കളര്‍കോട് പൊലിഞ്ഞത് കുടുംബങ്ങളുടെ പ്രതീക്ഷ; മരിച്ച ശ്രീദീപ് മികച്ച കായിക പ്രതിഭ, പ്രിയപ്പെട്ടവരുടെ വിയോഗം താങ്ങാനാകാതെ ജന്മനാട്

അപകടം നടന്നത് ഇന്നലെ രാത്രി. ടവേര കാര്‍ കെഎസ്‌ആര്‍ടിസി ബസുമായി കൂട്ടിയിടിക്കുകയായിരുന്നു.

പാലക്കാട്/കോട്ടയം: ആലപ്പുഴ കളർകോട് വാഹനാപകടത്തിന്‍റെ ഞെട്ടലിൽ ആണ് ശേഖരീപുരം ഗ്രാമം. പാലക്കാട് ഭാരത് മാതാ സ്‌കൂൾ അധ്യാപകനായ വൽസന്‍റെയും അഭിഭാഷകയായ ബിന്ദുവിന്‍റെയും ഏകമകനാണ് അപകടത്തിൽ മരിച്ച ശ്രീദീപ് വൽസൻ. പഠനത്തോടൊപ്പം കായികരംഗത്തും മികവ് തെളിയിച്ച ശ്രീദീപ് സംസ്ഥാനതല ഹർഡിൽസ് താരമാണ്. 2017-18 ൽ ഒരു രാജ്യാന്തര മത്സരത്തിലും പങ്കെടുത്തു. ഷൂട്ടിങ്ങിലും മികവ് തെളിയിച്ചിട്ടുണ്ട്.

രണ്ടാമത്തെ ശ്രമത്തിലാണ് എൻട്രൻസിലൂടെ ആലപ്പുഴ മെഡിക്കൽ കോളജിൽ പ്രവേശനം നേടിയത്. അപകട വാർത്ത അറിഞ്ഞ നിമിഷം മുതൽ ശേഖരീപുരം ശ്രീവിഹാർ വീട്ടിലേക്ക് ആളുകളുടെ ഒഴുക്കാണ്. പഠനത്തോടൊപ്പം കായിക രംഗത്തും മികവ് തെളിയിച്ച വിദ്യാർഥിയായിരുന്നു ശ്രീദീപ് എന്ന് കായിക പരിശീലകൻ ഹരിദാസ് അനുസ്‌മരിച്ചു. സംസ്‌കാര സ്ഥലവും സമയവും മൃതദേഹം വിട്ടുകിട്ടിയ ശേഷം തീരുമാനിക്കുമെന്ന് ബന്ധുക്കൾ അറിയിച്ചു.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക

ദേവനന്ദന്‍റെ വിയോഗം താങ്ങാനാകാതെ കുടുംബം:19 വയസുകാരൻ ദേവനന്ദന്‍റെ മരണവാർത്തയിൽ വിറങ്ങലിച്ച് കോട്ടയത്തെ മറ്റക്കരയിലുള്ള ജന്മനാടും കുടുംബ വീടും. പ്ലസ്‌ ടുവിന് ഒപ്പം തന്നെ നീറ്റ് പരീക്ഷ ഉയർന്ന മാർക്കോടെ പാസായ ദേവനന്ദൻ മാതാപിതാക്കളുടെ മാത്രമല്ല, നാടിന്‍റെ കൂടി പ്രതീക്ഷയായിരുന്നു.

മലപ്പുറം കോട്ടയ്ക്കലിൽ 12 വർഷമായി താമസിക്കുന്ന അധ്യാപകൻ ബിനു രാജിന്‍റെയും സെയിൽസ് ടാക്‌സ് ഉദ്യോഗസ്ഥയായ രഞ്ജിമോളുടെയും രണ്ടാമത്തെ മകനായിരുന്നു ദേവനന്ദൻ. നാളെ നാലുമണിക്ക് സംസ്‌കാരം നടത്താനുള്ള ക്രമീകരണങ്ങളിലാണ് കുടുംബ വീട്. കഴിഞ്ഞ ഓണ അവധിയ്‌ക്കും വീട്ടിൽ വന്നുപോയതാണ് ദേവനന്ദൻ.