मुंबई Bigg Boss Marathi 5 :'बिग बॉस मराठी 5' हा शो सुरू होऊन 50 दिवसांहून अधिक काळ झाला आहे. आता या घरातून एक-एक स्पर्धक कमी होत आहे. घरातील सदस्यांमध्ये अधिक स्पर्धा पाहायला मिळत आहे. नुकताच या घरातून अरबाज पटेल हा बाहेर पडला, यानंतर निक्की तांबोळी आता आपल्या पद्धतीनं घरात गेम खेळताना दिसत आहे. 'बिग बॉस मराठी'चा पाचवा सीझन सध्या खूप चर्चेत आहे. आता नुकतेच 'बिग बॉस'नं यंदाचा सीझन हा 70 दिवसांमध्ये संपणार असल्याची घोषणा केली आहे. दरम्यान या शोच्या ग्रँड फिनालेसाठी फक्त 2 आठवडे बाकी आहेत.
अंकिता आणि वर्षाताईमध्ये लढत :सध्या घरातील प्रत्येक स्पर्धक आपले स्थान निश्चित करण्यासाठी खूप प्रयत्न करताना दिसत आहेत. 'बिग बॉस'च्या घरात प्रत्येक आठवड्यात एक नवीन टास्क पार पडत असतो. आता यावेळी घरात प्रेक्षकांना नवा खेळ पाहायला मिळणार आहे. आज 25 सप्टेंबरच्या एपिसोडमध्ये घरात लगोरीचा खेळ खेळला जाईल. लगोरीचा खेळ काहीशा हटके पद्धतीनं खेळण्यात येईल. या टास्कसाठी 8 सदस्य दोन गटांमध्ये विभागले जातील. दरम्यान 'बिग बॉस' निर्मात्यांनी इंस्टाग्रामवर एक प्रोमो रिलीज केला आहे. यामध्ये अंकिता वालावलकर आणि वर्षा उसगावकर यांच्यामध्ये लढत पाहायला मिळत आहे. या खेळामध्ये निक्की देखील वर्षाताईला प्रोत्साहित करताना दिसत आहे.