ന്യൂഡൽഹി: നിമിഷ പ്രിയയുടെ വധശിക്ഷ യെമന്‍ പ്രസിഡന്‍റ് ശരിവച്ച സംഭവം സ്ഥിരീകരിച്ച് വിദേശകാര്യ മന്ത്രാലയം. സാധ്യമായ എല്ലാ സഹായവും കേന്ദ്ര സർക്കാർ നൽകുന്നുണ്ടെന്നും മന്ത്രാലയം അറിയിച്ചു. 'നിമിഷ പ്രിയയ്ക്ക് യെമനിൽ വധശിക്ഷ വിധിച്ചത് ഞങ്ങൾ അറിഞ്ഞിട്ടുണ്ട്. പ്രിയയുടെ കുടുംബം പ്രസക്തമായ വഴികൾ അന്വേഷിക്കുകയാണെന്ന് ഞങ്ങൾ മനസ്സിലാക്കുന്നു. സർക്കാർ. ഇക്കാര്യത്തിൽ സാധ്യമായ എല്ലാ സഹായവും നൽകുന്നുണ്ട്'- എംഇഎ ഔദ്യോഗിക വക്താവ് രൺധീർ ജയ്‌സ്വാൾ പറഞ്ഞു.
കഴിഞ്ഞ ദിവസമാണ് മലയാളി നഴ്‌സ് നിമിഷ പ്രിയയുടെ വധശിക്ഷ നടപ്പിലാക്കാൻ യെമൻ പ്രസിഡന്‍റ് അനുമതി നൽകിയത്. ഒരു മാസത്തിനകം വധശിക്ഷ നടപ്പാക്കാനാണ് സാധ്യത. കൊല്ലപ്പെട്ട യെമൻ പൗരൻ തലാൽ അബ്‌ദു മെഹ്ദിയുടെ കുടുംബവുമായും അദ്ദേഹത്തിന്‍റെ ഗോത്ര തലവന്മാരുമായും മാപ്പപേക്ഷക്കുള്ള ചർച്ചകൾക്ക് ശ്രമിച്ചെങ്കിലും ഫലം കണ്ടിരുന്നില്ല. തുടര്‍ന്നാണ് ശിക്ഷ നടപ്പാക്കുന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
തലാല്‍ അബ്‌ദു മെഹ്ദി എന്ന യെമന്‍ പൗരന്‍ കൊല്ലപ്പെട്ട കേസിലാണ് പാലക്കാട് കൊല്ലങ്കോട് സ്വദേശിനി നിമിഷ പ്രിയയെ വധശിക്ഷക്ക് വിധിച്ചത്. 2017 ല്‍ ആണ് കേസിനാസ്‌പദമായ സംഭവം. 2012 ല്‍ ആണ് നിമിഷ പ്രിയ നഴ്‌സായി യെമനില്‍ എത്തിയത്. സനയിലെ ഒരു ക്ലിനിക്കില്‍ നഴ്‌സായിരുന്ന നിമിഷ 2014 ല്‍ തലാല്‍ അബ്‌ദു മഹ്ദിയുമായി പരിചയത്തിലായി. 2015 ല്‍ നിമിഷയും തലാലും ചേർന്ന് അവിടെ ഒരു ക്ലിനിക്ക് ആരംഭിച്ചു. ക്ലിനിക്ക് ലാഭത്തിലായതോടെയാണ് തലാലിന്‍റെ ഉപദ്രവം തുടങ്ങിയത്.
ക്ലിനിക്കിന്‍റെ വരുമാനം നിമിഷ അറിയാതെ തട്ടിയെടുക്കാന്‍ ഇയാള്‍ ശ്രമിച്ചു. തലാല്‍ നിമിഷയെ ശാരീരികമായും ആക്രമിച്ചിരുന്നു. 2017 ജൂലൈയില്‍ ആണ് അമിതമായി മരുന്ന് ഉള്ളില്‍ ചെന്ന് തലാല്‍ മരിക്കുന്നത്. മയക്കുമരുന്ന് കുത്തിവച്ച് നിമിഷ തലാലിനെ കൊലപ്പെടുത്തി എന്നാണ് കേസ്. എന്നാല്‍ കൊല്ലാന്‍ ഉദ്ദേശിച്ചിട്ടില്ലെന്നും തലാലിന്‍റെ കൈവശമുണ്ടായിരുന്ന പാസ്പോര്ട്ട് വീണ്ടെടുക്കുക മാത്രമായിരുന്നു ലക്ഷ്യം എന്നുമാണ് നിമിഷയുടെ വാദം.
പീഡനം സഹിക്കാനാവാതെ നിമിഷ സനയിലെ പൊലീസിൽ പരാതിപ്പെട്ടെങ്കിലും മഹ്ദിക്കെതിരെ നടപടിയെടുക്കുന്നതിന് പകരം പൊലീസ് നിമിഷയെ അറസ്റ്റ് ചെയ്യുകയയായിരുന്നു എന്ന് നിമിഷപ്രിയയുടെ അമ്മ നല്‍കിയ ഹര്‍ജിയില്‍ പറയുന്നു. ആറ് ദിവസം ജയിലിൽ അടച്ചതായും ഹർജിയിൽ പറയുന്നു.
ജയിലിൽ നിന്ന് മടങ്ങിയെത്തിയപ്പോൾ പീഡനത്തിന്‍റെ കാഠിന്യം പലമടങ്ങ് വർധിച്ചു. ക്ലിനിക്കിന് സമീപമുള്ള ജയിൽ വാർഡനാണ് തലാലിനെ മയക്കിക്കിടത്തി പാസ്പോര്ട്ട് കൈക്കലാക്കാന്‍ ഉപദേശിക്കുന്നത്. എന്നാല്‍ മയക്കുമരുന്നിന് അടിമയായിരുന്ന തലാലിന് നിമിഷ പ്രിയ നല്‍കിയ മരുന്ന് ഏറ്റില്ല. തുടര്‍ന്ന് കുറേക്കൂടെ ശക്തമായ മരുന്ന് ഉപയോഗിച്ച് നിമിഷ വീണ്ടും അയാളെ മയക്കാൻ ശ്രമിച്ചു. പക്ഷേ മയക്കുമരുന്ന് അമിതമായി ശരീരത്തില്‍ എത്തിയതിനാല്‍ ഏതാനും മിനിറ്റുകൾക്കുള്ളിൽ തലാല്‍ മരിച്ചു എന്നാണ് അമ്മ സമര്‍പ്പിച്ച ഹര്‍ജിയില്‍ പറയുന്നത്.
Also Read:ശ്രമങ്ങള്‍ വിഫലം; നിമിഷ പ്രിയയുടെ വധശിക്ഷക്ക് യെമൻ പ്രസിഡന്‍റിന്‍റെ അനുമതി, ഒരു മാസത്തിനകം നടപ്പിലാക്കിയേക്കും
