ആര്‍ച്ചറി ആദ്യ ക്വാര്‍ട്ടര്‍ ഫൈനല്‍ രണ്ട് 'ചൈനകള്‍' തമ്മിലുള്ള മല്‍സരമായിരുന്നു. ചൈനയും ചൈനീസ് തായ്പേയും തമ്മിലുള്ള പോരാട്ടം. നാന്‍സി പെലോസിയുടെ തായ്വാന് സന്ദര്‍ശനത്തെത്തുടര്‍ന്ന് 2022ല്‍ തായാവാന് ചുറ്റും സൈനിക അഭ്യാസ പ്രകടനങ്ങള്‍ നടത്തി മുള്‍മുനയില്‍ നിര്‍ത്താന്‍ ചൈന ശ്രമിച്ചത് വലിയ വിമര്‍ശനങ്ങള്‍ക്ക് വഴി വെച്ചിരുന്നു.
തായ്വാന് അമേരിക്ക സഹായം നല്‍കുന്നതിനെതിരായ മുന്നറിയിപ്പായിരുന്നു ചൈനീസ് യുദ്ധവിമാനങ്ങള്‍ അടക്കം പങ്കെടുത്ത അഭ്യാസ പ്രകടനങ്ങള്‍. പല തവണ തായ്‌വാന്‍റെ വ്യോമാതിര്‍ത്തി മറികടന്ന് പ്രകോപനം സൃഷ്‌ടിക്കാനും ചൈന മെനക്കെട്ടു. പുതിയ പ്രസിഡന്‍റായി വില്യം ലായി ചുമതലയേറ്റതിന് പുറകേ ചൈന അഭ്യാസ പ്രകടനങ്ങള്‍ ഒന്നു കൂടി വര്‍ധിപ്പിച്ചു.
ഈ സംഘര്‍ഷങ്ങളുടെ നടുവിലാണ് ഒളിമ്പിക് വേദിയില്‍ ഇരു രാജ്യത്തേയും താരങ്ങള്‍ നേര്‍ക്കുനേര്‍ വന്നത്. ലോക സമാധാനത്തിന്‍റെ വേദിയായ ഒളിമ്പിക്‌സില്‍ സംഘര്‍ഷ മേഖലയില്‍ നിന്നെത്തിയതിന്‍റെ വികാര പ്രകടനങ്ങളൊന്നും ഇരു രാജ്യങ്ങളുടേയും പ്രകടനത്തിലും പെരുമാറ്റത്തിലും ഉണ്ടായില്ല. തികഞ്ഞ സ്പോര്‍ട്‌സ്‌മാന്‍ സ്പിരിറ്റോടെയാണ് ഇരു ടീമുകളും മല്‍സരം പൂര്‍ത്തിയാക്കിയത്.
ഇരുപതാം നൂറ്റാണ്ടിന്‍റെ മധ്യത്തോടെ ആരംഭിച്ച തര്‍ക്കം:ചൈനീസ് സിവില്‍ വാറിനെത്തുടര്‍ന്ന് 1049 ലാണ് ചൈനീസ് കമ്യൂണിസ്റ്റ് പാര്‍ട്ടി പീപ്പിള്‍സ് റിപ്പബ്ലിക്ക് ഓഫ് ചൈനയ്ക്ക് രൂപം നല്‍കുന്നത്. മറിച്ച് നാഷണലിസ്റ്റ് റിപ്പബ്ലിക്ക് ഓഫ് ചൈന 1912 മുതല്‍ത്തന്നെ നിലവിലുണ്ടായിരുന്നു. 1949 ലെ ചൈനീസ് യുദ്ധത്തില്‍ പരാജയപ്പെട്ടതോടെ റിപ്പബ്ലിക്ക് ഓഫ് ചൈന തായ്‌വാനിലേക്കൊതുങ്ങി.
1895ല്‍ ജപ്പാന്‍റെ അധീനതയിലെത്തുന്നതുവരെ ക്വിങ്ങ് രാജവംശമായിരുന്നു തായ്വാന് ദ്വീപുകള്‍ ഭരിച്ചത്. രണ്ടാം ലോക മഹായുദ്ധത്തില്‍ ജപ്പാന്‍ പരാജയപ്പെട്ടതോടെ തായ്‌വാനില്‍ നിന്നും അവര്‍ പിന്‍വാങ്ങി. 1971ല്‍ ഐക്യരാഷ്ട്രസഭ പീപ്പിള്‍സ് റിപ്പബ്ലിക് ഓഫ് ചൈനയെന്ന പുതിയ രാജ്യത്തിന് അംഗീകാരം നല്‍കി.
ഒളിമ്പിക് കമ്മിറ്റിയാകട്ടെ 1954ല്‍ തന്നെ ഇരു ചൈനകള്‍ക്കും അംഗീകാരം നല്‍കി. 1976ല്‍ തായ്വാന് എന്ന പേരിലോ റിപ്പബ്ലിക്ക് ഓഫ് ചൈന എന്ന പേരിലോ മത്സരിക്കുന്നതില്‍ നിന്ന് തായ്വാന് ടീമിനെ വിലക്കി. മുന്‍ വര്‍ഷങ്ങളിലൊക്കെ തായ്വാന് മത്സരിച്ചത് റിപ്പബ്ലിക് ഓഫ് ചൈന എന്ന പേരിലായിരുന്നു.