ഓസ്‌ട്രേലിയ വെസ്റ്റ് ഇന്‍ഡീസ് രണ്ടാം ടെസ്റ്റിന്‍റെ മൂന്നാം ദിനം. വിന്‍ഡീസിന് വേണ്ടി പതിനൊന്നാമനായിട്ടായിരുന്നു ഷമാര്‍ ജോസഫ് എന്ന 24 കാരന്‍ ബാറ്റ് ചെയ്യാന്‍ ക്രീസിലെത്തിയത്. ടീമിന് മികച്ച സ്കോര്‍ സമ്മാനിക്കാന്‍ തനിക്ക് കഴിയുന്ന അത്രയും നേരം ക്രീസില്‍ നില്‍ക്കാനായിരുന്നു ആ ചെറുപ്പക്കാരന്‍റെ പദ്ധതി. എന്നാല്‍, വെറും 14 പന്ത് മാത്രമായിരുന്നു ഷമാര്‍ ജോസഫിന് അവിടെ കളിക്കാനായത്.
150 കിലോ മീറ്റര്‍ വേഗതയില്‍ എത്തിയ മിച്ചല്‍ സ്റ്റാര്‍ക്കിന്‍റെ യോര്‍ക്കര്‍ ആ ചെറുപ്പക്കാരന്‍റെ കാല്‍വിരലിലാണ് പതിച്ചത്. തുടര്‍ന്ന്, ക്രീസില്‍ നിലയുറപ്പിച്ച് നില്‍ക്കാന്‍ സാധിക്കാതിരുന്ന താരം ടീം അംഗങ്ങളുടെ സഹായത്തോടെ നിറഞ്ഞ കണ്ണുകളുമായി മൈതാനം വിട്ടു. ഷമാര്‍ ജോസഫ് റിട്ടയേര്‍ഡ് ഹര്‍ട്ടായതോടെ, വിന്‍ഡീസിന് രണ്ടാം ഇന്നിങ്‌സില്‍ ഒരു ബൗളറെ നഷ്‌ടമാകുമെന്നായിരുന്നു കമന്‍ററി ബോക്‌സിലുണ്ടായിരുന്നവര്‍ പോലും പറഞ്ഞത്.
എന്നാല്‍, അധികം വൈകാതെ തന്നെ ഷമാറിന്‍റെ പരിക്കിനെ കുറിച്ചുള്ള വാര്‍ത്ത വിന്‍ഡീസ് ക്രിക്കറ്റ് ബോര്‍ഡ് പുറത്തുവിടുകയും ചെയ്‌തു. പരിക്ക് ഗുരുതരമല്ലാത്ത സാഹചര്യത്തില്‍ അടുത്ത ദിവസം തന്നെ താരം കളത്തിലിറങ്ങുമെന്ന് വിന്‍ഡീസ് ബോര്‍ഡ് അറിയിച്ചു. വിന്‍ഡീസ് ആരാധകര്‍ക്ക് ആശ്വാസകരമായിരുന്നു ആ വാര്‍ത്ത.
ഗാബയില്‍ മത്സരം നാലാം ദിവസത്തിലേക്ക് കടന്നു. ക്രീസില്‍ ഓസീസ് ഓപ്പണര്‍ സ്റ്റീവ് സ്മിത്തും കാമറൂണ്‍ ഗ്രീനും. 216 റണ്‍സ് വിജയലക്ഷ്യത്തിലേക്ക് ബാറ്റേന്തുന്ന ഓസ്‌ട്രേലിയ്ക്കായി സ്മിത്തും ഗ്രീനും കരുതലോടെ റണ്‍സ് കണ്ടെത്തുന്ന സമയം.