ಹೈದರಾಬಾದ್: ಸಾಧನೆಗೆ ಎಂದೂ ಕಷ್ಟಗಳು ಅಡ್ಡಿಯಾಗದು ಎಂಬುದನ್ನು ಮತ್ತೊಮ್ಮೆ ಸಾಬೀತು ಪಡಿಸಿದ ಆಟಗಾರ್ತಿ ವೈಷ್ಣವಿ. ಆರ್ಥಿಕ ಮುಗ್ಗಟ್ಟಿನ ನಡುವೆ ತನ್ನ ಬದ್ಧತೆ ಮತ್ತು ಸಮರ್ಪಣಾ ಮನೋಭಾವದಿಂದ ಜಗತ್ತು ತಿರುಗು ನೋಡುವಂತೆ ಮಾಡಿದ್ದಾರೆ. ಇತ್ತೀಚಿಗೆ ನಡೆದ ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಪವರ್ ಲಿಫ್ಟಿಂಗ್ನಲ್ಲಿ ಅಭೂತಪೂರ್ವ ಸಾಧನೆ ಮಾಡಿರುವ ವೈಷ್ಣವಿ ಅವರ ಸ್ಪೂರ್ತಿದಾಯಕ ಪಯಣ ಇಲ್ಲಿದೆ.
ಬದ್ದತೆ ಮತ್ತು ಸಮರ್ಪಣೆ ಇದ್ದರೇ ಏನಾದರೂ ಸಾಧ್ಯ ಎಂಬುದನ್ನು ಅರಿತವರು ವೈಷ್ಣವಿ. ಸಾಧಾರಣ ಕುಟುಂಬದ ಹಿನ್ನೆಲೆಯಿಂದ ಬಂದ ಈ ಯುವ ಅಥ್ಲೀಟ್ ಕನಸು ನನಸು ಮಾಡುವ ಹಾದಿಯಲ್ಲಿ ಸಿಕ್ಕಿದ್ದು, ಅನೇಕ ಸವಾಲು, ಕಷ್ಟಗಳು. ಈ ನಡುವೆ ಆಕೆಗೆ ಬೆಂಬಲವಾಗಿದ್ದು ಕುಟುಂಬ ಮತ್ತು ಕೋಚ್. ಆಕೆಯ ಮೇಲೆ ಇವರಿಟ್ಟ ಭರವಸೆಯಿಂದಾಗಿ ಇದೀಗ ಆಕೆ ಪವರ್ ಲಿಫ್ಟಿಂಗ್ನಲ್ಲಿ ಮೇರು ಸಾಧನೆ ತೋರಿದ್ದಾರೆ. ರಾಜ್ಯ ಮತ್ತು ರಾಷ್ಟ್ರ ಮಟ್ಟದಲ್ಲಿ ಇದುವರೆಗೆ 40 ಪದಕಗಳನ್ನು ಜಯಿಸಿ ಇತರರಿಗೆ ಮಾದರಿಯಾಗಿದ್ದಾರೆ ವೈಷ್ಣವಿ.
ಮೆಕಾನಿಕ್ ಮಗಳ ಸಾಧನೆ: ಸಿಕಂದ್ರಬಾದ್ನ ಗೀತಾ ಮತ್ತು ರಾಮ್ ಮಹೇಶ್ ದಂಪತಿಯ ಮಗಳು ಈ ವೈಷ್ಣವಿ. ಮೆಕಾನಿಕ್ ಆಗಿ ಮಹೇಶ್ ಕಾರ್ಯ ನಿರ್ವಹಿಸುತ್ತಿದ್ದು, ವೈಷ್ಣವಿ ಸಹೋದರ ಬಿಟೆಕ್ ಮುಗಿಸಿ ಕೆಲಸದ ಹುಡುಕಾಟದಲ್ಲಿದ್ದಾರೆ. ಈ ನಡುವೆ ಕುಟುಂಬದ ಆರ್ಥಿಕ ಸಂಕಷ್ಟಗಳುಗಳು ಸಹ ಇವರನ್ನು ಕಂಗಾಲಾಗಿಸಿದ್ದು ಸುಳ್ಳಲ್ಲ. ಆದರೆ, ಕ್ರೀಡೆಯ ಬಗ್ಗೆ ವೈಷ್ಣವಿಗೆ ಇದ್ದ ಒಲವಿನಿಂದಾಗಿ ಇವು ಆಕೆಯ ಸಾಧನೆಗೆ ಅಡ್ಡಿಯಾಗಿಲ್ಲ. ಶೈಕ್ಷಣಿಕ ಸಾಧನೆ ಜೊತೆಗೆ ಅನೇಕ ಸ್ಪರ್ಧೆಗಳಲ್ಲಿ ಇವರು ಭಾಗಿಯಾಗಿ ತಮ್ಮ ಸಾಮರ್ಥ್ಯ ಪ್ರದರ್ಶಿಸಿದ್ದಾರೆ.
ಪವರ್ ಲಿಫ್ಟಿಂಗ್ ಮಾತ್ರವೇ ವೈಷ್ಣವಿಗೆ ಮೆಚ್ಚಿನ ಕ್ರೀಡೆಯಲ್ಲ. ಇದರ ಹೊರತಾಗಿ ವೈಷ್ಣವಿ ಕಬ್ಬಡಿ, ವಾಲಿಬಾಲ್, ಖೋಖೋ, ಸಾಫ್ಟ್ಬಾಲ್ನಲ್ಲೂ ಮುಂದಿದ್ದು, ಕಾಲೇಜಿನಿಂದಲೂ ಆಕೆಗೆ ಪ್ರೋತ್ಸಾಹ ಸಿಕ್ಕಿದೆ. ಆರಂಭದಲ್ಲಿ ತಂಡದ ಆಟಗಳ ಬದಲಾಗಿ ಏಕ ಕ್ರೀಡೆಯಲ್ಲಿ ನೈಪುಣ್ಯತೆ ಪಡೆಯುವಂತೆ ವೈಷ್ಣವಿಗೆ ಸಲಹೆ ನೀಡಲಾಗಿತ್ತು. ಅದರಂತೆ ಅವರು, ಅತಿ ಹೆಚ್ಚಿನ ದೈಹಿಕ ಶ್ರಮ ಮತ್ತು ಶಿಸ್ತಿನ ಪವರ್ ಲಿಫ್ಟಿಂಗ್ ಆರಿಸಿಕೊಂಡರು.