ന്യൂഡൽഹി : ഇലക്‌ടറൽ ബോണ്ട് സംബന്ധിച്ച വിശദാംശങ്ങൾ വെളിപ്പെടുത്താൻ ജൂൺ 30 വരെ സമയം നീട്ടി നൽകണമെന്ന സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ)യുടെ അപേക്ഷ സുപ്രീം കോടതി നാളെ (11-03-2024) പരിഗണിക്കും. (Supreme Court will hear the application of SBI seeking extension till June 30 to disclose details of electoral bond scheme). രാഷ്‌ട്രീയ പാർട്ടികൾക്ക് ഇലക്‌ടറല്‍ ബോണ്ട് വഴി നൽകിയ സംഭാവനകളുടെ വിശദാംശങ്ങൾ മാര്‍ച്ച് 6 ന് ഉള്ളില്‍ ഇലക്ഷന്‍ കമ്മീഷന് മുന്നില്‍ സമര്‍പ്പിക്കാനായിരുന്നു കോടതി ഉത്തരവ്.
സുപ്രീം കോടതി നിർദ്ദേശം മനഃപൂർവം ലംഘിച്ചുവെന്ന് കാട്ടി എസ്ബിഐക്കെതിരെ കോടതിയലക്ഷ്യ നടപടി സ്വീകരിക്കണമെന്ന് ആവശ്യപ്പെട്ടുള്ള ഹര്‍ജി പ്രത്യേക അഞ്ചംഗ ഭരണഘടനാ ബെഞ്ച് പരിഗണിക്കും. ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ ബെഞ്ചില്‍ ജസ്റ്റിസുമാരായ സഞ്ജീവ് ഖന്ന, ബി ആർ ഗവായ്, ജെ ബി പർദിവാല, മനോജ് മിശ്ര എന്നിവര്‍ ചേര്‍ന്നാണ് രാവിലെ 10.30 ന് ഹർജികള്‍ കേൾക്കുക.
ഫെബ്രുവരി 15-ന് ആണ് അജ്ഞാത രാഷ്‌ട്രീയ ധനസഹായം അനുവദിക്കുന്ന കേന്ദ്രത്തിന്‍റെ ഇലക്‌ടറൽ ബോണ്ട് പദ്ധതി അഞ്ചംഗ ഭരണഘടനാ ബെഞ്ച് റദ്ദാക്കിയത്. പദ്ധതി ഭരണഘടനാ വിരുദ്ധമാണെന്ന് ചൂണ്ടിക്കാട്ടിയാണ് സുപ്രീം കോടതി റദ്ദാക്കിയത്. 2019 ഏപ്രിൽ 12 മുതൽ നാളിതുവരെ സ്വീകരിച്ച ഇലക്‌ടറൽ ബോണ്ടുകളുടെ വിശദാംശങ്ങൾ മാർച്ച് 6-നകം സമർപ്പിക്കാനും മാർച്ച് 13-നകം ഔദ്യോഗിക വെബ്സൈറ്റിൽ വിവരങ്ങൾ പ്രസിദ്ധീകരിക്കാനും കോടതി ഉത്തരവിട്ടിരുന്നു.
എന്നാല്‍ വിവര ശേഖരണത്തിന്‍റെ സാങ്കേതികത ചൂണ്ടിക്കാട്ടി, വിശദാംശങ്ങള്‍ സമര്‍പ്പിക്കാന്‍ ജൂൺ 30 വരെ സമയം നീട്ടിത്തരണമെന്ന് എസ്ബിഐ സുപ്രീം കോടതിയോട് ആവശ്യപ്പെടുകയായിരുന്നു. പണം നല്‍കുന്നവരുടെ ഐഡന്‍റിറ്റി രഹസ്യമായി സൂക്ഷിക്കാന്‍ സ്വീകരിച്ച കർശന നടപടികൾ മൂലം വിശദാംശങ്ങള്‍ ഡീക്കോഡ് ചെയ്‌ത് എടുക്കുന്നത് സങ്കീർണ്ണമായ പ്രക്രിയാണ് എന്നാണ് എസ്ബിഐയുടെ വാദം.