ದಾವಣಗೆರೆ : ಸುತ್ತಲೂ ಹಸಿರು ಹೊದಿಕೆ, ಮಧ್ಯೆ ಪುಟ್ಟ ಹಳ್ಳಿ, ಗುಡ್ಡಗಾಡು ಕಾನನದ ನಡುವೆ ಜುಳು ಜುಳು ಜಲಪಾತಗಳು ಸೃಷ್ಟಿ ಆಗಿವೆ. ಅದು ದಾವಣಗೆರೆ ಜಿಲ್ಲೆಯ ಏಕೈಕ ಜಲಧಾರೆ. ಇದೀಗ ತನ್ನತ್ತ ಪ್ರವಾಸಿಗರನ್ನು ಕೈಬೀಸಿ ಕರೆಯುತ್ತಿದೆ. ಮಲೆನಾಡಿನ ಹೆಬ್ಬಾಗಿಲು ಮಲೇಬೆನ್ನೂರಿನ ಕೊಮರನಹಳ್ಳಿ ಬಳಿ ಮಳೆ ಆಗ್ತಿರುವ ಕಾರಣ ಅಕಾಲಿಕ ಜಲಪಾತಗಳು ಸೃಷ್ಟಿ ಆಗಿವೆ. ಮಳೆಗಾಲದಲ್ಲಿ ಮಾತ್ರ ಸೃಷ್ಟಿಯಾಗುವ ಈ 'ಮಿಂಚೋಳಿ ಫಾಲ್ಸ್' ಭೋರ್ಗರೆಯುತ್ತಾ ದುಮ್ಮುಕ್ಕುತ್ತಿದ್ದು, ಜಲಪಾತದ ನಿನಾದ ಪ್ರವಾಸಿಗರನ್ನ ತನ್ನತ್ತ ಸೆಳೆಯುತ್ತಿದೆ.
ಮಲೆನಾಡಿನ ಹೆಬ್ಬಾಗಿಲು ಮಲೇಬೆನ್ನೂರಿನ ಮಿಂಚೋಳಿ ಫಾಲ್ಸ್ : ಮಲೆನಾಡಿನ ಹೆಬ್ಬಾಗಿಲು ಮಲೇಬೆನ್ನೂರು ಪಟ್ಟಣದ ಕಾನನದ ನಡುವೆ 'ಮಿಂಚೋಳಿ ಫಾಲ್ಸ್' ಸೃಷ್ಟಿಯಾಗಿದೆ. ದಾವಣಗೆರೆ ಜಿಲ್ಲೆಯ ಹರಿಹರ ತಾಲೂಕಿನ ಮಲೇಬೆನ್ನೂರು ಪಟ್ಟಣದ ಹಚ್ಚಹಸಿರಿನ ಹೊದಿಕೆ ಹೊತ್ತ ಅರಣ್ಯ ಪ್ರದೇಶದ ಬಂಡೆಗಳ ನಡುವೆ ಹರಿಯುತ್ತಿರುವ 'ಮಿಂಚೋಳಿ ಫಾಲ್ಸ್' ನ್ನು ಕಣ್ತುಂಬಿಕೊಳ್ಳಲು ಪ್ರವಾಸಿಗರು ದಾಂಗುಡಿ ಇಡುತ್ತಿದ್ದಾರೆ.
ಗುಡ್ಡಗಾಡು ಪ್ರದೇಶದಿಂದ ಸರಿಸುಮಾರು 25 ಕಿ ಮೀ ದೂರದಿಂದ ಹರಿದುಬಂದು ಕಲ್ಲುಗಳ ಮಧ್ಯೆ ನೀರು ಧುಮ್ಮಿಕ್ಕುವ ದೃಶ್ಯ ಮನಸ್ಸಿಗೆ ಮುದ ನೀಡುತ್ತದೆ. ಈ ಜಲಧಾರೆ ಪ್ರವಾಸಿಗರ ಮನಸ್ಸಿಗೆ ಆಹ್ಲಾದ ಮತ್ತು ಸಂಭ್ರಮವನ್ನು ಮೊಗೆ ಮೊಗೆದು ಕೊಡುತ್ತಿದೆ. ಈ ಜಲಪಾತದಲ್ಲಿ ಪ್ರತಿ ಮಳೆಗಾಲದಲ್ಲಿ ನೀರು ಧುಮ್ಮಿಕ್ಕುವ ಕಾರಣ 'ಮಿಂಚೋಳಿ ಫಾಲ್ಸ್' ಎಂಬ ಹೆಸರು ಬಂದಿದೆ. ಪ್ರಕೃತಿಯ ನಡುವೆ ಭೋರ್ಗರೆಯುತ್ತಾ ದುಮ್ಮಿಕ್ಕುತ್ತಿರುವ ಜಲಪಾತದ ದೃಶ್ಯ ಕಾವ್ಯವನ್ನ ವರ್ಣಿಸಲು ಪದಪುಂಜಗಳೇ ಸಾಲದು ಎಂದು ಇಲ್ಲಿಗೆ ಭೇಟಿ ನೀಡಿದ ಪ್ರವಾಸಿಗರು ಹೇಳುತ್ತಿದ್ದಾರೆ.
'ಮಿಂಚೋಳಿ' ಫಾಲ್ಸ್ಗೆ ಭೇಟಿ ನೀಡಲು ಹೋಗುವುದು ಹೇಗೆ ? : ದಾವಣಗೆರೆ ಜಿಲ್ಲೆಯ ಏಕೈಕ ಫಾಲ್ಸ್ ಆಗಿರುವ ಮಿಂಚೋಳಿ ಫಾಲ್ಸ್ ಪ್ರವಾಸಿಗರನ್ನು ಆಕರ್ಷಿಸುತ್ತಿದೆ. ಇಲ್ಲಿ ಸಾಕಷ್ಟು ಪ್ರವಾಸಿಗರು ವೀಕ್ ಎಂಡ್ನಲ್ಲಿ ಭೇಟಿ ನೀಡುತ್ತಿದ್ದಾರೆ. ಇಲ್ಲಿಗೆ ಭೇಟಿ ನೀಡುವವರು ಸ್ವಂತ ವಾಹನದಲ್ಲಿ ದಾವಣಗೆರೆ ಜಿಲ್ಲೆಯ ಹರಿಹರ ನಗರದ ಶಿವಮೊಗ್ಗ ರಸ್ತೆಯ ಮೂಲಕ ಸಂಚರಿಸಿ ಮಲೇಬೆನ್ನೂರು, ಬಳಿಕ ಕುಮಾರಹಳ್ಳಿ ದಾಟಿದ ತಕ್ಷಣ ಘಾಟ್ ಸೆಕ್ಷನ್ ಆರಂಭದ ಎರಡನೇ ತಿರುವಿನ ಬಲ ಭಾಗದಲ್ಲಿ ಇಳಿದ್ರೆ ಈ ಫಾಲ್ಸ್ ಸಿಗುತ್ತದೆ.
ಬಸ್ ಮೂಲಕ ಇಲ್ಲಿಗೆ ಬರುವವರು ಹರಿಹರದಿಂದ ಬಸ್ ಹಿಡಿದು ಕುಮಾರನಹಳ್ಳಿ ಘಾಟ್ ಸೆಕ್ಷನ್ ಬಳಿ ಬಸ್ ಇಳಿದು, ಸ್ವಲ್ಪ ದೂರ ಕ್ರಮಿಸಿ ಈ ಫಾಲ್ಸ್ ತಲುಪಬಹುದಾಗಿದೆ. ಸ್ವಂತ ವಾಹನ ಇದ್ದರೆ ಒಳ್ಳೆಯದು. ರಸ್ತೆಯಲ್ಲಿ ನಿಲ್ಲಿಸಿ ಸ್ವಲ್ಪ ದೂರ ಕ್ರಮಿಸುವುದು ಸೂಕ್ತ. ಕಿರಿದಾದ ದಾರಿ ಇರುವ ಕಾರಣ ಫಾಲ್ಸ್ ಬಳಿ ವಾಹನ ಹೋಗುವುದಿಲ್ಲ. ಹೀಗಾಗಿ ರಸ್ತೆಯಲ್ಲಿ ನಿಲ್ಲಿಸಿ ತೆರಳಬಹುದು.