ಚಿಕ್ಕೋಡಿ(ಬೆಳಗಾವಿ): ಕಿಲಾರಿ ಜಾತಿಯ 3 ತಿಂಗಳ ಕರುವೊಂದು (ಹೋರಿ) 1.51 ಲಕ್ಷ ರೂ.ಗೆ ಮಾರಾಟವಾಗಿ ದಾಖಲೆ ಸೃಷ್ಟಿಸಿದೆ. ಕಾಗವಾಡ ತಾಲೂಕಿನ ಕೃಷ್ಣಾ ಕಿತ್ತೂರು ಗ್ರಾಮದ ರೈತ ಅಶೋಕ ನಿಂಗಪ್ಪ ಜಂಬಗಿ ಎಂಬುವರಿಗೆ ಸೇರಿದ 95 ದಿನಗಳ ಹೋರಿ ಇದಾಗಿದೆ. ರಾಯಬಾಗ ತಾಲೂಕಿನ ಯಲ್ಪಾರಟ್ಟಿ ಗ್ರಾಮದ ರೈತ ಕರಿಯಪ್ಪ ಭರಮಪ್ಪ ಲಾಳಿ ಎಂಬುವರು ಈ ಕರುವನ್ನು ಒಂದೂವರೆ ಲಕ್ಷಕ್ಕೆ ಖರೀದಿಸಿ ಎಲ್ಲರಿಗೂ ಗುಲಾಲ್(ಬಣ್ಣ) ಹಚ್ಚಿ ಸಂಭ್ರಮಿಸಿದರು.
ಈ ಕುರಿತು ರೈತ ಅಶೋಕ ನಿಂಗಪ್ಪ ಜಂಬಗಿ ಮಾತನಾಡಿ, "ನಮ್ಮ ಅಜ್ಜ, ಮುತ್ತಜ್ಜನ ಕಾಲದಿಂದಲೂ ಕಿಲಾರಿ ಜಾತಿ ಹೋರಿಗಳನ್ನು ಸಾಕುತ್ತಾ ಬರಲಾಗಿದೆ. ಕಿಲಾರಿ ತಳಿಯು ವಿಶೇಷತೆಯಿಂದ ಕೂಡಿದ್ದು, ಈ ತಳಿಯ ಹೋರಿ ಉತ್ತಮ ಬೆಲೆಗೆ ಮಾರಾಟವಾಗುತ್ತದೆ. ಒಂದು ವರ್ಷದ ಕರು ಬರೋಬ್ಬರಿ ಐದಾರು ಲಕ್ಷ ರೂ ಬೆಲೆ ಬಾಳುತ್ತದೆ. ಸದ್ಯ ನಮ್ಮ ಬಳಿ ಜಾನುವಾರಗಳ ಸಂಖ್ಯೆ ಹೆಚ್ಚಾಗಿರುವುದರಿಂದ ಅವುಗಳ ಪೋಷಣೆ ಅಷ್ಟು ಸುಲಭವಲ್ಲ. ಹೀಗಾಗಿ ನಾವು ಚಿಕ್ಕ ವಯಸ್ಸಿಗೆ ಕರು ಮಾರಾಟ ಮಾಡಿದ್ದೇವೆ. ಕಡಿಮೆ ವಯಸ್ಸಿನ ಕರು ದೊಡ್ಡ ಮೊತ್ತಕ್ಕೆ ಮಾರಾಟವಾಗಿ ನಮ್ಮ ಕುಟುಂಬದ ಕೀರ್ತಿ ಹೆಚ್ಚಿಸಿದೆ" ಎಂದರು.