ಆನಂದ್​ ಅಸ್ನೋಟಿಕರ್​ಗೆ ಮಾನಸಿಕ ಚಿಕಿತ್ಸೆ ಅಗತ್ಯವಿದೆ: ಶಾಸಕ ಸುನೀಲ ನಾಯ್ಕ

ಸದಾ ಗೋವಾದಲ್ಲಿ ಇರುವ ಆನಂದ್​ ಅಸ್ನೋಟಿಕರ್ ಆದಷ್ಟು ಬೇಗ ಯಾವುದಾದರೂ ಒಳ್ಳೆಯ ಮಾನಸಿಕ ಚಿಕಿತ್ಸೆ ನೀಡುವ ಆಸ್ಪತ್ರೆಗೆ ಸೇರಬೇಕು ಎಂದು ಶಾಸಕ ಸುನೀಲ ನಾಯ್ಕ ಸಲಹೆ ನೀಡಿದ್ದಾರೆ

ಭಟ್ಕಳ:ಆನಂದ್​ ಅಸ್ನೋಟಿಕರ್​ಗೆ ಸೂಕ್ತ ಮಾನಸಿಕ ಚಿಕಿತ್ಸೆ ಅಗತ್ಯವಿದೆ. ಬಾಯಿಗೆ ಬಂದಂತೆ ಮಾತನಾಡುತ್ತಿರುವುದು ಅವರ ಸಂಸ್ಕೃತಿ ಬಿಂಬಿಸುತ್ತದೆ ಎಂದು ಶಾಸಕ ಸುನೀಲ ನಾಯ್ಕ ಕಿಡಿಕಾರಿದ್ದಾರೆ.

ನಗರದಲ್ಲಿ ಮಾತನಾಡಿದ ಅವರು, ಅನಂತಕುಮಾರ್ ಹೆಗಡೆ ವಿರುದ್ಧ ಮಾತನಾಡುವ ನೈತಿಕ ಹಕ್ಕು ಆನಂದ್ ಅಸ್ನೋಟಿಕರ್​ಗಿಲ್ಲ. ಆನಂದ್ ಆಸ್ನೋಟಿಕರ್​ ಚುನಾವಣೆಯಲ್ಲಿ ಅನಂತಕುಮಾರ್ ವಿರುದ್ಧ 4 ಲಕ್ಷ ಮತಗಳ ಅಂತರದಿಂದ ಸೋತರೂ ಅನಂತಕುಮಾರ್​ ಶಕ್ತಿ ಏನೆಂಬುದು ತಿಳಿಯುವಷ್ಟು ಬುದ್ಧಿ ಶಕ್ತಿ ಅವರಿಗಿಲ್ಲ.

ಕ್ಷೇತ್ರದ ಜನತೆಗೆ ಅನಂತಕುಮಾರ್​ ಏನು ಅಂತಾ ಗೊತ್ತಿದೆ. ಇಂತಹ ಹೇಳಿಕೆ ನೀಡುವುದು ಕೊನೆಯಾಗಬೇಕು. ಹೆಗಡೆಯವರು ಕ್ಷೇತ್ರದಲ್ಲಿ ಉತ್ತಮವಾಗಿ ಕೆಲಸ ಮಾಡುತ್ತಿದ್ದಾರೆ. ಅವರ ಮೇಲೆ ಯಾವುದೇ ಕಪ್ಪು ಚುಕ್ಕೆ ಇಲ್ಲ. ಅವರ ಆರೋಗ್ಯದ ಕುರಿತು ಇಲ್ಲಸಲ್ಲದ ಮಾತನಾಡುವುದನ್ನು ನಾವು ಮತ್ತು ಭಟ್ಕಳ ಬಿಜೆಪಿ ಮಂಡಲ ಸಹಿಸುವುದಿಲ್ಲ ಎಂದರು.