ಊಟದಲ್ಲಿ ಹಲವು ಬಗೆಯ ಖಾದ್ಯಗಳನ್ನು ಈಗ ಮಾಡಲಾಗುತ್ತದೆ. ಚೈನೀಸ್ ಫುಡ್ ಅಂತೂ ಈಗ ಫುಲ್ ಫೇಮಸ್. ಆದರೆ, ನಮ್ಮ ಪೂರ್ವಜರು ಮಾಡುವ ಖಾದ್ಯಗಳು ಮಾತ್ರ ಎಂದಿಗೂ ರುಚಿಯಲ್ಲಿ ಟಾಪ್. ರೊಟ್ಟಿಗೆ ಪಲ್ಯದ ಜೊತೆಗೆ ಚಟ್ನಿಯಂತಹ ಸೈಡ್ಸ್ ಇದ್ದರೆ ಆಹಾ ಅದರ ಸ್ವಾದವೇ ಬೇರೆ. ಅಂತಹ ಸ್ವಾದಿಷ್ಟ ಚಟ್ನಿಗಳಲ್ಲಿ ಹಸಿಮೆಣಸಿನಕಾಯಿ ಚಟ್ನಿಯೂ ಒಂದು. ಅದನ್ನು ನೋಡಿದರೆ, ಬಾಯಲ್ಲಿ ನೀರೂರುತ್ತದೆ. ಥೇಟ್ ಹಳ್ಳಿ ಶೈಲಿಯ ಈ ಚಟ್ನಿಯನ್ನು ಮಾಡುವುದು ಹೇಗೆ, ಅದಕ್ಕೇನು ಬೇಕು ಎಂಬುದನ್ನು ತಿಳಿಯೋಣ.
ಚಟ್ನಿಯನ್ನು ರುಬ್ಬಲು ನಮಗೆ ಈಗ ಮಿಕ್ಸರ್, ಗ್ರೈಂಡರ್ಗಳ ವ್ಯವಸ್ಥೆ ಇದೆ. ಈ ಹಿಂದೆ ಕಲ್ಲಿನ ಒರಳು ಮಾತ್ರ ಲಭ್ಯವಿತ್ತು. ಅದರಲ್ಲಿ ಮಾಡಿದ ಚಟ್ನಿಯ ರುಚಿಯು ಅಮೃತಕ್ಕೆ ಸಮ. ಪೌಷ್ಟಿಕಾಂಶಗಳಿಂದ ಸಮೃದ್ಧವಾಗಿದ್ದ ಆ ಖಾದ್ಯ ಎಂದಿಗೂ ಫೇಮಸ್. ಈಗ ಇಲ್ಲಿ ವಿವರಿಸಿರುವ ಚಟ್ನಿಯೂ ಆ ಸಾಲಿಗೆ ಸೇರುತ್ತದೆ.
ಹಸಿರು ಮೆಣಸಿನಕಾಯಿ ಹುಣಸೆಹಣ್ಣಿನ ಚಟ್ನಿ ಎಂದು ಕರೆಯುವ ಇದನ್ನು, ನಮ್ಮ ಪೂರ್ವಜರು ಅಡುಗೆ ಎಣ್ಣೆ ಹಾಕದೆ, ಒಲೆ ಹಚ್ಚದೆ ತಯಾರಿಸುತ್ತಿದ್ದರು. ಅದರಲ್ಲೂ ಗದ್ದೆ ಕೆಲಸಕ್ಕೆ ಹೋಗುವವರು ಇದನ್ನೇ ಹೆಚ್ಚು ತಿನ್ನುತ್ತಿದ್ದರು. ಇದು ಕೆಲವೇ ನಿಮಿಷಗಳಲ್ಲಿ ತಯಾರಾಗುವ ಖಾದ್ಯವಾಗಿದೆ. ಈ ರುಚಿಕರವಾದ ಹಸಿರು ಚಟ್ನಿಯನ್ನು ನೀವು ಕಡಿಮೆ ಪದಾರ್ಥಗಳೊಂದಿಗೆ ಕಡಿಮೆ ಸಮಯದಲ್ಲಿ ತಯಾರಿಸಬಹುದು. ರುಚಿ ಮಾತ್ರ ಆಹಾ ಎನ್ನುಂವತಿರುತ್ತೆ.
ಚಟ್ನಿ ಮಾಡಲು ಬೇಕಾಗುವ ಪದಾರ್ಥಗಳಿವು:
- ಹಸಿರು ಮೆಣಸಿನಕಾಯಿ- 10 ರಿಂದ 12
- ಈರುಳ್ಳಿ - 1
- ಜೀರಿಗೆ - 1 ಟೀ ಸ್ಪೂನ್
- ಹುಣಸೆಹಣ್ಣು - ಸ್ವಲ್ಪ
- ಬೆಳ್ಳುಳ್ಳಿ ಎಸಳು - 10
- ಉಪ್ಪು - ರುಚಿಗೆ ತಕ್ಕಷ್ಟು
- ಕೊತ್ತಂಬರಿ ಪುಡಿ - ಸ್ವಲ್ಪ
ಈ ಚಟ್ನಿ ತಯಾರಿಸುವ ವಿಧಾನ ಹೇಗೆ?:
- ಮೊದಲನೆಯದಾಗಿ ಹಸಿರು ಮೆಣಸಿನಕಾಯಿಯ ಬದಲು ದಪ್ಪ ಚರ್ಮ ಮತ್ತು ಖಾರ ಕಡಿಮೆ ಇರುವ ಮೆಣಸಿನಕಾಯಿಯನ್ನು ಆರಿಸಿ ಸಣ್ಣಗೆ ಕತ್ತರಿಸಬೇಕು.
- ನೀವು ಸ್ಪೈಸಿ ಹೆಚ್ಚು ತಿನ್ನುವವರಾಗಿದ್ದರೆ, ಖಾರದ ಮೆಣಸಿನಕಾಯಿಗಳನ್ನು ಸೇರಿಸಿಕೊಳ್ಳಿ.
- ನಿಂಬೆ ಹಣ್ಣಿನ ಗಾತ್ರದಷ್ಟು ಹುಣಸೆಹಣ್ಣು ತೆಗೆದುಕೊಂಡು ಅದನ್ನು ಸಣ್ಣ ಬಟ್ಟಲಿನಲ್ಲಿ ನೆನೆಸಿಡಿ. ಬೆಳ್ಳುಳ್ಳಿಯನ್ನು ಸಿಪ್ಪೆ ಬಿಡಿಸಿಕೊಂಡು ಇಟ್ಟುಕೊಳ್ಳಿ.
- ಒಂದು ಈರುಳ್ಳಿ ತೆಗೆದುಕೊಂಡು ಅದನ್ನು ಐದು ಅಥವಾ ಆರು ತುಂಡುಗಳಾಗಿ ಕತ್ತರಿಸಿ.
- ಒಂದು ಚಮಚ ಜೀರಿಗೆಯನ್ನು ಮಿಕ್ಸರ್ ಅಥವಾ ಕಲ್ಲಿನ ಒರಳಿಗೆ ಹಾಕಿ ನಿಧಾನವಾಗಿ ರುಬ್ಬಿಕೊಳ್ಳಿ.
- ನಂತರ ನೆನೆಸಿಟ್ಟ ಹುಣಸೆ ಹಣ್ಣಿನ ರಸವನ್ನು ಅದಲ್ಲಿ ಹಾಕಿಕೊಂಡು ನುಣ್ಣಗೆ ರುಬ್ಬಿ.
- ಈಗ ಬೆಳ್ಳುಳ್ಳಿ ಎಸಳು ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಮಿಶ್ರಣವನ್ನು ಮತ್ತೊಮ್ಮೆ ರುಬ್ಬಿಕೊಳ್ಳಿ.
- ಅದರ ನಂತರ, ಕತ್ತರಿಸಿಕೊಂಡಿರುವ ಹಸಿರು ಮೆಣಸಿನಕಾಯಿಯನ್ನು ಸೇರಿಸಿ ರುಬ್ಬಿಕೊಳ್ಳಿ.
- ಬಳಿಕ ಕಟ್ ಮಾಡಿಟ್ಟ ಈರುಳ್ಳಿಯನ್ನು ಸೇರಿಸಿ. ಸ್ವಲ್ಪ ಹಸಿರು ಬಣ್ಣಕ್ಕೆ ಬರುವಂತೆ ರುಬ್ಬಿಕೊಳ್ಳಿ. ತೀರಾ ನುಣ್ಣಗೆ ಅಲ್ಲದೆ, ಚಿಕ್ಕ ಚಿಕ್ಕದಾಗಿ ನಾಲಿಗೆಗೆ ಸಿಗುವುದಂತೆ ರುಬ್ಬಬೇಖು. ಇದರಿಂದ ರುಚಿ ಹೆಚ್ಚುತ್ತದೆ.
- ಹೀಗೆ ಹಸಿರು ಮೆಣಸಿನಕಾಯಿಯನ್ನು ರುಬ್ಬಿದ ನಂತರ ಕೊನೆಯಲ್ಲಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿ.
- ಅಷ್ಟೇ.. ರುಚಿಕರವಾದ ಹಳ್ಳಿ ಶೈಲಿಯ ಚಟ್ನಿ ರೆಡಿಯಾಗುತ್ತದೆ.
- ಇದನ್ನು ಬಿಸಿಯಾದ ಅನ್ನಕ್ಕೆ ಹಾಕಿಕೊಂಡು ತಿನ್ನಿ, ಆಹಾ ಏನು ರುಚಿ ಎಂದು ನೀವೇ ಉದ್ಗರಿಸುತ್ತೀರಿ.
- ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ, ಕಲ್ಲಿನ ಒರಳಿನಲ್ಲಿ ಹಾಕಿ ರುಬ್ಬಿದ ಹಸಿರು ಮೆಣಸಿನಕಾಯಿ ಹುಣಸೆಹಣ್ಣಿನ ಚಟ್ನಿಯು ತುಂಬಾ ರುಚಿಕರವಾಗಿರುತ್ತದೆ.
- ನಿಮ್ಮ ಬಳಿ ಒರಳು ಇಲ್ಲವಾದಲ್ಲಿ ಮಿಕ್ಸಿಯಲ್ಲಿ ಹಾಕಿ ತೀರಾ ನುಣ್ಣಗಲ್ಲದೆ, ಸ್ವಲ್ಪ ಒರಟಾಗಿ ರುಬ್ಬಿಕೊಳ್ಳಿ.
ಇದನ್ನೂ ಓದಿ:ಮಳೆಗಾಲದಲ್ಲಿ ತಯಾರಿಸಿ ಟೊಮೆಟೊ-ಕಾಳುಮೆಣಸಿನ ರಸಂ; ಬಿಸಿ ಅನ್ನದ ಜೊತೆ ತುಂಬಾ ಟೇಸ್ಟಿ! - TOMATO PEPPER RASAM RECIPE
