തെലങ്കാനയിൽ സൂര്യാഘാതത്തില്‍ രണ്ട് മരണം ; ഉയർന്ന താപനില 44.7 ഡിഗ്രി സെൽഷ്യസ് - Two died in sunstroke in Telangana

44.7 ഡിഗ്രി സെൽഷ്യസാണ് തെലങ്കാനയിൽ രേഖപ്പെടുത്തിയ ഉയർന്ന താപനില. വിവിധ ജില്ലകളിൽ ആലിപ്പഴ വർഷത്തിന് സാധ്യതയുണ്ടെന്ന് മുന്നറിയിപ്പ്

ഹൈദരാബാദ് :തെലങ്കാനയിൽചൂട് കനക്കുന്നു. സൂര്യാഘാതമേറ്റ് രണ്ടുപേർ മരിച്ചു. കരിംനഗർ സ്വദേശി ചിത്‌ല രാമക്ക (78), സൂര്യപേട്ട് സ്വദേശി സംഗം സുന്ദരയ്യ (70) എന്നിവരാണ് മരിച്ചത്. സംസ്ഥാനത്തെ ഒമ്പത് ജില്ലകളിൽ ഇന്നലെ (ഏപ്രിൽ 16) ഉയർന്ന താപനില രേഖപ്പെടുത്തി. ഭദ്രാചലത്താണ് സംസ്ഥാനത്തെ ഏറ്റവും ഉയർന്ന താപനില രേഖപ്പെടുത്തിയത്.

44.7 ഡിഗ്രി സെൽഷ്യസാണ് താപനില. നൽഗൊണ്ട, ജഗ്‌തിയാൽ, രാജന്ന സിറിസില്ല, മഹബൂബാബാദ് എന്നിവിടങ്ങളിൽ 44.5 ഡിഗ്രിക്ക് മുകളിലാണ് താപനില. ഖമ്മത്ത് സാധാരണ താപനിലയേക്കാൾ 5.1 ഡിഗ്രി സെൽഷ്യസ് വർധിച്ചതായും ആലിപ്പഴ വർഷം ഉണ്ടായതായും കാലാവസ്ഥാനിരീക്ഷണ കേന്ദ്രം അറിയിച്ചു. സംസ്ഥാനത്തിന്‍റെ വിവിധയിടങ്ങളിൽ ഇന്നും നാളെയുമായി (ഏപ്രിൽ 17,18) ആലിപ്പഴ വർഷം ഉണ്ടാവാനിടയുള്ളതായി മുന്നറിയിപ്പ് നൽകിയിട്ടുണ്ട്.

സംസ്ഥാനത്ത് ഇത്തവണ വേനല്‍ച്ചൂട് കനക്കുമെന്ന് റിപ്പോര്‍ട്ടുകളുണ്ടായിരുന്നു. നിരവധി ജില്ലകളിൽ ഉഷ്‌ണ തരംഗത്തിന് സാധ്യതയുള്ളതിനാൽ ജാഗ്രത പാലിക്കണമെന്ന് മുന്നറിയിപ്പ് നൽകിയിരുന്നു. മെയ്‌ വരെ ഉയര്‍ന്ന താപനിലയായിരിക്കും അനുഭവപ്പെടുകയെന്നും ഇന്ത്യൻ കാലാവസ്ഥ വകുപ്പ് മുമ്പ് അറിയിച്ചിരുന്നു.