कोल्हापूरKolhapur Mohabbat Sarbat:सध्या सुरू असलेल्या मार्च महिन्यात सूर्य जसा-जसा माथ्यावर येईल तशी अंगाची लाहीलाही होणारा उष्मा जाणवत आहे. वाढत्या उष्णतेमुळे अनेकजण थंड प्येय पिण्यासाठी शहरातील आइसक्रिम पार्लरमध्ये गर्दी होत आहे. मात्र कोल्हापुरातील व्हीनस कॉर्नर शेजारील एका तरुणानं लावलेल्या हटके बोर्डावर प्रत्येकाची नजर पडत आहे. मोहब्बत, नफरत, बेवफा सरबत हे शब्द वाचून बघणारा काही काळ गोंधळतो आणि आपसुकच या तरुणाच्या गाडीवर थांबतो. सबजा बी, रोज सिरप, दूध, साखरपाक या आरोग्यवर्धक पदार्थांपासून बनवलेलं सरबत उष्म्यापासून काही काळ गारवा मिळवून देतं. शहरात अनेक ठिकाणी थंड सरबत प्यायला मिळतं; परंतु या तरुणानं कल्पकतेनं सरबतांची नावं वापरली आहेत. चला तर मग जाणून घेऊया.
सरबत पिण्यासाठी ग्राहकांची रांग :कोल्हापुरातल्या आदम नदाफ या तरुणाची लॉकडाऊनमध्ये नोकरी गेली. मात्र घरखर्च आणि कमावण्याचं साधन शोधण्यासाठी त्यानं सोशल मीडियाचा आधारानं 'मोहब्बत का सरबत' ही संकल्पना त्याला सुचली. दिल्लीमध्ये 'मोहब्बत का सरबत' बनवतानाचा व्हिडिओ त्यानं सोशल मीडियावर पाहिला होता. आपणही असंच नवं काहीतरी करावं म्हणून त्यानं पहिल्यांदा घरामध्येच प्रयोग केला. घरातील सदस्यांना हे सरबत आवडल्यानंतर यातून पुढं जात मोहब्बत, नफरत आणि बेवफा अशा तीन प्रकारची सरबतं बनवायला त्यानं सुरूवात केली. दूध-कलिंगड-रोज सिरप-साखरेचा पाक यापासून मोहब्बत सरबत, सफरचंद-सब्जा-दूध-रोजसिरप-साखरेचा पाक हे आरोग्यवर्धक पदार्थ वापरून 'नफरत का सरबत' तर मोहब्बत आणि नफरत यांच्या मिश्रणातून 'बेवफा सरबत' करुन विकण्याची सुरुवात आदम यांनं केली. सुरुवातीचं एक वर्ष त्याला कोणताही नफा झाला नाही. मात्र स्वतःच्या सोशल मीडिया अकाउंट वरून त्यानं बनवलेल्या सरबताचे व्हिडिओ हजारो जणांपर्यंत पोहोचवले आणि आता आदमच्या गाड्यावर दुपारी 11 ते 4 या वेळेत कोल्हापूरकरांची अक्षरशः रांग लागलेली असते.