ಮೋದಿ ಸರ್ಕಾರ ಬಂದ್ಮೇಲೆ ಯುವಕರು ನಿರುದ್ಯೋಗಿಗಳಾಗ್ತಿದಾರೆ: ರಾಜು ಆಲಗೂರು

ದೇಶದಲ್ಲಿ ಆರ್ಥಿಕತೆ ಸುಸ್ಥಿತಿಯಲ್ಲಿದೆ ಎಂದು ಪ್ರಧಾನಿ ಮೋದಿ ಹೇಳುತ್ತಿದ್ದಾರೆ. ಆದ್ರೆ ಕಳೆದ ಒಂದು ವರ್ಷದಿಂದ ದೇಶದ ಜಿಡಿಪಿ‌ 5ಕ್ಕೆ ಇಳಿಕೆಯಾಗಿದೆ ಎಂದು ಮೋದಿ ವಿರುದ್ಧ ವಿಜಯಪುರ ಜಿಲ್ಲಾ ಕಾಂಗ್ರೆಸ್​ ಅಧ್ಯಕ್ಷ ರಾಜು ಆಲಗೂರು ವಾಗ್ದಾಳಿ ನಡೆಸಿದರು.

ವಿಜಯಪುರ: ಅಧಿಕಾರಕ್ಕೆ ಬಂದ್ಮೇಲೆ ಯುವಕರಿಗೆ ಉದ್ಯೋಗ ಕೊಡುತ್ತೇವೆ ಎಂದು ಪ್ರಧಾನಿ ಮೋದಿ ಭರವಸೆ ನೀಡಿದ್ದರು. ಆದರೆ, ಅವರು ಯಾವುದೇ ಭರವಸೆಯನ್ನು ಈಡೇರಿಸಿಲ್ಲ ಎಂದು ಜಿಲ್ಲಾ ಕಾಂಗ್ರೆಸ್​ನ​ ಅಧ್ಯಕ್ಷ ಡಾ.ರಾಜು ಆಲಗೂರು ಕೇಂದ್ರ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದರು.

ಮಾಧ್ಯಮಗೋಷ್ಟಿ ನಡೆಸಿ ಮಾತನಾಡಿದ ಅವರು, ದೇಶದ ಕಾರ್ಖಾನೆಗಳಲ್ಲಿ ಯುವಕರು ಉದ್ಯೋಗ ಕಳೆದುಕೊಳ್ಳುತ್ತಿದ್ದಾರೆ‌. ಈಗಾಗಲೇ ಮುಂಬೈಯಲ್ಲಿ 6 ಲಕ್ಷ ‌ಜನರು ಸಣ್ಣ ಕೈಗಾರಿಕೆಗಳಲ್ಲಿ ಉದ್ಯೋಗ ಕಳೆದುಕೊಂಡಿದ್ದಾರೆ. ದೇಶದಲ್ಲಿ ಆರ್ಥಿಕತೆ ಸುಸ್ಥಿತಿಯಲ್ಲಿದೆ ಎಂದು ಮೋದಿ ಹೇಳುತ್ತಿದ್ದಾರೆ. ಆದ್ರೆ ಕಳೆದ ಒಂದು ವರ್ಷದಿಂದ ದೇಶದ ಜಿಡಿಪಿ‌ ಇಳಿಕೆಯಾಗುತ್ತಲೇ ಇದ್ದು, ಈಗ 5ಕ್ಕೆ ತಲುಪಿದೆ ಎಂದು ಹರಿಹಾಯ್ದರು.

ಆಪರೇಷನ್ ಕಮಲ ವಿಡಿಯೋ ವೈರಲ್​ ಕುರಿತು ಮಾತನಾಡಿದ ಆಲಗೂರು, ಕೇಂದ್ರ ಗೃಹಸಚಿವ ಅಮಿತ್​ ಶಾ ಅವರು 15 ಶಾಸಕರನ್ನು ನೋಡಿಕೊಳ್ಳುತ್ತಿದ್ದರು ಅನ್ನೋದು ವಿಡಿಯೋ ರೆಕಾರ್ಡ್​ನಲ್ಲಿ ಸ್ಪಷ್ಟವಾಗಿದೆ. ಜಿಜೆಪಿ ಸರ್ಕಾರ ರಚನೆಗಾಗಿ 15 ಶಾಸಕರ ರಾಜೀನಾಮೆ ಕೊಡಿಸಿದ್ದೇವೆ ಅನ್ನೋದು ಸಹ ಅದರಲ್ಲಿದೆ. ಈ ಸಂಬಂಧ ನಮ್ಮ ಪಕ್ಷದ ಮುಖಂಡರು ರಾಷ್ಟ್ರಪತಿ ಭೇಟಿಯಾಗಿದ್ದಾರೆ ಎಂದು ತಿಳಿಸಿದರು.