ഭൂമി കയ്യേറ്റം; മാത്യു കുഴല്‍നാടന്‍റെ ചിന്നക്കനാലിലെ ഭൂമി വീണ്ടും അളക്കും, നടപടി അളവില്‍ പിശകെന്ന പരാതിയില്‍ - Mathew Kuzhalnadan Land Issue

മാത്യു കുഴല്‍നാടന്‍ എംഎല്‍എയുടെ ചിന്നക്കനാലിലെ ഭൂമി വീണ്ടും അളക്കാന്‍ റവന്യൂ വകുപ്പ്. ഹെഡ് സർവേയറുടെ നേതൃത്വത്തിൽ അടുത്തയാഴ്‌ച അളവെടുക്കും. നേരത്തെ അളവെടുത്തതില്‍ പിഴവുണ്ടെന്ന ഉടമകളുടെ പരാതിയെ തുടര്‍ന്നാണ് നടപടി.

ഇടുക്കി:മാത്യു കുഴല്‍നാടന്‍ എംഎല്‍എയുടെ ഉടമസ്ഥതയിലുള്ള ചിന്നക്കനാലിലെ റിസോര്‍ട്ട് ഭൂമി റവന്യൂ വകുപ്പ് വീണ്ടും അളക്കും. അടുത്തയാഴ്‌ചയാണ് ഉടമസ്ഥതരുടെ സാന്നിധ്യത്തില്‍ അളവെടുപ്പ് നടക്കുക. നേരത്തെ നടത്തിയ അളവെടുപ്പില്‍ പിശകുണ്ടായെന്ന് ചൂണ്ടിക്കാട്ടി ഉടമകള്‍ നല്‍കിയ പരാതിയെ തുടര്‍ന്നാണ് നടപടി.

ഇടുക്കി ചിന്നക്കനാലിലെ കപ്പിത്താൻ റിസോർട്ടുമായി ബന്ധപ്പെട്ട ഭൂമി കൂടാതെ 50 സെന്‍റോളം സർക്കാർ ഭൂമി അനധികൃതമായി കൈവശം വച്ചെന്ന് ചൂണ്ടിക്കാട്ടി ഇക്കഴിഞ്ഞ ജനുവരി 27നാണ് റവന്യൂ വകുപ്പ് മാത്യു കുഴൽനാടന്‍ എംഎല്‍എക്കെതിരെ കേസെടുത്തത്. തുടർന്ന് ഫെബ്രുവരി 8ന് ലാൻഡ് റവന്യൂ തഹസിൽദാർക്ക് മുന്നിൽ ഹിയറിങ്ങിന് ഹാജരാകണമെന്ന് അറിയിച്ച് നോട്ടിസ് നല്‍കി. എന്നാൽ നോട്ടിസ് പ്രകാരം നേരിട്ട് ഹാജരാകുവാൻ കഴിയില്ലെന്നും അതിനായി ഒരു മാസത്തെ സമയം നീട്ടി നൽകണമെന്നും ആവശ്യപ്പെട്ട് മാത്യു കുഴൽനാടൻ ലാൻഡ് റവന്യൂ തഹസിൽദാർക്ക് അപേക്ഷ സമർപ്പിച്ചു.

ഈ കാലാവധി അവസാനിച്ചതോടെ ഈ മാസം 5ന് മാത്യു കുഴൽനാടന്‍റെ പാര്‍ട്‌ണര്‍മാരായ റാന്നി കാവുങ്കൽ ടോണി, സഹോദരൻ ടോം എന്നിവർ ഉടുമ്പഞ്ചോല താലൂക്ക് ഓഫീസിലെത്തി ഹിയറിങ്ങിന് ഹാജരായി. നേരത്തെ ഭൂമി അളന്നപ്പോൾ പിശക് ഉണ്ടായിരുന്നുവെന്ന് ഉടമകൾ ചൂണ്ടിക്കാട്ടി. തങ്ങളുടെ സാന്നിധ്യത്തിൽ വീണ്ടും അളക്കണമെന്ന് ഇവർ ആവശ്യപ്പെട്ടു.

ഇതേ തുടർന്നാണ് ഹെഡ് സർവേയറുടെ നേതൃത്വത്തിൽ വീണ്ടും ഭൂമി അളക്കുവാൻ തീരുമാനിച്ചത്. അടുത്തയാഴ്‌ച ഭൂമി അളന്ന് തിരിക്കുമെന്ന് ഉടുമ്പഞ്ചോല ലാൻഡ് റവന്യൂ തഹസിൽദാർ എവി ജോസ് അറിയിച്ചു. അളന്ന് തിട്ടപ്പെടുത്തിയ ശേഷം അധിക ഭൂമി കൈവശപ്പെടുത്തിയിട്ടുണ്ടെങ്കിൽ ആ ഭൂമി അടിയന്തരമായി പിടിച്ചെടുക്കുവാനാണ് റവന്യൂ വകുപ്പിന്‍റെ നീക്കം.