കാട്ടാന ആക്രമണം രൂക്ഷം: ആശങ്കയില്‍ മോതിരക്കണ്ണി നിവാസികള്‍, നടപടി വേണമെന്നാവശ്യം - Elephant Attack In Thrissur

തൃശൂരില്‍ കാട്ടാനാക്രമണത്തില്‍ വ്യാപക കൃഷിനാശം. വനം വകുപ്പിന്‍റെ ഭാഗത്ത് നിന്നും കൃത്യമായ ഇടപെടൽ ഉണ്ടാകുന്നില്ലെന്ന് ആക്ഷേപം. ആർആർടി സംഘം രൂപീകരിക്കണമെന്ന് ആവശ്യം.

തൃശൂർ:ചാലക്കുടി മോതിരക്കണ്ണിയില്‍ രണ്ടാഴ്‌ചയായി കാട്ടാന ആക്രമണം രൂക്ഷം. പരിയാരത്ത് കാട്ടാനകള്‍ വ്യാപകമായി കൃഷി നശിപ്പിച്ചു. വനാതിർത്തിയിൽ സ്ഥാപിച്ചിട്ടുള്ള ഇലക്ട്രിക് ഫെൻസിങ് തകർത്താണ് കാട്ടാന ജനവാസ മേഖലകളിലേക്ക് എത്തുന്നത്.

ഇലക്ട്രിക് ഫെൻസിങ്ങിന്‍റെ തകരാർ പരിഹരിക്കുന്നതിന് കൃത്യമായ ഇടപെടൽ വനം വകുപ്പിന്‍റെ ഭാഗത്ത് നിന്നും ഉണ്ടാകുന്നില്ലെന്നാണ് പരാതി. പലപ്പോഴും വനം വകുപ്പ് ഓഫിസര്‍മാര്‍ ഫോൺ എടുക്കുന്നില്ലെന്നും പരാതി ഉയരുന്നുണ്ട്. ആനയെ തുരത്തുന്നതിന് യാതൊരുവിധ സംവിധാനങ്ങളും ഇല്ലാതെയാണ് വനം വകുപ്പ് ഉദ്യോഗസ്ഥർ എത്തുന്നതെന്നും പ്രദേശവാസികള്‍ പറഞ്ഞു.

പ്രദേശത്ത് പകൽ സമയത്ത് വനം വകുപ്പിന്‍റെ പട്രോളിങ് വേണമെന്നും കാട്ടാനകൾ തമ്പടിച്ചിട്ടുള്ള സ്ഥലത്ത് നിന്ന് തുരത്തി ഓടിക്കണമെന്നും ആവശ്യം ഉയരുന്നുണ്ട്. അടിയന്തര ഘട്ടങ്ങളിൽ സഹായങ്ങൾക്ക് ആർആർടി സംഘം രൂപീകരിക്കണമെന്നും അതുവരെ വാച്ചർമാരെ ഏർപ്പെടുത്തണമെന്നും പ്രദേശവാസികള്‍ ആവശ്യപ്പെടുന്നുണ്ട്.