ರಾಮರಾಜ್ಯ ಕಾಂಗ್ರೆಸ್​​ನ ಅಜೆಂಡಾದಲ್ಲೇ ಇಲ್ಲ: ಅನಂತ್​ ಕುಮಾರ್​​ ಹೆಗಡೆ

ಪ್ರತಿನಿತ್ಯ ಗಾಂಧೀಜಿಯವರ ತತ್ವಗಳನ್ನ ಹತ್ಯೆ ಮಾಡಿದ್ದು, ಅವಹೇಳನ ಮಾಡಿದ್ದು ಕಾಂಗ್ರೆಸ್. ರಾಮರಾಜ್ಯ ಕಾಂಗ್ರೆಸ್​​ನ ಅಜೆಂಡಾದಲ್ಲೇ ಇಲ್ಲ ಎಂದು ಸಂಸದ ಅನಂತ್​ ಕುಮಾರ್​​ ಹೆಗಡೆ ಹೇಳಿದರು.

ಶಿರಸಿ: ರಾಮ ರಾಜ್ಯದ ಕಲ್ಪನೆ ಕೊಟ್ಟಿದ್ದು ಆರ್​​​ಎಸ್ಎಸ್, ಬಿಜೆಪಿ, ವಿಶ್ವ ಹಿಂದೂ ಪರಿಷತ್ ಅಲ್ಲ, ಮಹಾತ್ಮ ಗಾಂಧಿಜೀಯವರು. ರಾಮರಾಜ್ಯ ಕಾಂಗ್ರೆಸ್​​ನ ಅಜೆಂಡಾದಲ್ಲೇ ಇಲ್ಲ. ಆದರೆ ರಾಮರಾಜ್ಯದ ಕಲ್ಪನೆ ಇಟ್ಟು ಕೊಂಡಿದ್ದು ಬಿಜೆಪಿ ಎಂದು ಸಂಸದ ಅನಂತ್​ ಕುಮಾರ್​​ ಹೆಗಡೆ ಹೇಳಿದರು.

ಉತ್ತರ ಕನ್ನಡ ಜಿಲ್ಲೆಯ ದಾಂಡೇಲಿಯಲ್ಲಿ ಬಿಜೆಪಿ ವತಿಯಿಂದ ನಡೆದ ಗಾಂಧಿ ಸಂಕಲ್ಪ ಯಾತ್ರೆಯಲ್ಲಿ ಪಾಲ್ಗೊಂಡು ಮಾತನಾಡಿದ ಅವರು, ಪ್ರತಿನಿತ್ಯ ಗಾಂಧೀಜಿಯವರ ತತ್ವಗಳನ್ನ ಹತ್ಯೆ ಮಾಡಿದ್ದು, ಅವಹೇಳನ ಮಾಡಿದ್ದು ಕಾಂಗ್ರೆಸ್. ಮಹಾತ್ಮ ಗಾಂಧಿ, ಅಂಬೇಡ್ಕರ್, ಸಾವರ್ಕರ್ ಹೀಗೆ ದೇಶಕ್ಕೆ ಒಳ್ಳೆಯದನ್ನು ಮಾಡಿದವರನ್ನ ಬದಿಗಿಡುವ ಕೆಲಸ ಮಾಡಿದ್ದು ಕಾಂಗ್ರೆಸ್ ಎಂದು ವಾಗ್ದಾಳಿ ನಡೆಸಿದರು.

ಕಾಂಗ್ರೆಸ್​​ಗೆ ಬೇಕಾಗಿದ್ದು ಒರಿಜಿನಾಲಿಟಿ ಅಲ್ಲ ಡುಪ್ಲಿಕೇಟ್​​. ಗಾಂಧೀಜಿಯವರು 'ನಾನೇಕೆ ಹಿಂದೂ' ಎನ್ನುವ ಪುಸ್ತಕ ಬರೆದಿದ್ದಾರೆ. ಕಾಂಗ್ರೆಸ್​ನವರು ಅದನ್ನು ಓದಿದ್ರೆ ಎಲ್ಲರೂ ಹೋಗಿ ಕಾಳಿ ನದಿಯಲ್ಲಿ ಸ್ನಾನ ಮಾಡುತ್ತಾರೆ.

ಪುಸ್ತಕ ಓದಿದ್ರೂ ಸಿದ್ದರಾಮಯ್ಯನವರ ತಲೆ ಬದಲಾಗುತ್ತೆ ಅನ್ನುವ ವಿಶ್ವಾಸ ಖಂಡಿತ ನನಗಿಲ್ಲ. ಗಾಂಧೀಜಿ ಹೆಸರಲ್ಲಿ ಸಮಾಜದ ತುಂಬಾ ಕೆಸರನ್ನ ತುಂಬುವ ಕೆಲಸವನ್ನ ಕಾಂಗ್ರೆಸ್ ಮಾಡಿದೆ. ಈಗ ಕೆಸರು ಹಾಕಲೂ ಜಾಗ ಇಲ್ದೆ ಎಲ್ಲರೂ ತಿಹಾರ್ ಜೈಲಿಗೆ ಹೋಗುತ್ತಿದ್ದಾರೆ ಎಂದು ವ್ಯಂಗ್ಯವಾಡಿದರು.