ಅಮೆರಿಕದ ಗುಪ್ತಚರ ವಿಭಾಗಕ್ಕೆ ತುಳಸಿ ಗಬ್ಬಾರ್ಡ್ ನಿರ್ದೇಶಕಿ; ಮಹತ್ವದ ಹುದ್ದೆಗೇರಿದ ಮೊದಲ ಹಿಂದೂ ನಾಯಕಿ

ಅಮೆರಿಕದ 18 ಭದ್ರತಾ ಸಂಸ್ಥೆಗಳನ್ನು ನಿರ್ವಹಿಸುವ ರಾಷ್ಟ್ರೀಯ ಗುಪ್ತಚರ ವಿಭಾಗಕ್ಕೆ ಹಿಂದು ಮಹಿಳೆ ತುಳಸಿ ಗಬ್ಬಾರ್ಡ್​ ಅವರು ಮುಖ್ಯಸ್ಥರಾಗಿ ಅಧಿಕಾರ ವಹಿಸಿಕೊಂಡರು.

ವಾಷಿಂಗ್ಟನ್(ಅಮೆರಿಕ):ಅಮೆರಿಕದ ಸೆನೆಟರ್​​ (ಸಂಸದೆ) ತುಳಸಿ ಗಬ್ಬಾರ್ಡ್​ ಅವರು 18 ಭದ್ರತಾ ಸಂಸ್ಥೆಗಳ ಮೇಲ್ವಿಚಾರಕ ಸಂಸ್ಥೆಯಾದ 'ರಾಷ್ಟ್ರೀಯ ಗುಪ್ತಚರ ವಿಭಾಗ'ದ ನಿರ್ದೇಶಕಿಯಾಗಿ ಗುರುವಾರ ಪ್ರಮಾಣವಚನ ಸ್ವೀಕರಿಸಿದರು. ಈ ಮೂಲಕ ವಿಶ್ವದ ಅತಿ ಬಲಿಷ್ಠ ದಳದ ನೇತೃತ್ವ ವಹಿಸಿದ ಮೊದಲ ಹಿಂದು ನಾಯಕಿ ಎಂಬ ಗರಿಮೆಗೂ ಪಾತ್ರರಾದರು.

ಗುಪ್ತಚರ ದಳದ ಮುಖ್ಯಸ್ಥೆಯಾಗಿ ತುಳಸಿ ಗಬ್ಬಾರ್ಡ್​ ಅವರನ್ನು ಶ್ವೇತಭವನ ಅಂಗೀಕರಿಸಿತು. ಇದರ ಬೆನ್ನಲ್ಲೇ, ಅವರು ಅಧ್ಯಕ್ಷ ಡೊನಾಲ್ಡ್​​ ಟ್ರಂಪ್​ ಸಮ್ಮುಖದಲ್ಲಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಯುಎಸ್ ಅಟಾರ್ನಿ ಜನರಲ್ ಪ್ಯಾಮ್ ಗೊಂಡಿ ಅವರು ಇಲ್ಲಿನ ಓವಲ್ ಕಚೇರಿಯಲ್ಲಿ ಗಬ್ಬಾರ್ಡ್‌ಗೆ ಪ್ರಮಾಣ ಬೋಧಿಸಿದರು.

ತುಳಸಿ ಗಬ್ಬಾರ್ಡ್​ ಅವರನ್ನು ಅಭಿನಂದಿಸಿದ ಅಧ್ಯಕ್ಷ ಟ್ರಂಪ್​ (ANI)

ಗಬ್ಬಾರ್ಡ್ ಪ್ರಮಾಣ ಸ್ವೀಕಾರ ಕಾರ್ಯಕ್ರಮದ ವಿಡಿಯೋವನ್ನು ಶ್ವೇತಭವನ ತನ್ನ ಎಕ್ಸ್​ ಖಾತೆಯಲ್ಲಿ ಹಂಚಿಕೊಂಡಿದೆ. "ಓವಲ್ ಕಚೇರಿಯಲ್ಲಿ ಅಟಾರ್ನಿ ಜನರಲ್​​ ಪಾಮ್ ಬೋಂಡಿ ಅವರಿಂದ ತುಳಸಿ ಗಬ್ಬಾರ್ಡ್ ಅಧಿಕೃತವಾಗಿ ರಾಷ್ಟ್ರೀಯ ಗುಪ್ತಚರ ನಿರ್ದೇಶಕಿಯಾಗಿ ಪ್ರಮಾಣವಚನ ಸ್ವೀಕರಿಸಿದ್ದಾರೆ. ಅಮೆರಿಕ ಮತ್ತೆ ಸುರಕ್ಷಿತವಾಗಿರಲಿದೆ" ಎಂದು ಹೇಳಿದೆ.

ಗಬ್ಬಾರ್ಡ್​ ನೇಮಕಕ್ಕೆ ವಿರೋಧ:43 ವರ್ಷದ ತುಳಸಿ ಗಬ್ಬಾರ್ಡ್​ ಅವರನ್ನು ಕೇಂದ್ರ ಗುಪ್ತಚರ ಸಂಸ್ಥೆ (CIA), ರಾಷ್ಟ್ರೀಯ ಭದ್ರತಾ ಸಂಸ್ಥೆ (NSA) ಮತ್ತು ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (FBI) ಸೇರಿದಂತೆ 18 ಸಂಸ್ಥೆಗಳನ್ನು ಒಳಗೊಂಡಿರುವ ರಾಷ್ಟ್ರೀಯ ಗುಪ್ತಚರ ವಿಭಾಗಕ್ಕೆ ಮುಖ್ಯಸ್ಥರನ್ನಾಗಿ ನೇಮಿಸುವುದಕ್ಕೆ ವಿಪಕ್ಷ ಡೆಮಾಕ್ರಟಿಕ್​​ನಿಂದ ತೀವ್ರ ವಿರೋಧ ವ್ಯಕ್ತವಾಗಿತ್ತು.

ದೇಶದ ಭದ್ರತೆಗೆ ಸಂಬಂಧಿಸಿದಂತೆ ದೊಡ್ಡ ಹುದ್ದೆಯನ್ನು ಗಬ್ಬಾರ್ಡ್​ ಅವರು ನಿರ್ವಹಿಸಲು ಅನುಭವ ಸಾಕಾಗುವುದಿಲ್ಲ ಎಂಬುದು ಡೆಮಾಕ್ರಟಿಕ್ ಸಂಸದರ ತಕರಾರು. ಜೊತೆಗೆ, ರಿಪಬ್ಲಿಕನ್​​ನ ಓರ್ವ ಸಂಸದ ಕೂಡ ಇದಕ್ಕೆ ಸಹಮತಿಸಿದ್ದರು. ಮತ ಚಲಾವಣೆ ವೇಳೆ ಗಬ್ಬಾರ್ಡ್​ ಪರವಾಗಿ 52, ವಿರುದ್ಧ 48 ಮತಗಳು ಬಿದ್ದಿವೆ. ಬಹುಮತದ ಮೂಲಕ ಅವರನ್ನು ನಿರ್ದೇಶಕಿಯನ್ನಾಗಿ ನೇಮಿಸಲಾಗಿದೆ.

ಭದ್ರತಾ ಸಂಸ್ಥೆಯ ಚುಕ್ಕಾಣಿ ಹಿಡಿದ ಮೊದಲ ಹಿಂದು:ತುಳಸಿ ಗಬ್ಬಾರ್ಡ್​ ಅವರು ಭಾರತದ ಜೊತೆ ಯಾವುದೇ ನಂಟು ಹೊಂದಿಲ್ಲವಾದರೂ, ಹಿಂದು ಧರ್ಮವನ್ನು ಅನುಸರಿಸುತ್ತಾರೆ. ಇದನ್ನು ಅವರೇ ಸಂಸತ್ತಿನಲ್ಲಿ ಅಧಿಕೃತಗೊಳಿಸಿದ್ದರು. ಈ ಮೂಲಕ ಅಮೆರಿಕದ ಅತಿದೊಡ್ಡ ಭದ್ರತಾ ಸಂಸ್ಥೆಗೆ ಬಾಸ್​ ಆಗಿ ನೇಮಕವಾದ ಮೊದಲ ಹಿಂದು ಎಂಬ ಅಭಿದಾನಕ್ಕೂ ಪಾತ್ರವಾದರು.

ತುಳಸಿ ಗಬ್ಬಾರ್ಡ್​ ಅವರ ತಾಯಿ ಕ್ಯಾರೊಲ್ ಪೋರ್ಟರ್ ಗಬ್ಬಾರ್ಡ್ ಅವರು ಹಿಂದೂ ಧರ್ಮವನ್ನು ಅಳವಡಿಸಿಕೊಂಡಿದ್ದಾರೆ. ಅವರು ತಮ್ಮ ಮಕ್ಕಳಿಗೆ ಭಕ್ತಿ, ಜೈ, ಆರ್ಯನ್, ತುಳಸಿ ಮತ್ತು ವೃಂದಾವನ ಎಂಬ ಹಿಂದೂ ಹೆಸರನ್ನಿಟ್ಟಿದ್ದಾರೆ.

ಇದನ್ನೂ ಓದಿ:ಅಮೆರಿಕಕ್ಕೆ ಆಗಮಿಸಿದ ಮೋದಿಗೆ ಅನಿವಾಸಿ ಭಾರತೀಯರಿಂದ ಭರ್ಜರಿ ಸ್ವಾಗತ: ಇಂದು ಮಸ್ಕ್​ ಭೇಟಿ ಸಾಧ್ಯತೆ