ബെഹ്‌റെയ്ച്ച് (ഉത്തര്‍പ്രദേശ്) : ഒന്‍പത് പേരെ കൊന്ന ചെന്നായയെ വനം വകുപ്പ് പിടികൂടി. എട്ട് കുട്ടികളും ഒരു വൃദ്ധയുമടക്കമുള്ളവരാണ് ചെന്നായയുടെ ആക്രമണത്തില്‍ കൊല്ലപ്പെട്ടത്. വനംവകുപ്പ് സ്ഥാപിച്ച കൂട്ടില്‍ ചെന്നായ അകപ്പെടുകയായിരുന്നു.
ഈ ചെന്നായ ബെഹ്റെയ്ച്ചിലെ മഹ്സി മേഖലയില്‍ ഭീകാരാന്തരീക്ഷം സൃഷ്‌ടിക്കുകയായിരുന്നു. പലരും ചെന്നായയുടെ ആക്രമണത്തിന് ഇരയായി. ദിവസങ്ങള്‍ക്ക് മുമ്പ് അമ്മയുടെ മടിയില്‍ നിന്ന് ഒരു കുഞ്ഞിനെ ഇത് തട്ടിയെടുത്തു. നിരവധി പേര്‍ക്ക് ഇതിന്‍റെ ആക്രമണത്തില്‍ പരിക്കേറ്റു.
അഞ്ച് ജില്ലകളില്‍ നിന്നുള്ള വനംവകുപ്പ് ഉദ്യോഗസ്ഥരാണ് ആക്രമണകാരിയായ ഈ ചെന്നായയെ പിടികൂടാന്‍ രംഗത്ത് ഉണ്ടായിരുന്നത്. 200ഓളം ഉദ്യോഗസ്ഥരാണ് ഇതിന് വേണ്ടി ദിവസങ്ങളായി ഊണും ഉറക്കവും ഉപേക്ഷിച്ച് നിലകൊണ്ടത്. ഒടുവില്‍ വനം വകുപ്പ് സ്ഥാപിച്ച കൂട്ടില്‍ ചെന്നായ അകപ്പെടുകയായിരുന്നു.