परभणी - मागील पाच दिवसांपासून परभणी जिल्ह्यात सातत्याने कोरोनाचे रुग्ण आढळून येत आहेत. मंगळवारी (दि. 30 जून) तीन रुग्ण आढळून आल्यानंतर आज बुधवारीदेखील (दि. 1 जुलै) जिल्ह्यात 3 कोरोनाबाधित रुग्ण आढळून आले आहेत. या 3 रुग्णांसह जिल्ह्यातील एकूण किरोनाबधितांची संख्या आता 118 एवढी झाली आहे. त्यातील 91 जणांची बरे झाल्याने सुट्टी झाली असून, 4 जणांचा मृत्यू झाला आहे. तर उर्वरित 23 जणांवर रुग्णालयात उपचार सुरू आहेत.
गेल्या आठवड्यापासून कोरोनाबाधितांच्या संख्येत दिवसेंदिवस वाढ होत आहे. बुधवारी (दि. 1 जुलै) सकाळी सोनपेठ येथे नोकरीस असलेल्या व परभणीतील ममता कॉलनी येथे वास्तव्यास असलेल्या 44 वर्षीय पुरुष रुग्णाचा अहवाल पॉझिटीव्ह आला आहे. या प्रमाणेच पाथरी येथील आनंद नगर येथे राहणाऱ्या 29 वर्षीय पुरुष रुग्णाचा कोरोना अहवाल पॉझिटिव्ह आढळला आहे. तसेच परभणी शहरातील रामकृष्ण नगरात राहणाऱ्या एका युवती कोरोना अहवाल देखील पॉझिटीव्ह आला आहे. ही युवती यापूर्वी रामकृष्ण नगरातच यापूर्वी कोरोना पॉझिटिव्ह आढळून आलेल्या डॉक्टरच्या रुग्णाची हाय रिस्क कॉन्टॅक्ट आहे.