യുവ ഡോക്‌ടർ ഫ്ലാറ്റില്‍ മരിച്ച നിലയിൽ; അമിത അളവിൽ അനസ്തേഷ്യ മരുന്ന് കുത്തിവച്ചതായി സംശയം - young senior resident doctor death

തിരുവനന്തപുരം മെഡിക്കൽ കോളജിലെ സീനിയർ റസിഡൻ്റ് അഭിരാമിയെയാണ് ഫ്ലാറ്റിൽ മരിച്ച നിലയിൽ കണ്ടെത്തിയത്.

തിരുവനന്തപുരം :യുവ ഡോക്‌ടറെ ഫ്ലാറ്റിൽ മരിച്ച നിലയിൽ കണ്ടെത്തി. തിരുവനന്തപുരം മെഡിക്കൽ കോളജിലെ ഡോക്‌ടർ അഭിരാമിയെയാണ് (30) മെഡിക്കൽ കോളജ് പിടി ചാക്കോ നഗറിലെ ഫ്ലാറ്റിൽ മരിച്ച നിലയിൽ കണ്ടെത്തിയത്. ഇവിടെ പേയിങ് ഗസ്‌റ്റായി താമസിക്കുകയായിരുന്നു അഭിരാമി (Young Doctor Of Thiruvananthapuram Medical College Found Dead).

ഇന്നലെ വൈകിട്ട് മുറി തുറക്കാത്തതിനെ തുടർന്ന് സുഹൃത്തുക്കൾ അന്വേഷിച്ചപ്പോഴാണ് അഭിരാമിയെ മരിച്ച നിലയിൽ കണ്ടെത്തിയത്. അമിതമായ അളവിൽ അനസ്തേഷ്യ മരുന്ന് കുത്തിവച്ചതായി സംശയിക്കുന്നു. മെഡിക്കൽ കോളജിലെ സീനിയർ റസിഡൻ്റ് ആണ് അഭിരാമി. വെള്ളനാട് അഭിരാമത്തിൽ ബാലകൃഷ്‌ണൻ നായരുടെയും രമാദേവിയുടെയും മകളാണ് അഭിരാമി.

മരിച്ച അഭിരാമിയും കൊല്ലം രാമൻകുളങ്ങര സ്വദേശി ഡോ. പ്രതീഷുമായുള്ള വിവാഹം ആറ് മാസം മുൻപാണ് നടന്നത്. മൃതദേഹം മെഡിക്കൽ കോളജ് മോർച്ചറിയിൽ സൂക്ഷിച്ചിരിക്കുകയാണ്.

ഹോട്ടൽ മുറിയിൽ ആത്മഹത്യ: മൂന്നാറിൽ യുവതി ഹോട്ടൽ മുറിയിൽ മരിച്ച നിലയിൽ കണ്ടെത്തി. പത്തനംതിട്ട കോന്നി സ്വദേശിയായ ജോതി (30) യേയാണ് മുറിയില്‍ മരിച്ച നിലയിൽ കണ്ടെത്തിയത്. ഭർത്താവിനും കുട്ടിയ്‌ക്കൊപ്പം ഈ മാസം 11ന് മൂന്നാർ സന്ദർശനത്തിന് എത്തിയതായിരുന്നു യുവതി. മുറിയിൽ ഒപ്പമുണ്ടായിരുന്ന ഭർത്താവ് കുളിക്കാൻ ബാത്ത് റൂമിൽ കയറിയ സമയത്തായിരുന്നു ആത്മഹത്യ ചെയ്‌ത നിലയിൽ കണ്ടെത്തിയത്.

കൊച്ചി - ധനുഷ് കോടി ദേശീയപാതയിൽ പഴയ മൂന്നാറിലെ സ്വകാര്യ റിസോർട്ടിലായിരുന്നു സംഭവം നടന്നത്. രാവിലെ മൂന്നാറിലെ വിനോദ സഞ്ചാര കേന്ദ്രങ്ങൾ സന്ദർശിച്ച് ഉച്ചയോടെ മുറിയിൽ മടങ്ങി എത്തിയതിനു ശേഷമായിരുന്നു യുവതിയെ മരിച്ച നിലയിൽ കണ്ടെത്തിയത്. മൂന്നാർ പൊലീസ് സ്ഥലത്തെത്തി മേൽനടപടികൾ സ്വീകരിച്ചിരുന്നു.