ഇടുക്കി : ഗോത്രവർഗ പഞ്ചായത്തായ ഇടമലക്കുടിയിൽ ഹൃദ്രോഗം കണ്ടെത്തിയ വയോധികയെ വാഹനത്തിലേക്ക് എത്തിക്കുന്നതിനായി ചുമന്നത് 10 കിലോമീറ്റർ. പരപ്പയാർകുടി സ്വദേശി ചടയൻ്റെ ഭാര്യ ചിലമ്പായിയെയാണ്‌ (64) ചികിത്സ നൽകുന്നതിനായി കാട്ടുവഴിയിലൂടെ ചുമന്ന് കേപ്പക്കാട് എത്തിച്ചത്. ആരോഗ്യവകുപ്പ് ഉദ്യോഗസ്ഥരുടെ നേതൃത്വത്തിൽ സ്ത്രീകൾ ഉൾപ്പെടെയുള്ള ഇരുപത്തിയഞ്ചോളം കുടിക്കാരാണ് രോഗിയെ ചുമന്നെത്തിച്ചത്.
പിന്നീട് കേപ്പക്കാട് നിന്നും ജീപ്പിൽ 5 കിലോമീറ്റർ അകലെയുള്ള പെട്ടിമുടിയിൽ എത്തിച്ചു. ഇവിടെ നിന്നാണ് രോഗിയെ ആംബുലൻസിൽ ആശുപത്രിയിൽ എത്തിച്ചത്. പരപ്പയാർ കുടിയിലെ പത്തോളം പേർക്ക് പനി ബാധിച്ചതോടെ ആരോഗ്യവകുപ്പ് ഉദ്യോഗസ്ഥർ കുടിയിൽ എത്തിയിരുന്നു. കിലോമീറ്ററുകൾ നടന്നാണ് ഇവർ പരപ്പയാറിൽ എത്തിയത്. പനി ബാധിച്ചവരെ വനം വകുപ്പ് ഉദ്യോഗസ്ഥരുടെ സഹായത്തോടെ ചുമന്ന് പുറത്ത് എത്തിച്ച് ചികിത്സ നൽകാനാണ് തീരുമാനിച്ചിരുന്നത്.
എന്നാൽ ചികിത്സ തുടങ്ങിയതോടെ പനിക്ക് ശമനമുണ്ടായി. ഇതോടെ തീരുമാനം ഉപേക്ഷിച്ചു. എന്നാൽ പരിശോധനയിൽ ചിലമ്പായിക്ക് പനിയോടൊപ്പം ഹൃദയസംബന്ധമായ അസുഖവും കണ്ടെത്തിയിരുന്നു. ഇതോടെയാണ് ഇവരെ ചുമന്ന് ആശുപത്രിയില്‍ എത്തിക്കാൻ തീരുമാനിച്ചത്. ഒരു ദിവസം നീണ്ട കഠിന പ്രയത്നമായിരുന്നു. വെള്ളിയാഴ്‌ച രാവിലെ 7:30 -ന് ആണ് ഉദ്യോഗസ്ഥരുടെ നേതൃത്വത്തിൽ കുടിക്കാർ ചിലമ്പായിയെയും ചുമന്ന് യാത്ര ആരംഭിച്ചത്.