ಸೆಪ್ಟೆಂಬರ್ ಒಂದೇ ತಿಂಗಳಲ್ಲಿ 87 ಸಾವಿರ ವಾಹನ ಮಾರಾಟ ಮಾಡಿದ ಮಹೀಂದ್ರಾ - Mahindra Auto Sales

ಮಹೀಂದ್ರಾ ಆ್ಯಂಡ್ ಮಹೀಂದ್ರಾ ಕಂಪನಿಯು ಸೆಪ್ಟೆಂಬರ್ ತಿಂಗಳಲ್ಲಿ 87,839 ವಾಹನಗಳನ್ನು ಮಾರಾಟ ಮಾಡಿದೆ.

ಮುಂಬೈ: ಸೆಪ್ಟೆಂಬರ್ ತಿಂಗಳಲ್ಲಿ (ವರ್ಷದಿಂದ ವರ್ಷಕ್ಕೆ) ಮಹೀಂದ್ರಾ ಆ್ಯಂಡ್ ಮಹೀಂದ್ರಾ ಕಂಪನಿಯ ವಾಹನಗಳ ಮಾರಾಟ ಶೇ.16ರಷ್ಟು ಏರಿಕೆಯಾಗಿದೆ. ಸೆಪ್ಟೆಂಬರ್ ತಿಂಗಳಲ್ಲಿ ಕಂಪನಿಯು ರಫ್ತು ಸೇರಿದಂತೆ ಒಟ್ಟು 87,839 ವಾಹನಗಳನ್ನು ಮಾರಾಟ ಮಾಡಿದೆ. ಕಂಪನಿಯು ದೇಶೀಯ ಮಾರುಕಟ್ಟೆಯಲ್ಲಿ 51,062 ಯುಟಿಲಿಟಿ ವಾಹನಗಳನ್ನು ಮಾರಾಟ ಮಾಡಿದೆ. ಇದು ಶೇಕಡಾ 24ರಷ್ಟು ಬೆಳವಣಿಗೆಯಾಗಿದೆ. ಕಂಪನಿಯ ವಾಣಿಜ್ಯ ವಾಹನಗಳ ದೇಶೀಯ ಮಾರಾಟವು 23,706ರಷ್ಟಿದೆ.

ಸೆಪ್ಟೆಂಬರ್ ತಿಂಗಳಲ್ಲಿ, ಮಹೀಂದ್ರಾ 3,027 ವಾಹನಗಳನ್ನು ರಫ್ತು ಮಾಡಿದ್ದು, ಇದು ಕಳೆದ ವರ್ಷದ 2,419 ವಾಹನಗಳಿಗೆ ಹೋಲಿಸಿದರೆ ಶೇಕಡಾ 25ರಷ್ಟು ಬೆಳವಣಿಗೆಯಾಗಿದೆ. ಈ ವರ್ಷ ಇಲ್ಲಿಯವರೆಗೆ, ಕಂಪನಿಯು 14,727 ವಾಹನಗಳನ್ನು ರಫ್ತು ಮಾಡಿದೆ. ಇದು ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಶೇಕಡಾ 3ರಷ್ಟು ಬೆಳವಣಿಗೆಯಾಗಿದೆ.

ಈ ಕುರಿತು ಮಾತನಾಡಿದ ಮಹೀಂದ್ರಾ ಲಿಮಿಟೆಡ್ ನ ಆಟೋಮೋಟಿವ್ ವಿಭಾಗದ ಅಧ್ಯಕ್ಷ ವಿಜಯ್ ನಕ್ರಾ, "ಸೆಪ್ಟೆಂಬರ್​ನಲ್ಲಿ 51,062 ಎಸ್​ಯುವಿಗಳನ್ನು ಮಾರಾಟ ಮಾಡಲಾಗಿದ್ದು, ಇದು ಶೇಕಡಾ 24ರಷ್ಟು ಬೆಳವಣಿಗೆಯಾಗಿದೆ. ಒಟ್ಟು 87,839 ವಾಹನಗಳನ್ನು ಮಾರಾಟ ಮಾಡಲಾಗಿದ್ದು, ಇದು ಶೇಕಡಾ 16 ರಷ್ಟು ಬೆಳವಣಿಗೆಯಾಗಿದೆ" ಎಂದರು.

"ಈ ತಿಂಗಳು, ನಾವು ಭಾರತದ ಮೊದಲ ಮಲ್ಟಿ-ಎನರ್ಜಿ ಮಾಡ್ಯುಲರ್ ಸಿವಿ ಪ್ಲಾಟ್ ಫಾರ್ಮ್ ಅನ್ನು ಆಧರಿಸಿ ಎಲ್ ಸಿವಿ <3.5 ಟನ್ ವಿಭಾಗದಲ್ಲಿ ಹೊಸ ವೀರೊ ಹೆಸರಿನ ವಾಹನವನ್ನು ಬಿಡುಗಡೆ ಮಾಡಿದ್ದೇವೆ" ಎಂದು ಅವರು ಹೇಳಿದರು.

"ಅತ್ಯುತ್ತಮ ದರ್ಜೆಯ ಮೈಲೇಜ್, ಅಸಾಧಾರಣ ಕಾರ್ಯಕ್ಷಮತೆ, ಉತ್ಕೃಷ್ಟ ಸುರಕ್ಷತಾ ವೈಶಿಷ್ಟ್ಯಗಳು, ಪ್ರಯಾಣಿಕರಿಗೆ ಹೆಚ್ಚುವರಿ ಸುರಕ್ಷೆ ಮತ್ತು ಪ್ರೀಮಿಯಂ ಕ್ಯಾಬಿನ್ ಅನುಭವದೊಂದಿಗೆ, ವೀರೊ ಎಲ್ಸಿವಿ <3.5 ಟನ್ ವಿಭಾಗದಲ್ಲಿ ಮುಂಚೂಣಿಯ ವಾಹನವಾಗುವ ಗುರಿಯನ್ನು ಹೊಂದಿದೆ. ನವರಾತ್ರಿ ಹಬ್ಬದ ಸಮಯದಲ್ಲಿ ಅಕ್ಟೋಬರ್ 3 ರಂದು ಬಹುನಿರೀಕ್ಷಿತ ಥಾರ್ ರಾಕ್ಸ್​ ಎಕ್ಸ್​ನ ಬುಕಿಂಗ್ ಆರಂಭಿಸಲಿದ್ದೇವೆ" ಎಂದು ನಕ್ರಾ ಹೇಳಿದರು.

ಪ್ರಯಾಣಿಕ ವಾಹನಗಳ ವಿಭಾಗದಲ್ಲಿ, ಕಂಪನಿಯು ಇಲ್ಲಿಯವರೆಗೆ 2,60,210 ವಾಹನಗಳನ್ನು ಮಾರಾಟ ಮಾಡಿದ್ದು, ಶೇಕಡಾ 21ರಷ್ಟು ಬೆಳವಣಿಗೆ ಸಾಧಿಸಿದೆ.

ಪ್ರಯಾಣಿಕ ವಾಹನ, ತ್ರಿಚಕ್ರ ವಾಹನ, ದ್ವಿಚಕ್ರ ವಾಹನ ಮತ್ತು ಕ್ವಾಡ್ರಿಸೈಕಲ್ ಗಳ ಒಟ್ಟು ಉತ್ಪಾದನೆಯು ಜುಲೈನಲ್ಲಿ 24,37,138 ಯುನಿಟ್‌ಗಳನ್ನು ತಲುಪಿದೆ. ಪ್ರಯಾಣಿಕ ವಾಹನಗಳ ಮಾರಾಟವು 3,41,510, ತ್ರಿಚಕ್ರ ವಾಹನಗಳ ಮಾರಾಟವು 59,073 ಯುನಿಟ್‌ಗಳು ಮತ್ತು ದ್ವಿಚಕ್ರ ವಾಹನಗಳ ಮಾರಾಟವು 14,41,694 ಯುನಿಟ್‌ಗೆ ತಲುಪಿದೆ.

ಇದನ್ನೂ ಓದಿ: ಕಡಿಮೆ ಬೆಲೆಗೆ ಹೆಚ್ಚು ವ್ಯಾಲಿಡಿಟಿ: BSNL ಗ್ರಾಹಕರಿಗೆ ಈ ಪ್ಲಾನ್ ಬೆಸ್ಟ್​ ಚಾಯ್ಸ್! - BSNL New Prepaid Plan