ದೇವನಹಳ್ಳಿ(ಬೆಂಗಳೂರು ಗ್ರಾ.): ತನ್ನ ಕುರಿತು ಕೆಟ್ಟದಾಗಿ ಮಾತನಾಡುತ್ತಿದ್ದ ವ್ಯಕ್ತಿಗೆ ಆಕೆ ಚಪ್ಪಲಿಯಿಂದ ಹೊಡೆದು ಬುದ್ಧಿ ಕಲಿಸಿದ್ದರು. ಈ ಸೇಡಿಗೆ ಆಕೆಯ ಗಂಡನ ಕೊಲೆಗೆ ಸ್ಕೆಚ್ ಹಾಕಿದ್ದ ವ್ಯಕ್ತಿ, ಇದೀಗ ಮದ್ಯದ ನಶೆಯಲ್ಲಿ ಮತ್ತೊಬ್ಬರಿಗೆ ಚಾಕುವಿನಿಂದ ಇರಿದು ಜೈಲು ಸೇರಿದ್ದಾನೆ.
ದೇವನಹಳ್ಳಿ ಪಟ್ಟಣದ ವಿಜಯಪುರ ಸರ್ಕಲ್ನಲ್ಲಿ ಜನವರಿ 4ರ ರಾತ್ರಿ ಈ ಘಟನೆ ನಡೆದಿದೆ. ವ್ಯಕ್ತಿಯೊಬ್ಬನಿಗೆ ಚಾಕುವಿನಿಂದ ಇರಿಯುತ್ತಿರುವ ದೃಶ್ಯ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದೆ. ರವಿ ಎಂಬಾತ ಚಾಕು ಇರಿತಕ್ಕೊಳಗಾಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. ಕೊಲೆ ಯತ್ನ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಂಜುಂಡನನ್ನು ದೇವನಹಳ್ಳಿ ಪೊಲೀಸರು ಬಂಧಿಸಿದ್ದಾರೆ.
ಡಿಸಿಪಿ ವಿ.ಜೆ.ಸಜೀತ್ ಪ್ರತಿಕ್ರಿಯೆ (ETV Bharat) ಘಟನೆಯ ಹಿನ್ನೆಲೆ: ಆರೋಪಿ ನಂಜುಂಡ ಸೆಲೂನ್ ಅಂಗಡಿ ಇಟ್ಕೊಂಡಿದ್ದ. ಈತ ಮುರಳಿ ಎಂಬ ವ್ಯಕ್ತಿಯ ಹೆಂಡತಿಯ ಬಗ್ಗೆ ಊಹಾಪೋಹದ ಮಾತುಗಳನ್ನು ಆಡುತ್ತಿದ್ದ. ಇದರಿಂದ ಕೋಪಗೊಂಡ ಮುರಳಿಯ ಹೆಂಡತಿ ಚಪ್ಪಲಿಯಲ್ಲಿ ಹೊಡೆದಿದ್ದರು. ಈ ದೃಶ್ಯವನ್ನು ಮುರಳಿ ಮೊಬೈಲ್ನಲ್ಲಿ ಸೆರೆ ಹಿಡಿದು ಜನರಿಗೆ ತೋರಿಸುತ್ತಿದ್ದ. ಇದರಿಂದ ಕೆರಳಿದ ನಂಜುಂಡ ಮುರಳಿ ಕೊಲೆಗೆ ಸ್ಕೆಚ್ ಹಾಕಿದ್ದ.
ಜನವರಿ 4ರಂದು ಮುರಳಿ ಬಿಳಿ ಅಂಗಿ ಧರಿಸಿಕೊಂಡು ಬಾರ್ಗೆ ಹೋಗುವುದನ್ನು ಗಮನಿಸಿದ ನಂಜುಂಡ ತಾನೂ ಅಲ್ಲಿಗೆ ಹೋಗಿದ್ದಾನೆ. ಬಳಿಕ ಬಿಳಿ ಅಂಗಿ ಧರಿಸಿದ ವ್ಯಕ್ತಿಯೊಬ್ಬನಿಗೆ ಚಾಕುವಿನಿಂದ ಇರಿದಿದ್ದಾನೆ. ಮುಖ ನೋಡಿದಾಗ ಆತ ಮುರಳಿ ಅಲ್ಲ ಎಂಬುದು ತಿಳಿದಿದ್ದು, ಇದರಿಂದ ಬೆಚ್ಚಿದ ಆತ ಅಲ್ಲಿಂದ ಪರಾರಿಯಾಗಿದ್ದ. ಈ ಘಟನೆ ಸಂಬಂಧಿಸಿದಂತೆ ದೇವನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇದನ್ನೂ ಓದಿ:10 ತಿಂಗಳ ಬಳಿಕ ಪ್ರಿಡ್ಜ್ನಲ್ಲಿದ್ದ ಶವ ಪತ್ತೆ: ಲಿವ್ -ಇನ್ ರಿಲೇಶನ್ಶಿಪ್ನಲ್ಲಿದ್ದ ಗೆಳೆಯನಿಂದಲೇ ಪ್ರೇಯಸಿ ಕೊಲೆ
