ഇടുക്കി: ശക്തമായ മഴയെ തുടര്‍ന്ന് ജലനിരപ്പ് ഉയര്‍ന്നമുല്ലപ്പെരിയാർ അണക്കെട്ടിൽ പരിശോധന നടത്തി സുപ്രീം കോടതി നിയോഗിച്ച അഞ്ചംഗ ഉപസമിതി. കേന്ദ്ര ജല കമ്മിഷൻ എക്‌സിക്യൂട്ടീവ് എഞ്ചിനീയര്‍ സതീഷ് അധ്യക്ഷനായ സമിതിയാണ് പരിശോധന നടത്തിയത്. തമിഴ്‌നാടിൻ്റെ പ്രതിനിധികൾ തേക്കടിയിൽ ബോട്ട് മാർഗം എത്തിയും കേരളത്തിൻ്റെ പ്രതിനിധികൾ വള്ളക്കടവ് വഴി റോഡ് മാർഗവും എത്തിയുമാണ് അണക്കെട്ടിൽ പരിശോധകൾ നടത്തിയത്.
പ്രധാന അണക്കെട്ട്, ബേബി ഡാം, ഗാലറി എന്നിവിടങ്ങളിൽ പരിശോധനകൾ നടത്തി. തുടർന്ന് സ്വീപ്പേജ് ജലത്തിൻ്റെ അളവും രേഖപ്പെടുത്തി. മിനിറ്റിനുള്ളിൽ 78 ലിറ്ററാണ് സ്വീപ്പേജ് ജലത്തിൻ്റെ അളവ്. സ്‌പിൽവേ ഷട്ടറുകളിൽ മൂന്നെണ്ണം ഉയർത്തി ഷട്ടറുകളുടെ കാര്യക്ഷമതയും പരിശോധിച്ചു. പരിശോധനകൾക്ക് ശേഷം കുമളിയിലുള്ള മുല്ലപ്പെരിയാർ ഓഫിസിൽ യോഗം ചേർന്ന് അണക്കെട്ടിലെ നിലവിലെ സ്ഥിതിഗതികൾ വിലയിരുത്തി.