ಕೌಟುಂಬಿಕ ಕಲಹ: ಹಾಸನದಲ್ಲಿ ಇಂಜಿನಿಯರ್ ಆತ್ಮಹತ್ಯೆ

ಕೌಟುಂಬಿಕ ಕಲಹ ಹಿನ್ನೆಲೆಯಲ್ಲಿ ಇಂಜಿನಿಯರ್​ವೊಬ್ಬ​ ಆತ್ಮಹತ್ಯೆ ಮಾಡಿಕೊಂಡ ಪ್ರಕರಣ ಹಾಸನ ಜಿಲ್ಲೆಯಲ್ಲಿ ನಡೆದಿದೆ.

ಹಾಸನ:ಕೌಟುಂಬಿಕ ಕಲಹದಿಂದ ಬೇಸತ್ತು ಇಂಜಿನಿಯರ್​ವೊಬ್ಬ​ ಆತ್ಮಹತ್ಯೆ ಮಾಡಿಕೊಂಡ ಘಟನೆ ತಾಲೂಕಿನ ಶೆಟ್ಟಿಹಳ್ಳಿ ಬಳಿ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಇಂದಿರಾನಗರ ಬಡಾವಣೆ ನಿವಾಸಿ ಜಿ. ಜೆ. ಪ್ರಮೋದ್ (35) ಆತ್ಮಹತ್ಯೆ ಮಾಡಿಕೊಂಡ ಇಂಜಿನಿಯರ್.

ತಮ್ಮ ಪುತ್ರ ಪ್ರಮೋದ್‌ ಹಾಗೂ ಆತನ ಪತ್ನಿ ನಂದಿನಿ ನಡುವೆ ಆಗಾಗ್ಗೆ ಸಣ್ಣಪುಟ್ಟ ಜಗಳವಾಗುತ್ತಿತ್ತು. ಜೊತೆಗೆ, ಆಕೆಯ ಸಂಬಂಧಿಕರು ಅವನಿಗೆ ಕಿರುಕುಳ ನೀಡುತ್ತಿದ್ದರು. ಇದರಿಂದ ಬೇಸತ್ತು ಮಗ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಮೃತ ಪ್ರಮೋದ್ ಕುಟುಂಬಸ್ಥರು ಆರೋಪಿಸಿದ್ದಾರೆ.

ನನ್ನ ಮಗ ಬಿಇ ಓದಿದ್ದು, ಬೆಂಗಳೂರಿನಲ್ಲಿ ಇಂಜಿನಿಯರ್ ಆಗಿ ಕೆಲಸ ಮಾಡುತ್ತಿದ್ದ. ಆತನಿಗೆ ಮದುವೆ ಮಾಡಿ 7 ವರ್ಷವಾಯ್ತು. ಮದುವೆಯಾದ ದಿನದಿಂದ ನಮ್ಮ ಸೊಸೆ ಮನೆಗೆ ಬಂದಿಲ್ಲ. ಅವನ ಮನೆಯಲ್ಲಿ ನಡೆಯುತ್ತಿದ್ದ ಸಂಸಾರದ ಕಲಹವನ್ನು ಮರ್ಯಾದೆಗೆ ಅಂಜಿ ನಮ್ಮ ಬಳಿ ಮಗ ಪ್ರಸ್ತಾಪಿಸುತ್ತಿರಲಿಲ್ಲ. ಮದುವೆಯಾದ 2ನೇ ವರ್ಷಕ್ಕೆ ನನ್ನ ಮಗನ ಮೇಲೆ ಹಲ್ಲೆ ಮಾಡಿ, ಖಾಲಿ ಪೇಪರ್​ಗೆ ಸಹಿ ಹಾಕಿಸಿಕೊಂಡಿದ್ದರು. ಈ ಬಗ್ಗೆ ಪೊಲೀಸ್ ಠಾಣೆಗೆ ದೂರು ಕೊಟ್ಟಿದ್ದೆವು. ಆಕೆ ಸಣ್ಣಪುಟ್ಟ ಕಾರಣಕ್ಕೆ ನನ್ನ ಮಗನ ಜೊತೆ ಸೊಸೆ ಜಗಳ ಮಾಡುತ್ತಿದ್ದಳು. ಇದರಿಂದ ಬೇಸತ್ತು ನನ್ನ ಮಗ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಮೃತ ಪ್ರಮೋದ್ ತಂದೆ ಜಗದೀಶ್​ ಆರೋಪ ಮಾಡಿದ್ದಾರೆ.

ಪ್ರಕರಣ ಹಿನ್ನೆಲೆ : ಡಿ.29ರಂದು ಮನೆಯಲ್ಲಿಯೇ ಮೊಬೈಲ್​ ಬಿಟ್ಟು ಹೊರ ಹೋಗಿದ್ದ ಪ್ರಮೋದ್, ತಡರಾತ್ರಿಯಾದರೂ ಬಂದಿರಲಿಲ್ಲ. ಈ ಹಿನ್ನೆಲೆಯಲ್ಲಿ ಎಲ್ಲಾ ಕಡೆ ಹುಡುಕಾಟ ನಡೆಸಿದ ಬಳಿಕ ಆತನ ಸುಳಿವು ಸಿಗದ ಕಾರಣ ನಗರದ ಬಡಾವಣೆ ಪೊಲೀಸ್ ಠಾಣೆಯಲ್ಲಿ ದೂರು ನೀಡಲಾಗಿತ್ತು. ಮೂರು ದಿನದಿಂದ ಒಂದೇ ಜಾಗದಲ್ಲಿ ನಿಂತಿದ್ದ ದ್ವಿಚಕ್ರ ವಾಹನವನ್ನು ಕಂಡ ರಾಮೇನಹಳ್ಳಿಯ ಗ್ರಾಮಸ್ಥರು, ವಾಹನದ ಡ್ಯಾಸ್ ಬೋರ್ಡ್ ತೆಗೆದು ಯಾರದೆಂದು ನೋಡಿದ್ದರು. ನಂತರ ಸ್ಥಳೀಯ ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದ್ದರು. ಇದು ಕಾಣೆಯಾದ ಪ್ರಮೋದ್ ಬೈಕ್ ಎಂಬುದನ್ನು ತಿಳಿದು ಪೊಲೀಸರು ಆತನ ಪೋಷಕರಿಗೆ ತಿಳಿಸಿದ್ದರು. ಬೈಕ್​ ಬಿಟ್ಟು ನದಿಗೆ ಹಾರಿರುವ ಅನುಮಾನ ಹಿನ್ನೆಲೆಯಲ್ಲಿ ಹುಡುಕಾಟ ನಡೆಸಲಾಗಿತ್ತು. ಬುಧವಾರ ಬೆಳಗ್ಗೆ ನದಿಯಲ್ಲಿ ಮೃತದೇಹ ಪತ್ತೆಯಾಗಿದ್ದು, ಅಗ್ನಿಶಾಮಕ ದಳದವರು ಮೃತದೇಹವನ್ನು ನದಿಯಿಂದ ಹೊರತೆಗೆದಿದ್ದಾರೆ.

ಇದನ್ನೂ ಓದಿ:ಚಾಮರಾಜನಗರ: ಮನೆಯ ಮೂವರಿಗೆ ಚಾಕು ಇರಿದ ವ್ಯಕ್ತಿ; ತಂಗಿ ಸಾವು, ಇಬ್ಬರು ಗಂಭೀರ

ಪ್ರತ್ಯೇಕ ಪ್ರಕರಣ - ಯುವಕನಿಗೆ ಚಾಕು ಇರಿದ ಮಾಜಿ ಪ್ರಿಯತಮೆ:ಕ್ಷುಲ್ಲಕ ಕಾರಣಕ್ಕೆ ಮಾಜಿ ಪ್ರಿಯಕರನಿಗೆ ಯುವತಿಯೋರ್ವಳು ಚಾಕುವಿನಿಂದ ಇರಿದ ಪ್ರಕರಣ ಹಾಸನ ನಗರದ ಬಿ.ಎಂ. ರಸ್ತೆಯಲ್ಲಿರುವ ಖಾಸಗಿ ಹೋಟೆಲ್ ಬಳಿ ಮಂಗಳವಾರ ತಡರಾತ್ರಿ ಘಟನೆ ನಡೆದಿದೆ. ಮನುಕುಮಾರ್ (25) ಚಾಕು ಇರಿತಕ್ಕೊಳಗಾದ ಯುವಕನಾಗಿದ್ದಾನೆ.

ಹಾಸನದ ಎ.ಗುಡುಗನಹಳ್ಳಿ ಗ್ರಾಮದ ಮನುಕುಮಾರ್ ಹಾಗೂ ಯುವತಿ ಜೊತೆಯಲ್ಲೇ ವಿದ್ಯಾಭ್ಯಾಸ ಮಾಡಿದ್ದರು. ಇಬ್ಬರು ಪರಸ್ಪರ ಪ್ರೀತಿಸಿದ್ದು, ಕೆಲ ದಿನಗಳಿಂದ ಸಣ್ಣ ಮನಸ್ತಾಪದಿಂದ ದೂರವಾಗಿದ್ದರು. ಹೊಸ ವರ್ಷಾಚರಣೆಗಾಗಿ ಮನುಕುಮಾರ್ ತನ್ನ ಸ್ನೇಹಿತರೊಂದಿಗೆ ಖಾಸಗಿ ಪಾರ್ಟಿಗಾಗಿ ಹೋಟೆಲ್​ಗೆ ತೆರಳಿದ್ದ. ಈ ವೇಳೆ ಹೋಟೆಲ್​ ಗೇಟ್​ ಬಳಿ ಬಂದ ಯುವತಿ ಹಾಗೂ ಯುವಕನ ನಡುವೆ ಜಗಳವಾಗಿತ್ತು. ಸ್ನೇಹಿತರು ಜಗಳ ಬಿಡಿಸಲು ಮುಂದಾಗುತ್ತಿರುವಾಗಲೇ ಯುವತಿಯು ಯುವಕನಿಗೆ ಚಾಕು ಇರಿದಿದ್ದಾಳೆ ಎಂದು ಆರೋಪಿಸಲಾಗಿದೆ.

ಗಾಯಗೊಂಡಿರುವ ಯುವಕನನ್ನು ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದ್ದು, ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. ಘಟನೆ ನಡೆದ ಸ್ಥಳಕ್ಕೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಮನುಕುಮಾರ್ ಪೋಷಕರು ಕೆ.ಆರ್. ಪುರಂ ಪೊಲೀಸ್​​ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.