കുഞ്ചമണ്‍ പോറ്റിയല്ല, ഇനി കൊടുമൺ പോറ്റി ; 'ഭ്രമയുഗ'ത്തിലെ മമ്മൂട്ടി കഥാപാത്രത്തിന്‍റെ പേരിൽ അവസാന നിമിഷം മാറ്റം

കുഞ്ചമണ്‍ പോറ്റി എന്നായിരുന്നു മമ്മൂട്ടി അവതരിപ്പിക്കുന്ന കേന്ദ്ര കഥാപാത്രത്തിന്‍റെ പേര്. എന്നാല്‍ ഇതിനെതിരെ കുഞ്ചമണ്‍ കുടുംബം ഹൈക്കോടതിയെ സമീപിക്കുകയായിരുന്നു

മമ്മൂട്ടി നായകനായ 'ഭ്രമയുഗം' സിനിമയ്‌ക്കെതിരായ കുഞ്ചമണ്‍ കുടുംബത്തിന്‍റെ ഹർജിയിൽ തുടർ നടപടികൾ അവസാനിപ്പിച്ച് ഹൈക്കോടതി. ചിത്രത്തിലെ കേന്ദ്ര കഥാപാത്രത്തിന്‍റെ പേരിൽ മാറ്റം വരുത്താനുള്ള അണിയറ പ്രവർത്തകരുടെ അപേക്ഷയിൽ സിബിഎഫ്‌സി (Central Board of Film Certification) തീരുമാനമെടുത്തതായി കേന്ദ്രം ഹൈക്കോടതിയെ അറിയിച്ചു. കൊടുമൺ പോറ്റിയെന്നായിരിക്കും സർട്ടിഫിക്കറ്റിൽ പേര് മാറ്റുക. നേരത്തെ കുഞ്ചമണ്‍ പോറ്റി എന്നായിരുന്നു മമ്മൂട്ടി അവതരിപ്പിക്കുന്ന കേന്ദ്ര കഥാപാത്രത്തിന് പേര് നൽകിയിരുന്നത് (Petition against 'Bramayugam' movie).

എന്നാൽ ദുർമന്ത്രവാദത്തെ പ്രോത്സാഹിപ്പിക്കുന്ന സിനിമ റിലീസ് ചെയ്‌താൽ കുടുംബത്തിന്‍റെ സൽപ്പേരിനെ ബാധിക്കുമെന്ന് ആരോപിച്ച് കുഞ്ചമണ്‍ ഇല്ലത്തെ പിഎം ഗോപിയാണ് ഹൈക്കോടതിയെ സമീപിച്ചത്. 'ഭ്രമയുഗം' സിനിമയുടെ സി.ബി.എഫ്.സി സർട്ടിഫിക്കറ്റ് റദ്ദാക്കണം എന്നാവശ്യപ്പെട്ടായിരുന്നു ഹർജി. കുടുംബത്തിന്‍റെ സമ്മതമില്ലാതെയാണ് ഇല്ലപ്പേരും കഥാപാത്രത്തിന്‍റെ പേരും അണിയറ പ്രവർത്തകർ തീരുമാനിച്ചതെന്നും കുടുംബം ഹർജിയിൽ ആരോപിച്ചിരുന്നു.

അതേസമയം സിനിമയിലെ കഥാപാത്രത്തിന്‍റെ പേര് കൊടുമൺ പോറ്റിയെന്നാക്കാൻ അപേക്ഷ നൽകിയതായി അണിയറ പ്രവർത്തകർ ഇന്നലെ കോടതിയെ അറിയിച്ചിരുന്നു. സിനിമയുടെ ടീസർ കണ്ട് മാത്രമാണ് ആരോപണമെന്നും അണിയറ പ്രവർത്തകർ കോടതിയിൽ വ്യക്തമാക്കിയിരുന്നു. രാഹുൽ സദാശിവൻ തിരക്കഥയും സംവിധാനവും നിർവ​ഹിച്ച ഈ ചിത്രം കൊട്ടാരത്തിൽ ശങ്കുണ്ണിയുടെ ഐതിഹ്യമാലയെ ആസ്‌പദമാക്കിയുള്ളതാണ്.

എന്നാൽ കൊട്ടാരത്തിൽ ശങ്കുണ്ണിയുടെ ഐതിഹ്യമാലയിൽ കുഞ്ചമൺ ഇല്ലക്കാരെക്കുറിച്ച് പറയുന്നത് പരമ്പരാ​ഗതമായി ദുർമന്ത്രവാദം ചെയ്യുന്നവരല്ല എന്നാണെന്നും എന്നാൽ 'ഭ്രമയുഗ'ത്തിന്‍റെ പുറത്തുവന്ന വിവരങ്ങൾ സൂചിപ്പിക്കുന്നത് ഇത് ഐതിഹ്യമാലയില്‍നിന്ന് എടുത്തിട്ടുള്ള കുഞ്ചമൺകാരുടെ തന്നെ കഥയെന്നുമാണ് ഹർജിക്കാരന്‍റെ വാദം. മമ്മൂട്ടിയുടെ കഥാപാത്രമായ കുഞ്ചമൺ പോറ്റി ദുർമന്ത്രവാദം ചെയ്യുന്ന ആളാണെന്നും ഇത് തങ്ങളുടെ കുടുംബത്തിന് ചീത്തപ്പേരുണ്ടാക്കുമെന്നും ഹർജിയിൽ പറഞ്ഞിരുന്നു.

പ്രശസ്‌ത എഴുത്തുകാരൻ ടി ഡി രാമകൃഷ്‌ണനാണ് 'ഭ്രമയുഗ'ത്തിനായി സംഭാഷണങ്ങൾ രചിച്ചിരിക്കുന്നത്. പൂർണമായും ബ്ലാക്ക് ആൻഡ് വൈറ്റിൽ ഒരുക്കിയിരിക്കുന്ന ഈ ചിത്രം നാളെയാണ് (ഫെബ്രുവരി 15) തിയേറ്ററുകളിലെത്തുക. മലയാളം, തമിഴ്, തെലുഗു, കന്നഡ, ഹിന്ദി ഭാഷകളിൽ ഒരേസമയമാണ് റിലീസ്. ഹൊറർ ത്രില്ലർ സിനിമകൾക്ക് മാത്രമായി ആരംഭിച്ചിരിക്കുന്ന പ്രൊ‍ഡക്ഷൻ ഹൗസായ നൈറ്റ് ഷിഫ്റ്റ് സ്റ്റുഡിയോസും വൈ നോട്ട് സ്റ്റുഡിയോസും ചേർന്ന് നിർമിക്കുന്ന 'ഭ്രമയുഗം' ആന്‍റോ ജോസഫിന്‍റെ ആന്‍ മെഗാ മീഡിയയാണ് കേരളത്തിലെ തിയേറ്ററുകളില്‍ വിതരണത്തിനെത്തിക്കുന്നത്.