പനാജി: ഇന്ത്യന്‍ സൂപ്പര്‍ ലീഗില്‍ ഇനി ഇരട്ട പോരാട്ടങ്ങള്‍ അരങ്ങ് തകര്‍ക്കും. ഞായറാഴ്‌ച വൈകീട്ട് അഞ്ച് മണിക്ക് നോര്‍ത്ത് ഈസ്റ്റ് യുണൈറ്റഡും ഒഡീഷ എഫ്‌സിയും തമ്മിലുള്ള മത്സരത്തോടെയാണ് ഞായറാഴ്‌ച കാഴ്‌ചകള്‍ക്ക് തുടക്കമാകുക. ദുര്‍ബലരായ ഒഡീഷക്കെതിരെ ജയിച്ച് മുന്നേറാനാകുമെന്ന പ്രതീക്ഷയിലാണ് ഇടക്കാല പരീശീലകന്‍ ഖാലിദ് ജമീലിന്‍റെ ശിഷ്യന്‍മാര്‍ നാളെ ബൂട്ടുകെട്ടുക.
ജയിച്ചാല്‍ പട്ടികയില്‍ മൂന്നാം സ്ഥാനത്തേക്കുയരുന്ന നോര്‍ത്ത് ഈസ്റ്റിന്‍റെ പ്ലേ ഓഫ് പ്രതീക്ഷകള്‍ കൂടുതല്‍ സജീവമാകും. ലീഗില്‍ നാല് മത്സരങ്ങള്‍ ശേഷിക്കുന്ന നോര്‍ത്ത് ഈസ്റ്റ് തുടര്‍ച്ചയായ നാല് മത്സരങ്ങളില്‍ പരാജയം അറിയാതെ മുന്നേറുകയാണ്. ഹൈദരാബാദ് എഫ്‌സി ലീഗിലെ അവസാന മത്സരത്തില്‍ നോര്‍ത്ത് ഈസ്റ്റ് യുണൈറ്റഡിനെ സമനിലയില്‍ തളച്ചതിന്‍റെ ക്ഷീണം ഇത്തവണ തീര്‍ക്കാമെന്ന പ്രതീക്ഷയിലാണ് നോര്‍ത്ത് ഈസ്റ്റ്.
മറുഭാഗത്ത് പുതിയ പരിശീലകന്‍റെ കീഴില്‍ ഏറെ പ്രതീക്ഷയോടെയാണ് ഒഡീഷ എഫ്‌സിയുടെ മുന്നേറ്റം. ജെറി പൈറ്റണ് കീഴില്‍ മൂന്നാമത്തെ പോരാട്ടത്തിന് ഇറങ്ങുന്ന ഒഡീഷ കഴിഞ്ഞ മത്സരത്തില്‍ കേരളാ ബ്ലാസ്റ്റേഴ്‌സിനെതിരെ സമനില സ്വന്തമാക്കിയുന്നു. ഇരു ടീമുകളും രണ്ട് വീതം ഗോള്‍ അടിച്ച് പിരിഞ്ഞ മത്സരത്തില്‍ ഒഡീഷക്ക് വേണ്ടി ഡിയേഗോ മൗറിഷ്യോ ഇരട്ട ഗോള്‍ സ്വന്തമാക്കിയിരുന്നു.