കണ്ണൂർ : ഒരേ ബസിൽ ഡ്രൈവറും കണ്ടക്‌ടറുമായി ഭാര്യയും ഭർത്താവും. പാടിയോട്ടുചാലിലെ പുത്തൻപുരയ്ക്കൽ ജോമോനും ഭാര്യ ജിജിനയുമാണ് ഈ ദമ്പതികൾ. 13 വർഷങ്ങൾക്ക് മുമ്പ് വിവാഹിതയായ ജിജിന ഭർത്താവിനൊപ്പം ജോലി ചെയ്യണമെന്ന ആഗ്രഹത്തിൽ ഹെവി ലൈസൻസും കണ്ടക്‌ടർ ലൈസൻസും സ്വന്തമാക്കുകയായിരുന്നു.
ചെറുപുഴ-തയ്യേനി-വെള്ളരിക്കുണ്ട്-പാണത്തൂർ റൂട്ടിൽ സർവീസ് നടത്തുന്ന 'വന്ദേഭാരത്' ബസിലാണ് ഇവർ ജോലി ചെയ്യുന്നത്. തൊഴിൽ മേഖലയിലും കുടുംബ ജീവിതത്തിലും ഏറെ സംതൃപ്‌തരാണിരുവരും. വിവാഹം കഴിഞ്ഞിട്ട് വർഷങ്ങളേറെ ആയെങ്കിലും ഒരു ദിവസം പോലും ജിജിന ഭർത്താവിനെ പിരിഞ്ഞിരുന്നിട്ടില്ല. വാഹനങ്ങളോട് ഏറെ കമ്പമുള്ള ജിജിന ഭർത്താവ് ഓടിക്കുന്ന വാഹനങ്ങൾ ഓടിച്ചു നോക്കുമായിരുന്നു. ഹെവി ലൈസൻസ് എടുക്കുന്ന സമയത്ത് ജോമോൻ തന്നെയാണ് കണ്ടക്‌ടർ ലൈസൻസും എടുക്കുവാൻ പറയുന്നത്. ഇപ്പോൾ ഒന്നരമാസമായി ഇരുവരും ഒരേ ബസിലെ ഡ്രൈവറും കണ്ടക്‌ടറുമായി ജോലി ചെയ്‌തു വരികയാണ്.