ಬಳ್ಳಾರಿಯಲ್ಲಿ ಲಾಕ್​ಡೌನ್​ ಉಲ್ಲಂಘನೆ: ಜಾಗಿಂಗ್​, ವಾಕಿಂಗ್​ ಎಂದು ರಸ್ತೆಯಲ್ಲಿ ಓಡಾಟ

ಜನರಿಗೆ ಉಪಯೋಗ ಆಗಲಿ ಎಂದು ಬೆಳಗ್ಗೆ 7 ರಿಂದ 11ರ ತನಕ ಅಗತ್ಯ ವಸ್ತುಗಳ ಖರೀದಿಗೆ ಅವಕಾಶ ಮಾಡಿಕೊಡಲಾಗಿದೆ. ಇದನ್ನು ತಪ್ಪಾಗಿ ಅರ್ಥ ಮಾಡಿಕೊಂಡಿರುವ ಜನರು, ಬೆಳಗ್ಗೆ ಮನೆಯಿಂದ ಹೊರಬಂದರೆ ಕೊರೊನಾ ಬರುವುದಿಲ್ಲ ಎನ್ನುತ್ತಿದ್ದಾರೆ.

ಬಳ್ಳಾರಿ: ಲಾಕ್ ಡೌನ್ ಉಲ್ಲಂಘಿಸಿ ಗಣಿನಾಡು ಜನರು ಬೆಳ್ಳಂಬೆಳಗ್ಗೆ ಜಾಗಿಂಗ್​ ಮಾಡುವ ನೆಪದಲ್ಲಿ ಮನೆಯಿಂದ ಹೊರಬರುತ್ತಿದ್ದಾರೆ.

ಮನೆಯಿಂದ ಹೊರಬರುವ ಜನರು, ರೇಡಿಯೋ ಪಾರ್ಕ್ ರಸ್ತೆಯಲ್ಲಿ ನಾಲ್ಕು- ಐದು ಕೀಲೋ ಮೀಟರ್ ವಾಕಿಂಗ್, ಜಾಗಿಂಗ್ ಮಾಡುತ್ತಿದ್ದಾರೆ. ಈ ವೇಳೆ, ಮಾಸ್ಕ್​ಕೂಡ ಇಲ್ಲ ಹಾಗೆ ಸಾಮಾಜಿಕ ಅಂತರವೂ ಇಲ್ಲ. ಇನ್ನು ಜನರಿಗೆ ಉಪಯೋಗ ಆಗಲಿ ಎಂದು ಬೆಳಗ್ಗೆ 7 ರಿಂದ 11 ರ ತನಕ ಅಗತ್ಯ ವಸ್ತುಗಳ ಖರೀದಿಗೆ ಅವಕಾಶ ಮಾಡಿಕೊಡಲಾಗಿದೆ. ಇದನ್ನು ತಪ್ಪಾಗಿ ಅರ್ಥ ಮಾಡಿಕೊಂಡಿರುವ ಜನರು, ಬೆಳಗ್ಗೆ ಮನೆಯಿಂದ ಹೊರಬಂದರೆ ಕೊರೊನಾ ಬರುವುದಿಲ್ಲ ಎನ್ನುತ್ತಿದ್ದಾರೆ.

ಈ ವಾಕಿಂಗ್, ಜಾಗಿಂಗ್ ಮಾಡುವ ಜನರೆಲ್ಲರೂ ವಿದ್ಯಾವಂತರೇ ಎಂಬುದು ವಿಪರ್ಯಾಸ. ಇದರಲ್ಲಿ ಬ್ಯಾಂಕ್ ಉದ್ಯೋಗಿಗಳು, ಉದ್ಯಮಿಗಳು, ವಿಶ್ವವಿದ್ಯಾಲಯದಲ್ಲಿ ಕೆಲಸ ಮಾಡುವ ನೌಕರಸ್ಥರು, ವಯಸ್ಕರು, ಯುವಕರು, ಯುವತಿಯರು, ಚಿಕ್ಕ ಚಿಕ್ಕ ಮಕ್ಕಳು ಸಹ ತಮ್ಮ ಕುಟುಂಬದೊಂದಿಗೆ ಬಂದು ರಸ್ತೆಯಲ್ಲಿ ಕಾಲ ಕಳೆಯುತ್ತಿದ್ದಾರೆ.