ಬೆಳಗಾವಿ: ಹೋಳಿ ಹುಣ್ಣಿಮೆಗೆ ಕುಂದಾನಗರಿ ಸಜ್ಜುಗೊಂಡಿದ್ದು, ಬಣ್ಣದೋಕುಳಿಯಲ್ಲಿ ಮಿಂದೆಳಲು ಜನರು ಕಾತುರರಾಗಿದ್ದಾರೆ. ಇನ್ನು ಬಗೆಬಗೆಯ ಬಣ್ಣ, ಪಿಚಕಾರಿಗಳು ಮಾರುಕಟ್ಟೆಗೆ ಲಗ್ಗೆ ಇಟ್ಟಿವೆ. ಆದರೆ, ವ್ಯಾಪಾರದಲ್ಲಿ ಮಾತ್ರ ನೀರಸ ಪ್ರತಿಕ್ರಿಯೆ ಕಂಡು ಬಂದಿದೆ. ಹೌದು, ಬೆಳಗಾವಿಯಲ್ಲಿ ಪ್ರತಿ ಹಬ್ಬವನ್ನು ಅದ್ಧೂರಿಯಾಗಿ ಆಚರಿಸಲಾಗುತ್ತದೆ. ಸೋಮವಾರ ಹೋಳಿ ಹಬ್ಬ ಬಂದಿರುವ ಹಿನ್ನೆಲೆಯಲ್ಲಿ ಭಾನುವಾರ ನಗರದ ಗಣಪತ ಗಲ್ಲಿ, ರವಿವಾರ ಪೇಟೆ, ಖಡೇಬಜಾರ್ ಸೇರಿ ಮುಂತಾದ ಕಡೆ ಅಂಗಡಿಗಳಲ್ಲಿ ಯುದ್ಧವಿಮಾನ, ರಾಕೆಟ್, ತಲವಾರ್, ಡ್ರ್ಯಾಗನ್, ಪಿಸ್ತೂಲ್ ಸೇರಿ ಮಾರುಕಟ್ಟೆಯಲ್ಲಿ ನಾನಾ ನಮೂನೆಯ ಪಿಚಕಾರಿಗಳು, ಮಕ್ಕಳು ಮತ್ತು ಯುವಕರು ಬಳಸುವ ಮುಖವಾಡಗಳನ್ನು ಮಾರಾಟಕ್ಕೆ ಇರಿಸಲಾಗಿದೆ.
ಇವು ಒಂದಕ್ಕಿಂತ ಒಂದು ವಿಶಿಷ್ಟವಾಗಿವೆ. ಆದರೆ, ವ್ಯಾಪಾರ ಮಾತ್ರ ಹೆಚ್ಚಿರಲಿಲ್ಲ. ಪಿಚಕಾರಿಗಳ ದರ 20 ರೂ ಯಿಂದ 1,350 ರೂ. ವರೆಗೆ ಇದ್ದರೆ, ಮುಖವಾಡಗಳು 100 ರಿಂದ 250 ರೂ.ಗೆ ಹಾಗೂ 10 ರಿಂದ 40 ರೂ. ವರೆಗೆ ಒಂದು ಬಣ್ಣದ ಪಾಕೆಟ್ ಮಾರಾಟ ಮಾಡಲಾಗುತ್ತಿದೆ. ಪ್ರತಿವರ್ಷ ಹೋಳಿ ಹುಣ್ಣಿಮೆಯಲ್ಲಿ ಖರೀದಿ ಭರಾಟೆ ಜೋರಾಗಿರುತ್ತಿತ್ತು. ಗ್ರಾಹಕರು ಖರೀದಿಗೆ ಮುಗಿಬೀಳುತ್ತಿದ್ದರು. ಆದರೆ, ಮಾರ್ಚ್‌ 25ರಂದು ಎಸ್ಸೆಸ್ಸೆಲ್ಸಿ ಸೇರಿದಂತೆ ವಿವಿಧ ತರಗತಿಗಳ ಪರೀಕ್ಷೆಗಳಿವೆ. ಅಲ್ಲದೇ ಮೊದಲೇ ಭೀಕರ ಬರವಿದೆ. ಆದ್ದರಿಂದ ಇವು ಈ ಬಾರಿಯ ಬಣ್ಣದ ಹಬ್ಬದ ಮೇಲೆ ಪರಿಣಾಮ ಬೀರಿದೆ. ಈ ಬಗ್ಗೆ ಮಾತನಾಡಿದ ವ್ಯಾಪಾರಿಗಳಾದ ಪ್ರಕಾಶ ಮತ್ತು ಸೂರಜ್, ಬಗೆ ಬಗೆಯ ಬಣ್ಣ, ಪಿಚಕಾರಿಗಳನ್ನು ಮಾರಾಟಕ್ಕೆ ತಂದಿಟ್ಟಿದ್ದೇವೆ. ಆದರೆ, ನಿರೀಕ್ಷೆಯಷ್ಟು ವ್ಯಾಪಾರ ಆಗುತ್ತಿಲ್ಲ. ಇಂದಿನ ಮಕ್ಕಳಿಗೆ ಹಬ್ಬ, ಹರಿದಿನಗಳ ಬಗ್ಗೆ ಗೊತ್ತೆ ಇಲ್ಲ. ಬರೀ ಮೊಬೈಲ್ ಗೇಮ್ ಆಡುತ್ತಿದ್ದಾರೆ ಎಂದು ಬೇಸರ ಹೊರ ಹಾಕಿದರು.