ಬೆಂಗಳೂರು: ರಾಜ್ಯ ಸರ್ಕಾರವು ತನ್ನದೇ ವ್ಯಾಪ್ತಿಯ ವಿವಿಧ ಇಲಾಖೆ ಮತ್ತು ಉದ್ಯಮಗಳಿಗೆ ನೀಡಿದ ಸಾಲವನ್ನು ವಸೂಲಿ ಮಾಡುವಲ್ಲಿ ವಿಫಲವಾಗಿದ್ದು, 10 ಸಾವಿರ ಕೋಟಿ ರೂ.ನಷ್ಟು ಸಾಲ ವಸೂಲಿ ಮಾಡಿಲ್ಲ ಎಂದು ಮಹಾಲೆಕ್ಕಪರಿಶೋಧಕರ ವರದಿ (ಸಿಎಜಿ) ತಿಳಿಸಿದೆ. ವಿಧಾನಸಭೆಯಲ್ಲಿಂದು ಮುಖ್ಯಮಂತ್ರಿಗಳ ಪರವಾಗಿ ಗೃಹ ಸಚಿವ ಡಾ.ಜಿ.ಪರಮೇಶ್ವರ್‌ ಅವರು 2022-23ನೇ ಹಣಕಾಸು ವರ್ಷದ ಹಣಕಾಸು ಖಾತೆಗಳ ಸಿಎಜಿ ವರದಿ ಮಂಡಿಸಿದರು.
ವಿವಿಧ ಇಲಾಖೆಗಳ ಮತ್ತು ಉದ್ಯಮಗಳಿಂದ 10 ಸಾವಿರ ಕೋಟಿ ರೂ. ನಷ್ಟು ಸಾಲ ವಸೂಲಿ ಮಾಡಬೇಕಿದೆ. ಈ ಪೈಕಿ 1977ರಿಂದಲೂ ಹಲವು ಇಲಾಖೆಗಳು ಅಸಲನ್ನೇ ನೀಡಿಲ್ಲ ಎಂದು ಉಲ್ಲೇಖಿಸಲಾಗಿದೆ. ಎಂಟು ಇಲಾಖೆಗಳನ್ನು (21 ಸಾಲ ಪಡೆದ ಘಟಕಗಳು) ಒಳಗೊಂಡಿರುವ 10,380 ಕೋಟಿ ರೂ.ಗಳಷ್ಟು ಹಳೆಯ ಸಾಲಗಳಿಗೆ ಸಂಬಂಧಿಸಿದಂತೆ ಕಳೆದ ಹಲವಾರು ವರ್ಷಗಳಲ್ಲಿ ಅಸಲು ವಸೂಲಾತಿ ಮಾಡಲಾಗಿಲ್ಲ, ಇದರಲ್ಲಿ 1977 ರಿಂದ ಬಾಕಿ ಉಳಿದಿರುವ ಸಾಲಗಳು ಸೇರಿವೆ. ಸರ್ಕಾರಕ್ಕೆ 10,380 ಕೋಟಿ ರೂ. ಸಾಲ ವಸೂಲಿಯಾಗಬೇಕಿದೆ. ಸಾಲ ವಸೂಲಿ ಬಾಕಿ ಇದ್ದು, ವಿವಿಧ ಇಲಾಖೆಗಳು, ಸರ್ಕಾರಿ ಸ್ವಾಮ್ಯದ ಸಂಸ್ಥೆಗಳಿಂದ ಬರಬೇಕಿದೆ ಎಂದು ವರದಿ ತಿಳಿಸಿದೆ.