ನವದೆಹಲಿ: ಕೇಂದ್ರದಲ್ಲಿ ಐಎನ್ಡಿಐಎ ಮೈತ್ರಿಕೂಟದ ಸರ್ಕಾರ ರಚನೆಯಾಗುವ ಆಶಾಭಾವನೆ ಹಿನ್ನೆಲೆಯಲ್ಲಿ ಕಾಂಗ್ರೆಸ್ ಜೂನ್ 1 ರಂದು ಮೈತ್ರಿಕೂಟದ ಹಿರಿಯ ನಾಯಕರ ಸಭೆ ಕರೆದಿದೆ. ಚುನಾವಣೋತ್ತರ ಕಾರ್ಯತಂತ್ರದ ಬಗ್ಗೆ ಮತ್ತು ಅಧಿಕಾರ ರಚನೆಯ ಔಪಚಾರಿಕತೆಗಳ ಬಗ್ಗೆ ಸಭೆಯಲ್ಲಿ ಚರ್ಚೆ ನಡೆಯಲಿದೆ ಎನ್ನಲಾಗಿದೆ.
"ಚುನಾವಣೋತ್ತರ ಸನ್ನಿವೇಶದ ಬಗ್ಗೆ ಚರ್ಚಿಸಲು ಜೂನ್ 1 ರಂದು ದೆಹಲಿಯಲ್ಲಿ ಹಿರಿಯ ಮೈತ್ರಿ ನಾಯಕರ ಸಭೆ ನಡೆಯಲಿದೆ. ಜೂನ್ 4ರಂದು ಫಲಿತಾಂಶ ಹೊರಬೀಳಲಿದ್ದು, ಅದಕ್ಕೂ ಮುನ್ನ ನಾವು ನಮ್ಮ ಕಾರ್ಯತಂತ್ರದೊಂದಿಗೆ ಸಿದ್ಧರಾಗಿರಬೇಕು" ಎಂದು ಎಐಸಿಸಿ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಆರು ಹಂತಗಳ ಮತದಾನದ ನಂತರ ಐಎನ್ಡಿಐಎ ಬಣವು ಅಧಿಕಾರ ಹಿಡಿಯುವ ಆರಾಮದಾಯಕ ಸ್ಥಾನದಲ್ಲಿದೆ ಮತ್ತು ಜೂನ್ 1 ರಂದು ಅಂತಿಮ ಮತ್ತು ಏಳನೇ ಹಂತದ ಮತದಾನ ಮುಗಿಯುವ ವೇಳೆಗೆ ಸರ್ಕಾರ ರಚಿಸಲು ಅಗತ್ಯವಿರುವ 272/543 ಸ್ಥಾನಗಳ ಸರಳ ಬಹುಮತವನ್ನು ಹೊಂದಿದೆ ಎಂಬ ಆಂತರಿಕ ಮೌಲ್ಯಮಾಪನದ ವರದಿಗಳ ಹಿನ್ನೆಲೆಯಲ್ಲಿ ಕಾಂಗ್ರೆಸ್ ಕಾರ್ಯತಂತ್ರದ ಸಭೆ ನಡೆಯಲಿದೆ ಎಂದು ಪಕ್ಷದ ಆಂತರಿಕ ಮೂಲಗಳು ತಿಳಿಸಿವೆ.
ಈ ಬಗ್ಗೆ ಮಾತನಾಡಿದ ಉತ್ತರ ಪ್ರದೇಶದ ಎಐಸಿಸಿ ಉಸ್ತುವಾರಿ ಅವಿನಾಶ್ ಪಾಂಡೆ, ಪ್ರಸ್ತುತ ನಡೆಯುತ್ತಿರುವ ಲೋಕಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ - ಸಮಾಜವಾದಿ ಪಕ್ಷದ ಸಮನ್ವಯವು ಅಭೂತಪೂರ್ವವಾಗಿದೆ ಮತ್ತು ಮೈತ್ರಿಯನ್ನು ಮುನ್ನಡೆಸುವಲ್ಲಿ ನಿರ್ಣಾಯಕವಾಗಿದೆ ಎಂದು ಹೇಳಿದರು.
"ನಾವು ಸ್ಪರ್ಧಿಸಿದ 17 ಮತ್ತು ಎಸ್ಪಿಯ 63 ಸ್ಥಾನಗಳು ಸೇರಿದಂತೆ ಯುಪಿಯ ಎಲ್ಲ 80 ಸ್ಥಾನಗಳ ಬಗ್ಗೆ ನಾನು ಐಎನ್ಡಿಐಎ ಬ್ಲಾಕ್ನ ಸಮನ್ವಯ ಸಭೆಗಳನ್ನು ನಡೆಸಿದ್ದೇನೆ. ಒಟ್ಟಾರೆಯಾಗಿ 40 ದಿನಗಳಲ್ಲಿ ಸುಮಾರು 7,000 ಕಿ.ಮೀ ಕ್ರಮಿಸಿದ್ದೇನೆ. ಇದು ಎರಡೂ ಪಕ್ಷಗಳ ಕಾರ್ಯಕರ್ತರ ನಡುವೆ ಅಭೂತಪೂರ್ವ ಸಹಕಾರಕ್ಕೆ ಕಾರಣವಾಯಿತು. ಪರಿಣಾಮವಾಗಿ ನಮ್ಮ ಮೈತ್ರಿಕೂಟವು ರಾಜ್ಯದಲ್ಲಿ ಅರ್ಧಕ್ಕಿಂತ ಹೆಚ್ಚು ಸ್ಥಾನಗಳನ್ನು ಗೆಲ್ಲಲಿದೆ. ಕಾಂಗ್ರೆಸ್ 10 ರಿಂದ 12 ಸ್ಥಾನಗಳನ್ನು ಪಡೆಯಲಿದೆ. ನನ್ನ ದೃಷ್ಟಿಯಲ್ಲಿ ಐಎನ್ಡಿಐಎ ಬಣವು ಸುಲಭವಾಗಿ ಸರ್ಕಾರ ರಚಿಸುತ್ತದೆ" ಎಂದು ಅವಿನಾಶ್ ಪಾಂಡೆ ಈಟಿವಿ ಭಾರತ್ ಗೆ ತಿಳಿಸಿದರು.
ಗುಜರಾತ್ ಉಸ್ತುವಾರಿ ಎಐಸಿಸಿ ಕಾರ್ಯದರ್ಶಿ ಬಿ.ಎಂ.ಸಂದೀಪ್ ಕುಮಾರ್ ಕೂಡ ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ್ದು, ದಕ್ಷಿಣ ಭಾರತದಲ್ಲಿ ಬಿಜೆಪಿ ಗಣನೀಯ ಸ್ಥಾನಗಳನ್ನು ಪಡೆಯುತ್ತಿಲ್ಲ ಎಂದು ಹೇಳಿದ್ದಾರೆ. "ಐಎನ್ಡಿಐಎ ಮೈತ್ರಿಕೂಟವು ಸರಳ ಬಹುಮತ ಪಡೆಯಲಿದೆ. ಕಳೆದ ಐದು ಹಂತಗಳಲ್ಲಿ ಪರಿಸ್ಥಿತಿ ನಾಟಕೀಯವಾಗಿ ಬದಲಾಗಿದೆ ಮತ್ತು ನಾವು ಇನ್ನೂ ಒಂದು ಹಂತ ದಾಟಬೇಕಿದೆ. ದಕ್ಷಿಣ ಭಾರತದಲ್ಲಿ ಬಿಜೆಪಿಗೆ ಒಂದು ಡಜನ್ ಗಿಂತ ಹೆಚ್ಚು ಸ್ಥಾನಗಳು ಸಿಗುವುದಿಲ್ಲ. 2019ರಲ್ಲಿ ಕರ್ನಾಟಕದಲ್ಲಿ 28ರಲ್ಲಿ 25 ಸ್ಥಾನ ಪಡೆದ ಬಿಜೆಪಿ ಈ ಬಾರಿ ಅಲ್ಲಿ 8 ಸ್ಥಾನ, ತೆಲಂಗಾಣದಲ್ಲಿ 3 ರಿಂದ 4 ಮತ್ತು ಆಂಧ್ರಪ್ರದೇಶದಲ್ಲಿ 1 ಸ್ಥಾನಗಳನ್ನು ಗೆಲ್ಲಲಿದೆ. ತಮಿಳುನಾಡು ಮತ್ತು ಕೇರಳದಲ್ಲಿ ಅವರು ಶೂನ್ಯ ಸಂಪಾದನೆ ಮಾಡಲಿದ್ದಾರೆ. ಅಯೋಧ್ಯೆ ದೇವಾಲಯದ ವಿಷಯವು ದಕ್ಷಿಣ ಭಾರತದಲ್ಲಿ ಲಾಭ ತರಲಿದೆ ಎಂದು ಅವರು ಭಾವಿಸಿದ್ದರು, ಆದರೆ ಅದು ಹಾಗಾಗಲಿಲ್ಲ. ದಕ್ಷಿಣವನ್ನು ಮುಖ್ಯವಾಗಿ ಕಳೆದುಕೊಂಡ ನಂತರ, ನಿರುದ್ಯೋಗ ಮತ್ತು ಬೆಲೆ ಏರಿಕೆಯ ಸಮಸ್ಯೆಗಳು ಸಾರ್ವಜನಿಕ ಚರ್ಚೆಯಲ್ಲಿ ಮೇಲುಗೈ ಸಾಧಿಸಿದ ಉತ್ತರ ಭಾರತದಲ್ಲಿಯೂ ಅವರಿಗೆ ಹಿನ್ನಡೆ ಆಗಿದೆ" ಎಂದು ಸಂದೀಪ್ ಕುಮಾರ್ ಈಟಿವಿ ಭಾರತ್ ಗೆ ತಿಳಿಸಿದರು.
ಪಕ್ಷದ ಆಂತರಿಕ ಮೂಲಗಳ ಪ್ರಕಾರ, ಎಎಪಿ ಸಂಸ್ಥಾಪಕ ಮತ್ತು ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರು ಜೂನ್ 2 ರಂದು ಉನ್ನತ ನ್ಯಾಯಾಲಯದಿಂದ ಜಾಮೀನು ವಿಸ್ತರಣೆ ಪಡೆಯದಿದ್ದರೆ ಅವರು ಜೈಲಿಗೆ ಮರಳಬೇಕಾಗುತ್ತದೆ. ಹೀಗಾಗಿ ಅದಕ್ಕೂ ಮುನ್ನ ಜೂನ್ 1 ರಂದು ಪ್ರತಿಪಕ್ಷಗಳ ಸಭೆ ಕರೆಯಲಾಗಿದೆ.
ಇದನ್ನೂ ಓದಿ : ತೆಲಂಗಾಣದಲ್ಲಿ ಗುಟ್ಕಾ, ಪಾನ್ ಮಸಾಲಾ ಬ್ಯಾನ್: ಸರ್ಕಾರದ ಆದೇಶ - TELANGANA BANS GUTKHA
