ಕ್ವಾಜಾ ಮೊಯಿನುದ್ದಿನ್ ಚಿಷ್ಟಿ ಉರುಸ್: ಅಜ್ಮೀರ್ ಶರೀಫ್ ದರ್ಗಾಕ್ಕೆ ಚಾದರ್ ಕಳುಹಿಸಿದ ಪ್ರಧಾನಿ ಮೋದಿ

ರಾಜಸ್ಥಾನದ ಅಜ್ಮೀರ್‌ ಶರೀಫ್ ದರ್ಗಾಕ್ಕೆ ಪ್ರಧಾನಿ ನರೇಂದ್ರ ಮೋದಿ ಪ್ರತೀ ವರ್ಷ ಚಾದರ್​ ಸಮರ್ಪಿಸುತ್ತಾರೆ.

ನವದೆಹಲಿ: ಅಜ್ಮೀರ್​ ದರ್ಗಾದ ಖ್ವಾಜಾ ಮೊಯಿನುದ್ದೀನ್​ ಚಿಸ್ತಿ ಅವರ ಉರುಸ್​ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಶುಭಾಶಯ ತಿಳಿಸಿದ್ದಾರೆ. ಪ್ರಧಾನಿ ಪರವಾಗಿ ಕೇಂದ್ರ ಅಲ್ಪಸಂಖ್ಯಾತ ಸಚಿವ ಕಿರಣ್​ ರಿಜಿಜು​ ಅವರು ಚಾದರ್​​ ಅನ್ನು ಅಜ್ಮೀರದ ಶರೀಫ್​ ದರ್ಗಾಕ್ಕೆ ಸಮರ್ಪಿಸಲಿದ್ದಾರೆ.

ಅಜ್ಮೀರದ ಪ್ರಸಿದ್ಧ ಸೂಫಿ ಸಂತನಿಗೆ ಪ್ರಧಾನಿ ಮೋದಿ ಪ್ರತೀ ವರ್ಷ ಚಾದರ್​ ಸಮರ್ಪಿಸುತ್ತಿದ್ದಾರೆ.

"ಖ್ವಾಜಾ ಮೊಯಿನುದ್ದೀನ್​ ಚಿಸ್ತಿ ಅವರ ಉರುಸ್​ ಶುಭಾಶಯಗಳು. ಈ ವಿಶೇಷ ಸಂದರ್ಭ ಪ್ರತಿಯೊಬ್ಬರ ಬಾಳಿನಲ್ಲಿ ಸಂತೋಷ ಮತ್ತು ನೆಮ್ಮದಿ ತರಲಿ" ಎಂದು ಅವರು ಸಾಮಾಜಿಕ ಜಾಲತಾಣದಲ್ಲಿ ಹಾರೈಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಚಾದರ್​ ಅನ್ನು ಸಚಿವ ರಿಜಿಜು ಅವರಿಗೆ ನೀಡುತ್ತಿರುವ ಫೋಟೊವನ್ನು ಸಚಿವರು ತಮ್ಮ ಎಕ್ಸ್​ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.

"ಭಾರತದ ಶ್ರೀಮಂತ ಆಧ್ಯಾತ್ಮಿಕ ಪರಂಪರೆ ಮತ್ತು ಸಾಮರಸ್ಯ ಮತ್ತು ಸಹಾನುಭೂತಿಯ ಸಂದೇಶ ಹಾಗೂ ಗೌರವವನ್ನು ಈ ನಡವಳಿಕೆ ಪ್ರತಿಬಿಂಬಿಸುತ್ತದೆ" ಎಂದು ಬರೆದುಕೊಂಡಿದ್ದಾರೆ.

ಸೂಫಿ ಸಂತರು ನಿಧನ ಹೊಂದಿದ ದಿನ ಪ್ರತೀ ವರ್ಷ ಉರುಸ್​ ಆಚರಿಸಲಾಗುತ್ತದೆ.

ಇತ್ತೀಚಿಗೆ ಸೂಫಿ ಸಂತರ ಈ ದರ್ಗಾದಲ್ಲಿ ಮೊದಲು ದೇಗುಲವಿತ್ತು. ಅದರ ಮೇಲೆ ದರ್ಗಾ ನಿರ್ಮಾಣ ಮಾಡಲಾಗಿದೆ ಎಂದು ಆರೋಪಿಸಿ ಹಿಂದೂ ಸಂಘಟನೆಯೊಂದು ಕೋರ್ಟ್​ ಮೊರೆ ಹೋಗಿತ್ತು. ಈ ರೀತಿ ಅನೇಕ ಅರ್ಜಿಗಳು ದೇಶದ ವಿವಿಧೆಡೆಯಿಂದ ಸಲ್ಲಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಇದಕ್ಕೆ ಸುಪ್ರೀಂ ಕೋರ್ಟ್​ ತಡೆ ನೀಡಿತ್ತು. (ಪಿಟಿಐ)

ಇದನ್ನೂ ಓದಿ:ಪೂಜಾ ಸ್ಥಳಗಳ ಕಾಯ್ದೆ ಅನುಷ್ಠಾನಕ್ಕೆ ಮನವಿ ಸಲ್ಲಿಸಿದ ಓವೈಸಿ : ವಿಚಾರಣೆಗೆ ಒಪ್ಪಿದ ಸುಪ್ರೀಂಕೋರ್ಟ್