लखनऊ- राज्याचे माजी मुख्यमंत्री आणि समाजवादी पक्षाचे नेते मुलायमसिंह यादव हे कोरोनामधून बरे झालेत. मेदांता रुग्णालयात त्यांच्यावर उपचार सुरू होते. मुलायमसिंह यादव आता पूर्णपणे बरे झाले असुन ते घरी विश्रांती घेणार असल्याचे समाजवादी पक्षाचे प्रमुख अखिलेश यादव यांनी सांगितले.
मुलायमसिंग यादव यांचा रिपोर्ट कोरोना पॉझिटिव्ह आल्यानंतर त्यांना मेदांता रुग्णालयात दाखल करण्यात आले होते. काही दिवसांपूर्वी रुग्णालयातून त्यांचा एक फोटो समोर आला होता. त्यानंतर त्यांच्या हितचिंतकांनी त्यांच्या प्रकृतीसाठी प्रार्थना केली होती.
विरोधी उमेदवारांच्या अडचणीत वाढ
मुलायमसिंह यादव कोरोनासारख्या रोगाला पराभूत करून घरी परतले आहेत. दोन आठवड्यांहून अधिक काळ मेदांता रुग्णालयात घालवल्यानंतर ते घरी परतले आहेत. मुलायमसिंह यादव परत आल्यानंतर सपा समर्थकांमध्ये जल्लोषाचे वातावरण आहे. उत्तर प्रदेशात सात विधानसभा जागांवर पोटनिवडणूक घेण्यात येत असून यामध्ये सपाचे मुलायमसिंह यादव यांना अखिलेश यादव यांनी पक्षाचे स्टार प्रचारक बनवले आहे.