काँग्रेसचे महाराष्ट्राचे प्रभारी रमेश चेन्निथला यांनी राज्यातील मतदानानंतर प्रतिक्रिया दिलीय. ते म्हणाले, "महाविकास आघाडीला महाराष्ट्रात सरकार बनवण्याचा विश्वास आहे. राज्यातील जनता राज्य आणि केंद्रातील सध्याच्या सरकारच्या विरोधात आहे. एक्झिट पोल वास्तविकता दर्शवत नाहीत. लोकांच्या भावना आमच्या सोबत आहेत. भाजपा नेहमीच जातीय आधारावर लोकांचा आधार घेतो. महाविकास आघाडी सरकार स्थापन करेल याचा विश्वास आहे."
"Exit हे Exact नसतात", महाविकास आघाडीचा दावा; सत्ता आमचीच येणार, महायुतीला विश्वास - MAHARASHTRA VOTING LIVE UPDATES
महाराष्ट्र विधानसभा निवडणूक (Source- ETV Bharat)
Published : Nov 20, 2024, 7:46 AM IST
|Updated : Nov 20, 2024, 10:44 PM IST
मुंबई : महाराष्ट्र विधानसभा निवडणुकीसाठी मतदान पार पडलं. राज्यात 288 जागांसाठी निवडणूक झाली. सायंकाळी सहा वाजेपर्यंत सरासरी 60 टक्के मतदान झाल्याची माहिती समोर आली आहे. मतदान प्रक्रिया पार पडल्यावर लगेच एक्झिट पोल जाहीर करण्यात आले. त्यानुसार, राज्यात महायुती सत्ता स्थापन करण्याचा अंदाज विविध एक्झिट पोलमध्ये व्यक्त करण्यात आला आहे.
महायुतीची पुन्हा सत्ता? :महाराष्ट्र विधानसभेत बहुमताचा आकडा हा 145 इतका आहे. जाहीर झालेल्या 'एक्झिट पोल'नुसार, राज्यात पुन्हा एकदा महायुती सत्ता स्थापन करण्याचा अंदाज व्यक्त करण्यात आलाय. आकडेवारीनुसार, महाविकास आघाडीनंही टाईट फाईट दिल्याचंही दिसून येत आहे.
'एक्झिट पोल'वरुन राजकारण तापलं :'एक्झिट पोल'मध्ये महायुतीला जास्त जागा दाखवण्यात आल्या आहेत. त्यामुळं या पोलवरुन राजकीय वातावरण तापलंय. "'एक्झिट पोल' हा 'Exact' पोल नाही. लोकसभा आणि हरियाणा विधानसभा निवडणुकीत आपण 'एक्झिट पोल' आणि निकाल पाहिले आहेत. त्यामुळं महायुतीचेच सरकार येणार," असा दावा शिवसेना नेत्या आणि उमेदवार शायना एनसी यांनी केलाय.
काँग्रेसचा पलटवार : "महाविकास आघाडीला महाराष्ट्रात सरकार बनवण्याचा विश्वास आहे. राज्यातील जनता राज्य आणि केंद्रातील सध्याच्या सरकारच्या विरोधात आहे. 'एक्झिट पोल' वास्तविकता दर्शवत नाहीत. लोकांच्या भावना आमच्या सोबत आहेत. त्यामुळं महाविकास आघाडी सरकार स्थापन करणार," असा विश्वास काँग्रेसचे महाराष्ट्राचे प्रभारी रमेश चेन्निथला यांनी व्यक्त केला. तसंच त्यांनी 'एक्झिट पोल'वरुन महायुती आणि भाजपावर टीका केली.
"मला वाटते की जेव्हा जेव्हा मतदानाची टक्केवारी वाढते तेव्हा त्याचा फायदा भाजपालाच होतो. वाढलेल्या मतदानाच्या टक्केवारीचा फायदा भाजपा-महायुतीला होईल." - देवेंद्र फडणवीस, उपमुख्यमंत्री
"आम्ही काही एक्झिट पोल पाहिले पण ज्या प्रकारे आम्ही जमिनीशी जोडलेलो आहोत आणि आम्ही अनेक ठिकाणी पाहत आहोत. MVA ला स्पष्ट बहुमत मिळत आहे. सर्वेक्षण काहीही असले तरी लोकांनी महायुतीला हटवण्याचा निर्णय घेतला आहे." - अंबादास दानवे, नेते, शिवसेना (उबाठा)
"प्रत्येक एजन्सीच्या एक्झिट पोलमध्ये असे दिसून आले आहे की, महाराष्ट्राने पुन्हा महायुतीच्या बाजूने मतदान केले आहे. जनतेने पुन्हा एकदा मोदींवर विश्वास व्यक्त केला. आम्ही केलेले काम जनतेला दिसत आहे. आम्ही आमच्या सभेतही सांगितले होते की, आम्ही पुढे काय करणार आहोत, त्यामुळेच लोकांनी आमच्यावर विश्वास व्यक्त केला आहे." - मुरलीधर मोहोळ, केंद्रीय राज्यमंत्री
LIVE FEED
महाविकास आघाडी महाराष्ट्रात सरकार बनवणार
पुण्यात मतदानादिवशीच महायुतीच्या नेत्यांच्या विजयाचे बॅनर
पुणे - पुण्यात मतदानादिवशीच अंतिम निकाल लागण्याआधीच शहरात ठिकठिकाणी विजयाचे बॅनर लागलेत. सनी निम्हण यांनी सिद्धार्थ शिरोळे आणि चंद्रकांत पाटील तसंच उपमुख्यमंत्री देवेंद्र फडणवीस यांच्या विजयाचे बॅनर लावले आहेत.
आजचा चाणक्यचा एक्झिट पोल
आजचा चाणक्यच्या एक्झिट पोलनुसार महाराष्ट्रात भाजपा सरकार स्थापन करू शकते. भाजपाच्या नेतृत्वाखालील आघाडीला 47 टक्के मतांसह 152-160 जागा मिळण्याची अपेक्षा आहे. तर काँग्रेस आघाडीच्या एमव्हीएला 130 ते 138 जागा मिळण्याचा अंदाज आहे. इतरांना 6 ते 8 जागा मिळू शकतात. एक्झिट पोलनुसार, MVA ला 42 टक्के आणि इतरांना 11 टक्के मते मिळू शकतात.
कायदा सुव्यतवस्थेस बाधा आणणाऱयांची गय केली जाणार नाही - पालिका आयुक्त व पोलीस आयुक्त यांची तंबी
मुंबई -: निवडणुकीच्या पार्श्वभूमीवर जिल्हा निवडणूक अधिकारी तथा मुंबई महानगरपालिका आयुक्त भूषण गगराणी यांचे समवेत मुंबई पोलीस आयुक्त विवेक फणसळकर यांनी बृहन्मुंबई महानगरपालिका मुख्यालयात वेबकास्टींग नियंत्रण कक्षास भेट देवून मतदान केंद्रातील प्रक्रियेचा आढावा घेतला. मतदान केंद्रांवर मतदारांसाठी निश्चित किमान सुविधा, रांगेमध्ये ठराविक ठिकाणी आसन व्यवस्था, दिव्यांग मतदारांसाठी व्हिलचेअर, मेडिकल किट आदींबाबत भूषण गगराणी यांनी संबंधितांना निर्देश दिले. तर, कायदा - सुव्यववस्थेसस बाधा आणणाऱयांची गय केली जाणार नाही, असे पोलीस आयुक्त विवेक फणसळकर यांनी स्पष्ट केले आहे.
बीड विधानसभा मतदारसंघात अपक्ष उमेदवाराचा मतदान केंद्रावर मृत्यू
बीड : विधानसभा मतदारसंघात अत्यंत धक्कादायक घटना घडली आहे. बीड विधानसभा मतदारसंघातील अपक्ष उमेदवार बाळासाहेब शिंदे यांचा मतदान केंद्रावरच हृदयविकाराच्या तीव्र झटक्याने मृत्यू झाला. बीड शहरातील छत्रपती शाहू विद्यालयात असणाऱ्या मतदान केंद्रावर हा प्रकार समोर आला आहे. त्यांना अचानक चक्कर आल्याने ते खाली पडले. त्यानंतर त्यांचा मृत्यू झाला असल्याची माहिती समोर आली आहे.
विधानसभा निवडणूक २०२४ साठी राज्यात सायंकाळी ५ वाजेपर्यंत ५८.२२ टक्के मतदान
मुंबई : विधानसभा सार्वत्रिक निवडणूक २०२४ साठी आज सकाळी ७ वाजल्यापासून मतदानाला सुरुवात झाली. सायंकाळी ५ वाजेपर्यंत राज्यात सरासरी ५८.२२ टक्के मतदान झालं आहे.
निवडणूक आयोगानं दिलेली राज्यातील जिल्हानिहाय मतदानाची टक्केवारी पुढीलप्रमाणे :
अहमदनगर - ६१.९५टक्के
अकोला - ५६.१६ टक्के
अमरावती -५८.४८ टक्के
औरंगाबाद- ६०.८३ टक्के
बीड - ६०.६२ टक्के
भंडारा- ६५.८८ टक्के
बुलढाणा-६२.८४ टक्के
चंद्रपूर- ६४.४८ टक्के
धुळे - ५९.७५ टक्के
गडचिरोली-६९.६३ टक्के
गोंदिया -६५.०९ टक्के
हिंगोली - ६१.१८ टक्के
जळगाव - ५४.६९ टक्के
जालना- ६४.१७ टक्के
कोल्हापूर- ६७.९७ टक्के
लातूर _ ६१.४३ टक्के
मुंबई शहर- ४९.०७ टक्के
मुंबई उपनगर-५१.७६ टक्के
नागपूर - ५६.०६ टक्के
नांदेड - ५५.८८ टक्के
नंदुरबार- ६३.७२ टक्के
नाशिक -५९.८५ टक्के
उस्मानाबाद- ५८.५९ टक्के
पालघर- ५९.३१ टक्के
परभणी- ६२.७३ टक्के
पुणे - ५४.०९ टक्के
रायगड - ६१.०१ टक्के
रत्नागिरी- ६०.३५ टक्के
सांगली - ६३.२८ टक्के
सातारा - ६४.१६ टक्के
सिंधुदुर्ग - ६२.०६ टक्के
सोलापूर -५७.०९ टक्के
ठाणे - ४९.७६ टक्के
वर्धा - ६३.५० टक्के
वाशिम -५७.४२ टक्के
यवतमाळ - ६१.२२ टक्के
राज्यात 58.22 टक्के मतदान, वरळीत तिरंगी लढत
मुंबई : एकूणच राज्यात कमी टक्के मतदान झाल्याचं दिसून येत आहे. वरळी मतदारसंघातही कमी टक्के मतदान झाल्याचं दिसून येत आहे. येथे तिरंगी लढत होत असून, याचा निकाल आता 23 तारखेला लागणार आहे.
'ईटीव्ही भारत महाराष्ट्र'चे मुख्य संपादक सचिन परब यांनी घेतलेला आढावा (ETV Bharat)
राज्यात पाच वाजेपर्यंत 58.22 टक्के मतदान
मुंबई : राज्यात पाच वाजेपर्यंत 58.22 टक्के मतदान झालं आहे.
बीड जिल्ह्यात काही ठिकाणी थेट मतदान केंद्रावरच हल्ला
बीड - अंबाजोगाई तालुक्यातील घाटनांदूर, चोथेवाडी, मुरंबी, जवळगाव आदी गावांमध्ये लाठ्या काठ्या व दगड हातात घेऊन थेट मतदान केंद्रावरच हल्ला केल्याचं वृत्त आहे. यावेळी बूथ ताब्यात घ्यायला यश न मिळाल्याने व्हीव्हीपॅट मशीनसह मतदान यंत्रांची तोडफोड करण्यात आल्याची माहिती मिळत आहे. याला मंत्रि तसंच उमेदवार धनंजय मुंडे यांनी दुजोरा दिला. तसंच यावर मंत्री धनंजय मुंडे यांनी या गोष्टी करणाऱ्या सर्वच संबंधितांवर तत्काळ कारवाई करण्यात यावी यासाठी तक्रार करणार असल्याचं पत्रकारांना सांगितलं.
उद्योजक मुकेश अंबानी यांनी कुटुंबीयांसह केलं मतदान
मुंबई - मुकेश अंबानी, त्यांची मुले अनंत अंबानी आणि आकाश अंबानी, आकाश यांची पत्नी श्लोका मेहता यांनी बुधवारी मुंबई मतदान केंद्रावर मतदानाचा हक्क बजावला. रिलायन्स इंडस्ट्रीज कुटुंबातील सदस्यांनी दुपारी 3.30 च्या सुमारास मतदान केलं.
उद्धव ठाकरेंचा मतदानानंतर मराठी बाणा...
मुंबई - उध्दव ठाकरे यांनी आज मतदान केल्यानंतर पत्रकारांशी बोलताना सांगितलं की, विरोधकांनी कितीही थापा मारल्या तरी महाराष्ट्राचा बाणा कायम राहणार आहे. सर्व कुटुंबीयांसह मतदान करा आणि महाराष्ट्राचा स्वाभिमान जपा असंही ठाकरे म्हणाले.
राज्यात दुपारी तीन वाजेपर्यंत 45.53 टक्के मतदान
राज्यात दुपारी तीन वाजेपर्यंत 45.53 टक्के मतदान झाले असून, मतदान करण्याच आवाहन सर्वांनीच केलं आहे.
कल्याण पूर्व मतदारसंघातील पाचशे तृतीयपंथीयांनी अचानक मतदानावर टाकला बहिष्कार
कल्याण पूर्व मतदार संघातील राजीव गांधी शाळा या मतदान केंद्रावर शेकडो तृतीयपंथी यांचे मतदार यादीत नावे असून, आज हे सर्व या मतदान केंद्रावर मतदान करण्यासाठी गेले. त्यावेळी त्यांच्या गुरु नीता केनी यांना पायाच्या दुखण्यामुळे चालताना त्रास होत असल्याने त्यांनी रिक्षामधून मतदान केंद्रावर जाण्याचा प्रयत्न केला. मात्र, येथील एका पोलीस कर्मचाऱ्यांनी त्यांची रिक्षा अडवून त्यांना मतदान केंद्रात जाण्यास मज्जाव केला, असा आरोप तृतीयपंथीयांनी केला. या घटनेमुळे त्यांच्यासोबत असलेल्या 500 हून अधिक तृतीयपंथीयांनी जोपर्यंत आमच्या गुरूचा अपमान करणाऱ्या आणि मतदान करण्यापासून रोखणाऱ्या पोलीस अधिकाऱ्यावर निलंबनाची कारवाई होत नाही, तोपर्यंत आम्ही मतदान करणार नाही, असा पवित्रा घेत मतदानावर बहिष्कार टाकला असल्याचं त्यांनी सांगितलं.
मंत्री रामदास आठवले यांनी केलं मतदान
मुंबई - मतदानाची टक्केवारी खूप कमी होत आहे. अलीकडच्या निवडणुकांत शहरी भागातसुद्धा मतदान टक्केवारी कमी राहिली आहे. उलटपक्षी जम्मू काश्मीर आणि गडचिरोली सारख्या दुर्गम भागात मतदान टक्केवारी वाढत आहे. मतदानासाठी सुट्टी दिल्यानंतर हे मतदान वाढत आहे. मतदान टक्केवारी वाढवण्यासाठी मतदान सक्तीचं करणारा कायदा केला पाहिजे असे मत रिपब्लिकन पक्षाचे राष्ट्रीय अध्यक्ष केंद्रीय राज्यमंत्री रामदास आठवले यांनी आज मतदानानंतर व्यक्त केलं.
शिवाजी महाराजांच्या विचारांचा महाराष्ट्र घडवण्यासाठी सर्वांनी मतदान करणं गरजेचं - सुधीर मुनगंटीवार
चंद्रपूर - भाजपाचे नेते सुधीर मुनगंटीवार यांनी आज येथे मतदान केलं. त्यानंतर ते म्हणाले की, छत्रपती शिवाजी महाराजांच्या विचारांचा महाराष्ट्र घडवण्यासाठी सर्वांनी मतदान करणं गरजेचं आहे. हे राष्ट्रीय कर्तव्य आहे, हा लोकशाहीचा सर्वात मोठा उत्सव आहे. हजारोंनी प्राणाची आहुती देऊन हा मंगलकलश आपल्याला अर्पण केला आहे. भारत माता की जय म्हणताना आमच्या हातून या देशाला काय योगदान देऊ शकतो ते दिलं पाहिजे. विकासासाठी, देशाच्या प्रगतीसाठी, देशाच्या गौरवासाठी, जात धर्माच्या पलीकडे जाऊन आम्ही सारे भारतीय आहोत ही भावना ठेवली पाहिजे.
दुपारी १ वाजेपर्यंत राज्यात सरासरी ३२.१८ टक्के मतदान
विधानसभा निवडणुकीत आज सकाळी ७ वाजल्यापासून मतदानाला सुरुवात झाली. दुपारी १ वाजेपर्यंत राज्यात सरासरी ३२.१८ टक्के मतदान झालं आहे. निवडणूक आयोगानं यासंदर्भात आकडेवारी दिली आहे.
राज्यातील जिल्हानिहाय मतदानाची टक्केवारी पुढीलप्रमाणे:
अहमदनगर - ३२.९० टक्के
अकोला - २९.८७ टक्के
अमरावती - ३१.३२ टक्के
औरंगाबाद- ३३.८९ टक्के
बीड - ३२.५८ टक्के
भंडारा- ३५.०६ टक्के
बुलढाणा- ३२.९१ टक्के
चंद्रपूर- ३५.५४ टक्के
धुळे - ३४.०५ टक्के
गडचिरोली-५०.८९ टक्के
गोंदिया - ४०.४६ टक्के
हिंगोली -३५.९७ टक्के
जळगाव - २७.८८ टक्के
जालना- ३६.४२ टक्के
कोल्हापूर- ३८.५६ टक्के
लातूर _ ३३.२७ टक्के
मुंबई शहर- २७.७३ टक्के
मुंबई उपनगर- ३०.४३ टक्के
नागपूर - ३१.६५ टक्के
नांदेड - २८.१५ टक्के
नंदुरबार- ३७.४० टक्के
नाशिक - ३२.३० टक्के
उस्मानाबाद- ३१.७५ टक्के
पालघर-३३.४० टक्के
परभणी-३३.१२टक्के
पुणे - २९.०३ टक्के
रायगड - ३४.८४ टक्के
रत्नागिरी-३८.५२ टक्के
सांगली - ३३.५० टक्के
सातारा -३४.७८ टक्के
सिंधुदुर्ग - ३८.३४ टक्के
सोलापूर - २९.४४
ठाणे -२८.३५ टक्के
वर्धा - ३४.५५ टक्के
वाशिम - २९.३१ टक्के
यवतमाळ -३४.१०
बारामतीत एका मतदानकेंद्राबाहेर गोंधळ
बारामती - येथील एका मतदानकेंद्राबाहेर गोंधळ झाल्याचं दिसून आलं. यावेळी दमदाटी होत असल्याचा आरोप येथील राष्ट्रवादी काँग्रेस शरदचंद्र पवार पक्षाचे उमेदवार युगेंद्र पवार यांच्या आईने केलाय.
अण्णा हजारे यांचं राळेगणसिद्धीमध्ये मतदान
शिर्डी - ज्येष्ठ समाजसेवक अण्णा हजारे यांनी राळेगणसिद्धीमध्ये मतदान केलं. जागरूक मतदार लोकशाहीचा आधार असल्याचं अण्णा हजारे म्हणाले. निवडणुकीत पैशाच्या वापरावर अण्णा हजारे यांनी चिंता व्यक्त केली. निवडणुकीत भ्रष्ट मार्गाचा अवलंब केल्यास लोकशाहीला धोका असल्याचं अण्णा हजारे म्हणाले. आमिषाला बळी न पडता सर्वांनी मतदानाचा अधिकार बजावला पाहिजे असा सल्ला अण्णा हजारे यांनी दिला. तसंच चारित्राशील उमेदवार निवडून द्या असं आवाहन अण्णा हजारे यांनी केलं.
खा. शाहू महाराज छत्रपती यांनी केलं मतदान
कोल्हापूर -खासदार शाहू महाराज छत्रपती यांनी आज मतदान केलं. राज्यात परिवर्तन घडवण्यासाठी चांगलं वातावरण असल्याचं ते मतदानानंतर म्हणाले. जनतेसाठी विद्यमान शासनाचा चांगला उपयोग होणार नाही. काल आपण पाहिला आहे मुंबईमध्ये काय सुरू आहे हे काही बरोबर नाही. कोणत्या पद्धतीने विरोधक काम करत आहे हे कालच्या प्रकरणावरून दिसून आलंय. महाविकास आघाडीला कोल्हापुरात चांगलं यश मिळणार यात काही प्रश्नच नाही असंही ते म्हणाले. राज्यात महाविकास आघाडीचं सरकार येणार आणि तेही स्थिर सरकार येईल असाही दावा त्यांनी केला. ज्या पद्धतीनं मी मतदान करतो त्या पद्धतीनं प्रत्येकानं मतदान करून लोकशाही बळकट करावी असंही ते म्हणाले.
राज्यात सकाळी 11 वाजेपर्यंत 18.14 टक्के मतदानाचे प्रमाण, गडचिरोलीत सर्वाधिक मतदान
राज्यात सकाळी 11 वाजेपर्यंत 18.14 टक्के मतदानाचे प्रमाण राहिले आहे. विशेष म्हणजे दुर्गम भागाचे प्रमाण अधिक असलेल्या गडचिरोलीत सर्वाधिक 30 टक्के मतदान झाले आहे.
नंदुरबार जिल्ह्यात सकाळी - 11 वाजेपर्यंतची मतदान टक्केवारी
01- अक्कलकुवा विधानसभा मतदारसंघ- 19.57 टक्के
02- शहादा विधानसभा मतदारसंघ- 24.98 टक्के
03- नंदुरबार विधानसभा मतदारसंघ- 17.57 टक्के
04- नवापूर विधानसभा मतदारसंघ- 24.58 टक्के
*जिल्ह्यात एकूण 21.60 टक्के मतदान*
उद्धव ठाकरे सहकुटुंब पोहोचले मतदान केंद्रात, थोड्याच वेळात मतदार करणार
शिवसेना (उद्धव ठाकरे) पक्ष प्रमुख, माजी मुख्यमंत्री उद्धव ठाकरे, आदित्य ठाकरे, रश्मी ठाकरे, तेजस ठाकरे हे वांद्रे पूर्व येथील साहित्य सहवास मतदान केंद्रावर पोहोचले आहेत. ते थोड्याच वेळात मतदान करणार आहेत.
वांद्रे पूर्व मतदारसंघात शिवसेनेचे (उबाठा) उमेदवार वरुण सरदेसाई रिंगणात आहेत
पैसे आणि दारू वाटून ते व्होट जिहाद करत आहेत का-नाना पटोले
मुंबई: महाराष्ट्र काँग्रेसचे अध्यक्ष आणि पक्षाचे साकोली येथील उमेदवार नाना पटोले म्हणाले, " काँग्रेसच्या नेतृत्वाखाली महाविकास आघाडीचे सरकार स्थापन होणार आहे. राज्यात काँग्रेसला सर्वाधिक मते मिळणार आहेत. विनोद तावडे काल पैसे वाटताना पकडले गेले. भाजप प्रदेशाध्यक्षांना पत्रे वाटण्याची काय सक्ती होती. पैसे आणि दारू वाटून ते व्होट जिहाद करत आहेत का? "
पुणे जिल्ह्यात सकाळी 9 वाजेपर्यंत 5.53 टक्के मतदान
पुणे जिल्ह्यात सकाळी 9 वाजेपर्यंत 5.53 टक्के मतदान झाले.
नागपूरमध्ये सकाळी 9 वाजेपर्यंत सरासरी 6.86 टक्के मतदान झाले.
मतदानाची टक्केवारी
- हिंगणा - 5.32
- कामठी - 6.71
- काटोल - 5.20
- मध्य - 6.14
- पूर्व - 8.01
- उत्तर - 3.54
- दक्षिण - 8.40
- दक्षिण -पश्चिम - 8.92
- पश्चिम - 7.50
- रामटेक - 6.71
- सावनेर - 7.25
- उमरेड - 8.98
राज्यात जळगाव, नंदुरबारसह गोंदिया जिल्ह्यात मतदानाची टक्केवारी किती?
जळगाव जिल्ह्यातील 11 विधानसभा मतदार संघात सकाळी 7 ते 9 पर्यंतची एकूण अंदाजे सरासरी मतदान टक्केवारी 5.85 टक्के
नंदुरबार जिल्ह्यात एकूण 7.76 टक्के मतदान
1- अक्कलकुवा विधानसभा मतदारसंघ- 6.52 टक्के
2- शहादा विधानसभा मतदारसंघ- 10.18 टक्के
3- नंदुरबार विधानसभा मतदारसंघ- 6.00 टक्के
4- नवापूर विधानसभा मतदारसंघ- 8.30 टक्के
गोंदिया जिल्ह्यातील 4 विधानसभामध्ये आता पर्यंत 8 टक्के मतदान झालेलं आहे.
रितेश देशमुख आणि जेनेलिया डिसोझा यांनी बजाविला मतदानाचा हक्क
अभिनेता रितेश देशमुख आणि त्याची पत्नी, अभिनेत्री जेनेलिया डिझोसा यांनी लातूर येथील मतदान केंद्रावर मतदान केले. रितेश यानं महाविकास आघाडी सरकार स्थापन करेल असा विश्वास व्यक्त केला. तसेच दोन्ही भाऊ ( अमित देशमुख आणि धीरज देशमुख) जिंकणार आहेत, अशा विश्वास व्यक्त केला.
मुंबई शहर जिल्ह्यातील दहा विधानसभा मतदारसंघात सकाळी ९ वाजेपर्यंत अंदाजे ६.२५ टक्के मतदान
मुंबई शहर जिल्ह्यातील दहा विधानसभा मतदारसंघात सकाळी ०९.०० वाजेपर्यंत अंदाजे ०६.२५ टक्के मतदान झाले आहे.
*विधानसभा मतदारसंघ* *मतदानाची टक्केवारी (अंदाजे)*
१७८धारावी - ०४.७१ टक्के
१७९ सायन-कोळीवाडा - ०६.५२ टक्के
१८० वडाळा – ०६.४४ टक्के
१८१ माहिम – ०८.१४ टक्के
१८२ वरळी – ०३.७८ टक्के
१८३ शिवडी – ०६.१२ टक्के
१८४ भायखळा – ०७ .०९ टक्के
१८५ मलबार हिल – ०८.३१ टक्के
१८६ मुंबादेवी - ०६.३४ टक्के
१८७ कुलाबा - ०५.३५ टक्के
"विनोद तावडेंना बरीचशी वर्षे ओळखतो, माहितीशिवाय..."-शरद पवार
राष्ट्रवादीचे अध्यक्ष (शरद पवार) शरद पवार म्हणाले, "महाराष्ट्रात नक्कीच सत्ता परिवर्तन होईल. जो योग्य उमेदवार त्यांनाच मतदान करा." भाजपाचे महामंत्री विनोद तावडे यांनी पैसे वाटप केल्याचे आरोप करण्यात आले. त्यावर शरद पवार म्हणाले, " बरीच वर्षे त्यांना ओळखतो. माहितीशिवाय बोलणं योग्य नाही." सुप्रिया सुळे यांच्यावर कथित बिटकॉईन घोटाळ्यात सहभाग असल्याचा आरोप करण्यात आला. त्यावर शरद पवार म्हणाले, आरोपी हा तुरुंगात राहिलेला आहे. त्यामुळे फारस महत्त्व देण्याची आवश्यकता नाही."
सुप्रिया सुळे यांची भाजपा प्रवक्ते सुधांशू त्रिवेदी यांच्याविरोधात मानहानीची नोटीस
खासदार सुप्रिया सुळे यांनी मतदान केंद्रावर आल्यानंतर कथित क्रिप्टो घोटाळ्याच्या आरोपाबाबत प्रतिक्रिया दिली. खासदार सुळे म्हणाल्या, " खोटे संदेश, व्हाईस नोट्स असल्यानं सायबर क्राईमकडं तक्रार दाखल केली. भाजपा प्रवक्ते सुधांशू त्रिवेदी यांच्याविरोधात फौजदारी मानहानीची नोटीस पाठविली आहे. त्रिवेदी यांच्या प्रत्येक प्रश्नाला उत्तर देण्यास तयार आहे. ते जेव्हा मला कॉल करतील, त्या शहरात, हव्या त्या वृत्तवाहिनीवर येईल. माझ्यावरील सर्व आरोप खोटे आहेत."
निवडणूक आयोगाचा ब्रँड अँबेसिडर सचिन तेंडुलकरनं बजाविला मतदानाचा हक्क
माजी क्रिकेटपटू तथा भारतरत्न सचिन तेंडुलकरनं मुंबईत मतदानाचा हक्क बजाविला. यावेळी संपूर्ण तेंडुलकर कुटुंबीय एकत्र असल्याचं पाहायला मिळालं. तेंडुलकर कुटुंबीयांनी एकत्र मतदान केलं. सचिन तेंडुलकर केंद्रीय निवडणूक आयोगाचा ब्रँड अँबेसिडर आहे. मतदान करण्याचं भारतरत्न तेंडुलकरनं आवाहनं केले.
जालना विधानसभा मतदारसंघाचे उमेदवार अर्जुन खोतकर यांनी कुटुंबासह केले मतदान
जालना विधानसभा मतदारसंघाचे उमेदवार अर्जुन खोतकर यांनी आपल्या कुटुंबासह शहरातील भाग्यनगर येथे संस्कार प्रबोधिनी या शाळेत असलेल्या मतदान केंद्रावर पोहोचले. त्यांनी आपला मतदानाचा हक्क बजावला आहे.
तुम्ही मतदान केले तर तुम्ही प्रश्न विचारू शकता-शिवसेना नेत्या शायना
मुंबई : शिवसेनेच्या नेत्या आणि मुंबादेवी मतदारसंघातील उमेदवार शायना एन.सी. यांनी मतदान हक्क बजाविण्याचे महत्त्व सांगितलं. त्या म्हणाल्या, "मी आमच्या मुंबईतील लोकांना सांगेन, घराबाहेर पडून मतदान करा. तुम्ही मतदान केले तर तुम्ही प्रश्न विचारू शकता. पण तुमच्या हातावर मतदानाच्या खुणा असल्याशिवाय तुम्ही काहीही करू शकत नाही. लोकशाहीच्या या उत्सवात बाहेर पडून आपली नैतिक जबाबदारी पार पाडा."
अभिनेता अक्षय कुमारनं बजाविला मतदानाचा हक्क
अभिनेता अक्षय कुमारने 2024 च्या महाराष्ट्र विधानसभा निवडणुकीत मतदान केले. अक्षय कुमारनं म्हटलं, "मतदान केंद्रावर अत्यंत चांगली व्यवस्था करण्यात आली आहे. स्वच्छता ठेवण्यात आलीय. ज्येष्ठ नागरिकांसाठी अत्यंत चांगली व्यवस्था करण्यात आली आहे."
बारामतीची जनता आम्हाला आशीर्वाद देईल -युगेंद्र पवार
बारामती विधानसभा मतदारसंघातील राष्ट्रवादीचे (एसपी) उमेदवार युगेंद्र पवार म्हणाले," मला 100 टक्के विश्वास आहे, बारामतीची जनता शरद पवारांना विसरणार नाही. आम्हाला आशीर्वाद देईल."
अजित पवारांनी मूळ गावात जाऊन बजाविला मतदानाचा हक्क
महाविकास आघाडीचे काँग्रेसचे उमेदवार संग्राम थोपटे यांनी भोर मतदारसंघात मतदानाचा हक्क बजाविला आहे. बारामती विधानसभा मतदारसंघाचे उमेदवार तथा उपमुख्यमंत्री अजित पवार यांनी मूळ गावी जाऊन मतदान केले.
बृहन्मुंबई महानगरपालिका आयुक्तांनी बजाविला मतदानाचा अधिकार
बृहन्मुंबई महानगरपालिका आयुक्त तथा जिल्हा निवडणूक अधिकारी भूषण गगराणी यांनी मतदानाचा अधिकार बजावला आहे.
माजी राज्यपाल राम नाईक यांनी पहाडी शाळेत बजाविला मतदानाचा हक्क
भाजपचे ज्येष्ठ नेते उत्तर प्रदेशचे माजी राज्यपाल राम नाईक यांनी गोरेगाव पहाडी शाळेत मतदानाचा हक्क बजावला.
Last Updated : Nov 20, 2024, 10:44 PM IST