യുവനായകന്മാരിൽ ശ്രദ്ധേയനായ ഉണ്ണി മുകുന്ദൻ സിനിമകൾക്ക് ഇപ്പോൾ പ്രത്യേക ഫാൻ ബേസ് തന്നെയുണ്ട്. പ്രേക്ഷകർ ഒരു പോലെ കാത്തിരിക്കുന്ന ഉണ്ണി മുകുന്ദൻ - ഹനീഫ് അദേനി കോമ്പോയുടെ പുതിയ ചിത്രമായ 'മാർക്കോ' യുടെ പുതിയ പോസ്റ്റർ പുറത്തിറങ്ങി. ക്യൂബ്‌സ്‌ എന്‍റർടൈൻമെന്‍റ്സിന്‍റെ ബാനറിൽ ഷെരീഫ് മുഹമ്മദും ഉണ്ണി മുകുന്ദൻ ഫിലിംസും ചേർന്നാണ് ഫുൾ പാക്കഡ്‌ ആക്ഷൻ സിനിമയായ 'മാർക്കോ' നിർമ്മിക്കുന്നത്.
6 ഭാഷകളിൽ ആണ് പോസ്റ്റർ പുറത്തിറക്കിയിട്ടുള്ളത്. പ്രഖ്യാപന സമയം മുതൽ വാർത്തകളിൽ നിറഞ്ഞു നിൽക്കുന്ന ചിത്രത്തിന്‍റെ ഇത് വരെ ഇറങ്ങിയ എല്ലാവിധത്തിലുമുള്ള പോസ്റ്ററുകൾ പ്രേക്ഷകർക്കിടയിൽ വൻ സ്വീകാര്യതയായിരുന്നു. പുതിയ പോസ്റ്റർ സമൂഹമാധ്യമങ്ങളിൽ വൈറലായി മാറിയിട്ടുണ്ട്.
നിവിൻ പോളിയും ഹനീഫ് അദേനിയും ഒന്നിച്ച മിഖായേൽ എന്ന ചിത്രത്തിലെ ഉണ്ണിയുടെ വില്ലൻ കഥാപാത്രമായ മാർക്കോയുടെ സ്‌പിന്ന് ഓഫ് ആണ് പുതിയ ചിത്രം. മലയാളത്തിലെ ആദ്യത്തെ വില്ലന്‍റെ സ്‌പിൻ ഓഫ് ചിത്രം എന്ന ക്രെഡിറ്റും മാർക്കോയ്ക്ക് സ്വന്തം. മാളികപ്പുറം, തമിഴ് ചിത്രം ഗരുഡൻ തുടങ്ങിയ വമ്പൻ ഹിറ്റ് ചിത്രങ്ങളുടെ ആവർത്തിച്ചുള്ള വിജയങ്ങൾക്കും 100 കോടി ക്ലബ്ബിന്‍റെ തിളക്കത്തിനും തൊട്ടു പിന്നാലെ ഉണ്ണി മുകുന്ദൻ 'മാർക്കോ'യുമായി എത്തുമ്പോൾ ആവേശം കൂടുകയാണ്.
ഒരു മികച്ച തിയേറ്റർ എക്‌സ്‌പീരിയൻസ് ഡിമാൻഡ് ചെയ്യുന്ന സിനിമ എന്നതിന് പുറമെ, അഞ്ചിലധികം വമ്പൻ ആക്ഷൻ സീക്വെൻസുകൾ നിറഞ്ഞ സീറ്റ് എഡ്‌ജ്‌ ആക്ഷൻ ത്രില്ലർ ആണെന്നാണ് സിനിമ മേഖലയിൽ നിന്നുള്ള റിപ്പോർട്ടുകൾ. ഈ അടുത്ത കാലത്ത് വൻ ഹിറ്റായ ഹിന്ദി ചിത്രം അനിമൽ പോലെ ഒരു ചിത്രമാകും മാർക്കോ. ഇതുപോലെ മാസ്‌ വയലൻസ് നിറഞ്ഞ ഒരു ചിത്രം മലയാളത്തിലും ആദ്യമായിട്ടാണ്.