ലിസ്‌ബണ്‍:ഇതിഹാസ ഫുട്ബോൾ താരം ക്രിസ്റ്റ്യാനോ റൊണാൾഡോ കരിയറില്‍ 900 ഗോള്‍ എന്ന ചരിത്രനേട്ടം സ്വന്തമാക്കി. ലിസ്ബണിൽ ക്രൊയേഷ്യക്കെതിരായ യുവേഫ നേഷൻസ് ലീഗ് ഗ്രൂപ്പ് ഘട്ട മത്സരത്തിലാണ് താരം മാന്ത്രിക സംഖ്യയിലെത്തിയത്. മത്സരത്തിന്‍റെ 34-ാം മിനിറ്റിൽ സഹതാരമായ നുനോ മെൻഡിസ് നൽകിയ ക്രോസ് ഒരു കിക്കിലൂടെ ഗോൾവല കുലുക്കിയതോടെയാണ് 900-ാമത്തെ ഗോൾ പിറന്നത്.
ഗോള്‍ നേടിയ ശേഷം വികാരാധീനനായി കോർണറിലേക്ക് ഓടിയെത്തിയ റൊണാൾഡോ തന്‍റെ മുഖത്ത് കൈകൾ വെച്ച് നിലത്ത് വീണ് നേട്ടം ആഘോഷിച്ചു. മത്സരത്തിൽ പോർച്ചുഗൽ ക്രൊയേഷ്യയെ 2-1ന് പരാജയപ്പെടുത്തി. ഫുട്ബോൾ ചരിത്രത്തിൽ 900 മോ അതിലധികമോ ഗോളുകൾ നേടുന്ന ഏക താരമായി ക്രിസ്റ്റ്യാനോ. പോർച്ചുഗലിനായി 131-ാം ഗോളെന്ന നേട്ടവും താരത്തെ തേടിയെത്തി.