കണ്ണൂർ: സിനിമ നയ രൂപീകരണ സമിതിയിൽ നിന്ന് മാത്രമല്ല തെരഞ്ഞെടുക്കപ്പെട്ട എല്ലാ പദവികളിൽ നിന്നും മാറി നിന്ന് മുകേഷ് അന്വേഷണത്തെ നേരിടണമെന്ന് നടി ഗായത്രി വർഷ. സ്ത്രീകൾ പരാതി പറഞ്ഞാലും പരിഗണിക്കപ്പെടാത്ത അവസ്ഥയാണ് ഉണ്ടായിരുന്നത്. എന്നാൽ ഇപ്പോൾ ലഭിച്ചിരിക്കുന്നത് മികച്ച അവസരമാണ്. അതിനാൽ പരാതി നൽകാൻ ഇരയായവർ തയ്യാറാവണം. അമ്മ സംഘടനയിൽ റബർ സ്‌റ്റാമ്പായി വനിതകളെ പ്രതിഷ്‌ഠിച്ചിട്ട് കാര്യമില്ലെന്നും ഗായത്രി പറഞ്ഞു.
അതേസമയം നയ രൂപീകരണ സമിതിയിൽ മുകേഷ് തുടരണോ വേണ്ടയോ എന്ന് തീരുമാനിക്കേണ്ടത് സർക്കാർ ആണെന്ന് ചലചിത്ര വികസന കോർപ്പറേഷൻ ചെയർമാൻ ഷാജി എൻ കരുണും വ്യക്തമാക്കി. ഇക്കാര്യത്തിൽ സർക്കാരുമായി ആലോചിച്ച് തീരുമാനമെടുക്കും. എല്ലാവർക്കും കോൺക്ലേവിൽ അവസരം നൽകുമെന്നും എല്ലാവർക്കും പറയാനുള്ള വേദിയൊരുക്കുമെന്നും അദ്ദേഹം വ്യക്തമാക്കി.
അന്താരാഷ്ട്ര നിലവാരത്തിൽ ആയിരിക്കും കോൺക്ലേവ് ഒരുക്കുക. അഭിപ്രായങ്ങൾ ക്രോഡീകരിച്ചായിരിക്കും കരട് തയ്യാറാക്കി സർക്കാരിന് കൈമാറുകയെന്നും ഷാജി എൻ കരുൺ കൂട്ടിച്ചേർത്തു.