, तर अनेक अल्पवयीन मुलांना दारू दिली जात होती. या प्रकरणात पुणे पोलिसांनी 8 जणांना ताब्यात घेतलं आहे. याप्रकरणी पुणे पोलीस आयुक्त अमितेश कुमार यांनी मोठी कारवाई करत, शिवाजीनगर पोलीस ठाण्याचे पोलीस निरीक्षक (गुन्हे) अनिल माने तसंच ⁠सहाय्यक पोलीस निरिक्षक दिनेश पाटील यांच्यावरही निलंबनाची कारवाई केली आहे.

पोलीस अधिकारी आणि बीट मार्शल निलंबित : आयोजीत केलेल्या पार्टीमध्ये 40-50 लोक होते. त्यांना तपासाला बोलावलं जाणार आहे, अशा प्रकारची पार्टी अजून कुठे झाली आहे का? याचा तपास केला जाणार आहे. या प्रकरणात दोन पोलीस अधिकारी आणि दोन बीट मार्शल यांच्यावर कारवाई करण्यात आलीय. कामात हलगर्जी आणि आपल्या भागात सुरू असलेल्या गोष्टी माहिती नसणं यामुळं ही कारवाई करण्यात आली आहे.

रात्री उशिरापर्यंत कारवाई : याबाबत झोन 1 पोलीस उपायुक्त संदीप सिंग गिल म्हणाले की, रात्री उशिरापर्यंत कारवाई सुरू केली होती. हॉटेल आणि बार सुरू ठेवले म्हणून गुन्हा दाखल करण्यात आला. या प्रकरणात दोन मालक आणि दोन आयोजक आणि इतर अशा एकूण 9 लोकांवर गुन्हे दाखल झाले आहेत. पबमध्ये पार्टीचं आयोजन कसं करण्यात आलं याबाबतचा तपास सुरू आहे. तसंच जो व्हिडिओ व्हायरल झाला आहे त्याचा देखील तपास सुरू आहे. या व्हिडिओमध्ये दिसणाऱ्या लोकांचा देखील तपास सुरू आहे. काही पुरावे मिळाले आहेत त्याआधारे तपास सुरू आहे. तसंच अल्पवयीन कोणी मुलं होती का, याचाही तपास सुरू आहे.

हेही वाचा -