'പുഷ്‌പ: ദി റൈസ്' 2021 ല്‍ പുറത്തിറങ്ങിയതു മുതൽ ചിത്രത്തിന്‍റെ രണ്ടാം ഭാഗത്തിനായുള്ള കാത്തിരിപ്പിലായിരുന്നു പ്രേക്ഷകര്‍. ഈ വര്‍ഷം പറഞ്ഞതിലും ഒരു ദിവസം മുന്‍പേ പുഷ്‌പയുടെ രണ്ടാം ഭാഗം പ്രേക്ഷകര്‍ക്ക് മുന്നില്‍ എത്തുമെന്നാണ് അണിയറ പ്രവര്‍ത്തകര്‍ അറിയിച്ചിട്ടുള്ളത്. ലോകമെമ്പാടുമുള്ള തിയേറ്ററുകളില്‍ ബ്രഹ്മാണ്ഡ റിലീസായാണ് 'പുഷ്‌പ 2: ദി റൂള്‍' പ്രദര്‍ശനത്തിന് എത്തുന്നത്. ഇപ്പോഴിതാ ആ തിയതിക്ക് ഒന്നുകൂടി ഊന്നല്‍ നല്‍കികൊണ്ട് രശ്‌മിക മന്ദാന പങ്കുവച്ച ഒരു പോസ്‌റ്റാണ് ഇപ്പോള്‍ പ്രേക്ഷക ശ്രദ്ധ നേടുന്നത്.
പുഷ്‌പരാജിന്‍റെയും ശ്രീവല്ലിയുടെയും തീവ്രമായ പ്രണയം വെളിപ്പെടുത്തുന്ന തരത്തിലുള്ള പോസ്‌റ്ററാണ് രശ്‌മിക സോഷ്യല്‍ മീഡിയയിലൂടെ പങ്കുവച്ചത്. പോസ്‌റ്റിന് നിരവധി കമന്‍റുകളാണ് വരുന്നത്. കൊള്ളാം, അടിപൊളി, മനോഹരമായ കെമസ്‌ട്രിയാണ് നിങ്ങള്‍ തമ്മില്‍ എന്നിങ്ങനെ പോകുന്നു കമന്‍റുകള്‍.
"നിങ്ങൾക്കും നിങ്ങളുടെ കുടുംബത്തിനും പുഷ്‌പ രാജും ശ്രീവല്ലിയും ദീപാവലി ആശംസകൾ നേരുന്നു. ലോകമെമ്പാടും 2024 ഡിസംബർ 5-ന് വമ്പന്‍ റിലീസാണ്". എന്നാണ് ചിത്രത്തോടൊപ്പം രശ്‌മിക കുറിച്ചത്.
പുഷ്‌പയുടെ ആദ്യ ഭാഗത്തില്‍ അല്ലു അര്‍ജുനും രശ്‌മിക മന്ദാനയും അവതരിപ്പിച്ച പുഷ്‌പ രാജ്, ശ്രീവല്ലി എന്ന കഥാപാത്രവും ഇവരുടെ കെമസ്‌ട്രിയും ഇതിനോടകം തന്നെ പ്രേക്ഷകര്‍ ഏറ്റെടുത്തതാണ്. രണ്ടാം ഭാഗത്തിലും മനോഹരമായ മുഹൂര്‍ത്തങ്ങള്‍ ഉണ്ടാവുമെന്ന് തന്നെയാണ് ആരാധകര്‍ കരുതുന്നത്.
ലോകം മുഴുവൻ ഏറ്റെടുത്ത ബ്ലോക്ക്ബസ്‌റ്റര്‍ ചിത്രമായ 'പുഷ്‌പ: ദ റൈസി'ന്‍റെ രണ്ടാം ഭാഗമായെത്തുന്ന ''പുഷ്‌പ 2: ദ റൂൾ' ബോക്‌സ് ഓഫീസ് കൊടുങ്കാറ്റായി മാറുമെന്നാണ് ഏവരും കണക്കുകൂട്ടുന്നത്. ഫസ്‌റ്റ് ഹാഫ് ലോക്ക്ഡ്, ലോഡഡ് ആൻഡ് പാക്ക്ഡ് വിത്ത് ഫയർ' എന്ന് കുറിച്ചുകൊണ്ട് സിനിമയുടെ പോസ്‌റ്റര്‍ അടുത്തിടെ അണിയറപ്രവർത്തകർ പുറത്തുവിട്ടിരുന്നു. ''പുഷ്‌പ 2 ദ റൂൾ' ഇന്ത്യൻ സിനിമയുടെ ഒരു പുതിയ യുഗമായിരിക്കും' എന്നാണ് അണിയറ പ്രവർത്തരുടെ ഭാഷ്യം.