तृतीयपंथीयांसाठी लाडकी बहीण योजना लागू करा; ॲड. यशोमती ठाकूर यांची मागणी - Yashomati Thakur demands

Yashomati Thakur : राज्यात सध्या मुख्यमंत्री माझी लाडकी बहीण या योजनेची चांगलीच चर्चा आहे. यावरुन अनेक राजकीय नेते आपलं मत मांडत आहेत. अशातच आता माजी मंत्री तथा आमदार ॲड. यशोमती ठाकूर यांनी या योजनेबाबत मोठी मागणी केली आहे.

मुंबई Yashomati Thakur : राज्यातील तृतीयपंथीयांचं धोरण अद्याप जाहीर झालं नसून तृतीयपंथीयांनाही माझी लाडकी बहीण या योजनेचा लाभ मिळावा, तसंच राज्यातील उमेद अंतर्गत काम करणाऱ्या महिला कर्मचाऱ्यांच्या वेतनाबाबत तसंच त्यांच्या नोकरी बाबत सरकारनं दखल घेऊन कारवाई करण्याची गरज आहे. तर पंतप्रधान आवास योजनेअंतर्गत ओबीसी घटकांसाठी घरकुल योजना सक्षमपणे राबवण्यात यावी, अशी मागणी माजी मंत्री आमदार ॲड. यशोमती ठाकूर यांनी आज विधानसभेत केली.

काय म्हणाल्या यशोमती ठाकूर : विधानसभेत आज महत्त्वाच्या विषयावर बोलताना आमदार यशोमती ठाकूर यांनी उमेद अंतर्गत काम करणाऱ्या लाखो महिलांच्या वेतनाबाबत आणि त्यांच्या नोकरीच्या सुरक्षिततेबाबत सरकारनं योग्य दखल घेऊन कारवाई करण्याची गरज आहे. या महिला भगिनी गेल्या काही दिवसांपासून आझाद मैदानावर आंदोलनाला बसल्या आहेत. त्यामुळं सरकारनं त्यांची दखल घेऊन त्यांच्या मागण्यांची पूर्तता करावी, असं ठाकूर यांनी यावेळी सांगितलं.

तृतीय पंथीयांनाही माझी लाडकी बहीण लागू करा : राज्यातील महिला धोरण जाहीर झालं असलं, तरी तृतीयपंथीयांसाठी धोरण जाहीर झालं नाही, ते आमदारांपर्यंत पोहोचलेलं नाही. त्यामुळं राज्यातील तृतीय पंथीयांची अवस्था अत्यंत बिकट असून, त्यांची आर्थिक आणि सामाजिक परिस्थिती हलाखीची आहे. तृतीय पंथीयांना एसटी प्रवासात सवलत मिळावी. तसंच त्यांच्यासाठी माझी लाडकी बहीण ही योजना ही लागू करण्यात यावी, अशी मागणी यावेळी आमदार ॲड. ठाकूर यांनी केली.

ओबीसी घरकुल योजना सक्षम करा : पंतप्रधान आवास योजनेअंतर्गत राज्यातील ओबीसी समाजासाठी घरकुलं देण्यात येत आहेत. मात्र, यातील पहिला टप्पा झाला असून पुढील दोन टप्प्यांचं काम होत नाही. त्यामुळं ओबीसी समाजात नाराजी असून या समाजाच्या घरकुलांसाठी सरकारनं ताबडतोब कार्यवाही करावी आणि त्यांना घरकुलं देण्यात यावीत, अशी आग्रही मागणी सुद्धा यावेळी ॲड. यशोमती ठाकूर यांनी केली.

हेही वाचा :