നാച്ചുറൽ സ്റ്റാർ നാനി നായകനായി പുതിയ ചിത്രം വരുന്നു. സുജീത്ത് സംവിധാനം ചെയ്യുന്ന ചിത്രത്തിലാണ് നാനി കേന്ദ്ര കഥാപാത്രമായി എത്തുന്നത്. നാനിയുടെ പിറന്നാളിനോടനുബന്ധിച്ച് കഴിഞ്ഞ ദിവസമാണ് ചിത്രത്തിന്‍റെ പ്രഖ്യാപനം നടന്നത്.
നാനിയുടെ കരിയറിലെ 32-ാമത്തെ സിനിമയാണിത്. 'നാനി32' (Nani 32) എന്ന് താത്കാലികമായി പേരിട്ടിരിക്കുന്ന ഈ സിനിമ ഡിവിവി എൻ്റർടെയിൻമെൻസാണ് നിർമിക്കുന്നത്. ഏതായാലും പുതിയ ചിത്രത്തിന്‍റെ പ്രഖ്യാപനം വന്നതോടെ നാനി ആരാധകരും ഏറെ ആവേശത്തിലാണ് (Nanis next film with Sujeeth).
"അക്രമാസക്തനായ ഒരു മനുഷ്യൻ അഹിംസയിലേക്ക് തിരിയുമ്പോൾ അവൻ്റെ ലോകം തലകീഴായി മാറുന്നു"- എന്നതാണ് 'നാനി32'വിന്‍റെ സ്റ്റോറി ലൈൻ. 2025ലാണ് ഈ ചിത്രം പ്രദർശനത്തിനെത്തുക. സംവിധാനത്തിന് പുറമെ ഈ ചിത്രത്തിന് തിരക്കഥ ഒരുക്കിയതും സുജീത്താണ്.
ഡിവിവി എൻ്റർടെയിൻമെൻസിന്‍റെ ബാനറിൽ ഡിവിവി ദനയ്യയും കല്യാൺ ദാസരിയും ചേർന്നാണ് 'നാനി32' നിർമിക്കുന്നത്. നാനി - വിവേക് ആത്രേയ ചിത്രം 'സരിപോദാ ശനിവാരം' നിർമിക്കുന്നതും ഡിവിവി എൻ്റർടെയിൻമെൻസിന്‍റെ ബാനറിൽ ഡിവിവി ദനയ്യയും കല്യാൺ ദാസരിയും ചേർന്നാണ്. കഴിഞ്ഞ ദിവസം നാനിക്ക് പിറന്നാൾ ആശംസകൾ നേർന്നുകൊണ്ട് 'സരിപോദാ ശനിവാരം' ടീം ബർത്ത്ഡേ സ്പെഷ്യൽ പോസ്റ്റ‍ർ പുറത്തിറക്കിയിരുന്നു.