ಹೈದರಾಬಾದ್: ಹೈದರಾಬಾದ್ನ ಯುವಕರೊಬ್ಬರು ತಮ್ಮ ಸಹಾನುಭೂತಿ ಮತ್ತು ಧೈರ್ಯದ ಕಾರಣಕ್ಕೆ ಹೆಸರುವಾಸಿಯಾಗಿದ್ದಾರೆ. ರಘುರಾಮ್ (25 ವರ್ಷ) ಎಂಬುವವರು ಬೀದಿ ನಾಯಿಗಳ ಕಲ್ಯಾಣಕ್ಕಾಗಿ ತನ್ನನ್ನು ತಾನು ಅರ್ಪಿಸಿಕೊಳ್ಳುವ ಮೂಲಕ ಈ ಪ್ರಾಣಿಗಳ ಬಗೆಗೆ ಸಮಾಜದಲ್ಲಿದ್ದ ಭಯವನ್ನು ಹೋಗಲಾಡಿಸಿದ್ದಾರೆ. ಇವರು ಸುಮಾರು 72 ಬೀದಿ ನಾಯಿಗಳಿಗೆ ಆಶ್ರಯ ಮತ್ತು ಆರೈಕೆಯ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದಾರೆ.
ರಾಜಮಂಡ್ರಿಯಲ್ಲಿ ಹುಟ್ಟಿ ಬೆಳೆದ ರಘುರಾಮ್ ಅವರಿಗೆ ಪ್ರಾಣಿಗಳು, ವಿಶೇಷವಾಗಿ ನಾಯಿಗಳು ಮತ್ತು ಪಕ್ಷಿಗಳ ಮೇಲಿನ ಒಲವು ಚಿಕ್ಕ ವಯಸ್ಸಿನಿಂದಲೇ ಬೆಳೆದಿದೆ. ನೆಟ್‌ವರ್ಕ್ ಎಂಜಿನಿಯರಿಂಗ್‌ನಲ್ಲಿ ವೃತ್ತಿಪರ ಹಿನ್ನೆಲೆಯನ್ನು ಹೊಂದಿದ್ದರೂ ಮತ್ತು ಕಾರ್ಪೊರೇಟ್ ವಲಯದಲ್ಲಿ ಕೆಲಸ ಮಾಡುತ್ತಿದ್ದರೂ, ರಘುರಾಮ್ ಅವರು ತಮ್ಮ ಬಿಡುವಿನ ಸಮಯದಲ್ಲಿ ಪ್ರಾಣಿಗಳ ರಕ್ಷಣಾ ಕಾರ್ಯಾಚರಣೆಗಳಲ್ಲಿ ಭಾಗವಹಿಸುವ ಮೂಲಕ ನೆಮ್ಮದಿ ಕಂಡುಕೊಂಡಿದ್ದಾರೆ.
ಕೋವಿಡ್-19 ಸಾಂಕ್ರಾಮಿಕದ ಪರಿಣಾಮವು ರಘುರಾಮ್ ಅವರ ಜೀವನದಲ್ಲಿ ಗಮನಾರ್ಹ ಬದಲಾವಣೆಗೆ ಕಾರಣವಾಗಿದೆ. ಇದು ಅವರ ಕೆಲಸವನ್ನು ತೊರೆಯುವಂತೆ ಮಾಡಿತು. ಇಂತಹ ಸವಾಲುಗಳಿಗೆ ಹಿಂಜರಿಯದ ಅವರು ತನ್ನ ನಿಜವಾದ ಉತ್ಸಾಹದ ಕಡೆಗೆ ಗಮನವನ್ನು ಹರಿಸಿದ್ದಾರೆ. ಸ್ವತಂತ್ರ ಉದ್ಯೋಗಿಯಾಗಿ ರಘುರಾಮ್ ಅವರು ನೆಟ್‌ವರ್ಕ್ ಇಂಜಿನಿಯರ್ ಆಗಿ ತಮ್ಮ ಜವಾಬ್ದಾರಿಗಳನ್ನು ನಿಭಾಯಿಸುತ್ತಿದ್ದಾರೆ. ಇದರೊಂದಿಗೆ ಬೀದಿ ನಾಯಿಗಳಿಗೆ ಪ್ರೀತಿ ಮತ್ತು ಕಾಳಜಿಯನ್ನು ನೀಡುತ್ತಾ ಅವುಗಳ ಆರೈಕೆಯನ್ನು ಮಾಡುತ್ತಿದ್ದಾರೆ.
ಆಶ್ರಯ ಮತ್ತು ಆಹಾರವನ್ನು ಮೀರಿರುವ ರಘರಾಮ್ ಬದ್ಧತೆ : ಅವರು ಬೀದಿ ನಾಯಿಗಳ ಬಗ್ಗೆ ಸಮುದಾಯಕ್ಕೆ ಶಿಕ್ಷಣ ನೀಡುವಲ್ಲಿ ಸಕ್ರಿಯವಾಗಿ ಭಾಗವಹಿಸುತ್ತಾರೆ. ಅವುಗಳ ಸುತ್ತಲಿರುವ ನಕಾರಾತ್ಮಕ ಗ್ರಹಿಕೆಗಳನ್ನು ಹೋಗಲಾಡಿಸಲು ಮುಂದಾಗಿದ್ದಾರೆ. ಅವರ ಪ್ರಯತ್ನಗಳು ನಾಯಿಗಳಿಗೆ ಸರಿಯಾದ ಪೋಷಣೆ ಮತ್ತು ವೈದ್ಯಕೀಯ ಆರೈಕೆಯನ್ನು ಒದಗಿಸುವುದರ ಮೇಲೆ ಕೇಂದ್ರೀಕೃತವಾಗಿವೆ. ಇದಕ್ಕಾಗಿ ಇವರು ತಿಂಗಳಿಗೆ ಸುಮಾರು ಒಂದೂವರೆ ಲಕ್ಷ ಖರ್ಚು ಮಾಡುತ್ತಾರೆ.
ಎರಡು ವರ್ಷಗಳ ಹಿಂದೆ ರಘುರಾಮ್ ಅವರು ಸಮಾನ ಮನಸ್ಕ ಗೆಳೆಯರ ಜೊತೆಗೂಡಿ ಬಾಚುಪಲ್ಲಿಯ ಕೈಗಾರಿಕಾ ಪ್ರದೇಶದಲ್ಲಿ "ಜೀವ ವಾತ್ಸಲ್ಯ ಪಾರುಗಾಣಿಕಾ ಪುನರ್ವಸತಿ ಕೇಂದ್ರ" ಸ್ಥಾಪಿಸಲು ಜಾಗವನ್ನು ಗುತ್ತಿಗೆಗೆ ಪಡೆದರು. ಈ ಕೇಂದ್ರವು ಬೀದಿಗಳಿಂದ ರಕ್ಷಿಸಲ್ಪಟ್ಟ ನಾಯಿಗಳನ್ನು ಮಾತ್ರವಲ್ಲದೆ, ರಸ್ತೆ ಅಪಘಾತಗಳಲ್ಲಿ ಗಾಯಗೊಂಡಂತವುಗಳಿಗೂ ಚಿಕಿತ್ಸೆ ನೀಡುತ್ತಿದೆ.
ಪ್ರಾಣಿಗಳಿಗೆ ಪ್ರೀತಿ ಮತ್ತು ಕಾಳಜಿ ಮುಖ್ಯ :ಪ್ರಸ್ತುತ 80 ರಿಂದ 90 ಬೀದಿನಾಯಿಗಳಿಗೆ ಆಶ್ರಯ ನೀಡುತ್ತಿರುವ ರಘುರಾಮ್, ಈ ಪ್ರಾಣಿಗಳಿಗೆ ಪ್ರೀತಿ ಮತ್ತು ಕಾಳಜಿಯನ್ನು ತೋರಿಸುವ ಪ್ರಾಮುಖ್ಯತೆಯನ್ನು ಒತ್ತಿಹೇಳುತ್ತಾರೆ. ನಿರ್ಲಕ್ಷ್ಯ ಮತ್ತು ಸರಿಯಾದ ಆಹಾರ ನೀಡದಿರುವುದು ಮತ್ತು ನೀರಿನ ಅಭಾವದಿಂದ ನಾಯಿಗಳು ಆಕ್ರಮಣಕಾರಿ ನಡವಳಿಕೆ ಪ್ರದರ್ಶಿಸುತ್ತವೆ ಎಂದು ಅವರು ಪ್ರತಿಪಾದಿಸುತ್ತಾರೆ. ನಾಯಿಗಳನ್ನು ನಗರಕ್ಕೆ ಹಿಂತಿರುಗಿಸುವ ಮೊದಲು ಕ್ರಿಮಿನಾಶಕ ಪ್ರಕ್ರಿಯೆಗಳನ್ನು ನಡೆಸಲಾಗುತ್ತದೆ. ಇದು ಜನಸಂಖ್ಯೆಯ ನಿಯಂತ್ರಣಕ್ಕೆ ಕೊಡುಗೆ ನೀಡುತ್ತದೆ ಮತ್ತು ನಾಯಿ ಕಡಿತದ ಅಪಾಯವನ್ನು ಕಡಿಮೆ ಮಾಡುತ್ತದೆ ಎಂದಿದ್ದಾರೆ.
ಇದನ್ನೂ ಓದಿ:ಯಾರಿಗುಂಟು ಯಾರಿಗಿಲ್ಲ.. ವಿದೇಶಕ್ಕೆ ಹಾರಲು ರೆಡಿಯಾದ ವಾರಾಣಸಿ ಬೀದಿನಾಯಿ ಜಯಾ.. ಇದಕ್ಕೂ ಬಂತು ಪಾಸ್ಪೋರ್ಟ್, ವೀಸಾ!!
