മരണം രണ്ടായി; പാറയില്‍ ചവിട്ടി കാല്‍വഴുതി 30 അടി താഴ്‌ചയിലേക്ക്; നാടിനെ നടുക്കി പീച്ചി ഡാം റിസര്‍വോയര്‍ 'ദുരന്തം'

പീച്ചി ഡാം റിസര്‍വോയറിൽ വീണ രണ്ട് പെണ്‍കുട്ടികള്‍ മരിച്ചു. സുഹൃത്തുക്കളുടെ നില ഗുരുതരം. അപകടത്തില്‍പ്പെട്ടത് ഇന്നലെ.

തൃശൂർ:പീച്ചി ഡാം റിസർവോയറിൽ വീണ പെൺകുട്ടികളിൽ ഒരാൾകൂടി മരിച്ചു. പട്ടിക്കാട് ചാണോത്ത് പാറശ്ശേരി വീട്ടിൽ സജിയുടെയും സെറീനയുടെയും മകൾ ആൻ ഗ്രേസ് (16) ആണ് ചികിത്സയിലിരിക്കെ മരിച്ചത്. തൃശൂർ സെയ്‌ന്‍റ് ക്ലേയേഴ്‌സ് സ്‌കൂളിലെ പ്ലസ് വൺ വിദ്യാർഥിനിയാണ് ആണ് ഗ്രേസ്.

തൃശൂരിലെ സ്വകാര്യ മെഡിക്കൽ കോളജ് ആശുപത്രിയിൽ ചികിത്സയിലിരിക്കെ തിങ്കളാഴ്‌ച ഉച്ചയോടെയായിരുന്നു ആനിന്‍റെ മരണം. ഇതോടെ അപകടത്തിൽ മരിച്ചവരുടെ എണ്ണം രണ്ടായി. അപകടത്തിൽപ്പെട്ട പട്ടിക്കാട് ചുങ്കത്ത് ഷാജന്‍റെയും സിജിയുടെയും മകൾ അലീനാ ഷാജൻ (16) തിങ്കളാഴ്‌ച പുലർച്ചെയോടെ മരിച്ചിരുന്നു. ഇതിനുപിന്നാലെയാണ് ആനിന്‍റെയും മരണം സംഭവിച്ചത്.

നാല് പെൺകുട്ടികളാണ് പീച്ചി ഡാം റിസർവോയറിന്‍റെ തെക്കേക്കുളം ഭാഗത്ത് വെള്ളത്തിൽ വീണത്. വെള്ളത്തിൽ വീണ് പരിക്കേറ്റ മറ്റു രണ്ട് കുട്ടികളുടെയും നില ഗുരുതരമായി തുടരുകയാണ്. തൃശൂർ മെഡിക്കൽ കോളജിൽ നിന്ന് വിദഗ്‌ധ ഡോക്‌ടർമാരെ കൂടി ഉൾപ്പെടുത്തി പ്രത്യേക മെഡിക്കൽ സംഘം രൂപീകരിച്ചാണ് കുട്ടികളുടെ ചികിത്സ തുടരുന്നത്. പട്ടിക്കാട് സ്വദേശികളായ ഐറിന്‍ (16), പീച്ചി സ്വദേശി നിമ(12) എന്നിവരാണ് ചികിത്സയിൽ തുടരുന്നത്. ഇന്നലെ ഉച്ചയ്ക്ക് ശേഷമായിരുന്നു അപകടം.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.

പീച്ചി ഡാമിൻ്റെ റിസർവോയറിൽ കാൽവഴുതി വീണയാളെ രക്ഷിക്കാൻ ശ്രമിച്ചതോടെയാണ് നാലുപേരും വെള്ളത്തിൽ മുങ്ങിത്താഴ്ന്നത്. അപകടത്തിൽപ്പെട്ട പീച്ചി സ്വദേശി നിമയുടെ സഹോദരി ഹിമയുടെ സുഹൃത്തുക്കളാണ് ആൻ ഗ്രേസും ഐറിനും അലീനയും. മൂവരും പീച്ചി പള്ളിയിലെ പെരുന്നാൾ കൂടുന്നതിന് എത്തിയതാണ്.

പാറയില്‍ ചവിട്ടി, കാല്‍വഴുതി 30 അടി താഴ്‌ചയിലേക്ക് : പാറയില്‍ കാല്‍വഴുതിയാണ് രണ്ടു പെണ്‍കുട്ടികള്‍ റിസര്‍വോയറിലേക്ക് വീണത്. ഇവരെ രക്ഷിക്കാനുള്ള ശ്രമത്തിനിടെ മറ്റുരണ്ടു കുട്ടികളും വീണു. കരയില്‍ നിന്നിരുന്ന ഹിമയുടെ നിലവിളി കേട്ടെത്തിയ നാട്ടുകാരാണ് രക്ഷാപ്രവര്‍ത്തനം നടത്തി നാലുപേരെയും പുറത്തെത്തിച്ചത്.

30 അടിയോളം താഴ്‌ചയിലേക്കാണ് കുട്ടികള്‍ വീണത്. കുത്തനെയുള്ള ചെരിവിലൂടെ കുട്ടികളെ തോളില്‍ ചുമന്നാണ് രക്ഷാപ്രവര്‍ത്തകര്‍ ആംബുലന്‍സിന് അടുത്തെത്തിച്ചത്. അതിവേഗം നാലുപേരെയും ആശുപത്രിയില്‍ ആശുപത്രിയിൽ പ്രവേശിപ്പിച്ചെങ്കിലും വെന്‍റിലേറ്ററിലായിരുന്ന അലീനാ പുലർച്ചെയോടെ മരിച്ചു. ചികിത്സയിലുണ്ടായിരുന്ന ആനിന്‍റെയും നില ഗുരുതരമായിരുന്നു. തുടർന്ന് തിങ്കളാഴ്ച ഉച്ചയോടെയാണ് ആൻ മരണത്തിന് കീഴടങ്ങിയത്.