ಬೆಂಗಳೂರು:ರಾಜ್ಯದಲ್ಲಿ ಜುಲೈ 5 ರಿಂದ ಅನ್ವಯವಾಗುವಂತೆ ಅನ್ಲಾಕ್ 3.0 ಜಾರಿಗೆ ಸಿದ್ಧತೆಗಳು ಆರಂಭಗೊಂಡಿದ್ದು, ಪ್ರಾರ್ಥನಾ ಮಂದಿರಗಳು, ಮಾರುಕಟ್ಟೆ, ಮಾಲ್, ಪಬ್, ಕ್ಲಬ್, ಬಾರ್ಗಳಿಗೆ ಅವಕಾಶ ಸಿಗಲಿದೆ. ಸ್ಮಿಮ್ಮಿಂಗ್ ಪೂಲ್, ಸಿನಿಮಾ ಮಂದಿರಕ್ಕೆ ಅವಕಾಶ ಅನುಮಾನ ಎನ್ನಲಾಗುತ್ತಿದೆ.
ರಾಜ್ಯದಲ್ಲಿ ಕೊರೊನಾ ಎರಡನೇ ಅಲೆಯ ಅಬ್ಬರಕ್ಕೆ ತತ್ತರಿಸಿ ಲಾಕ್ಡೌನ್ ಜಾರಿಗೊಳಿಸಿದ್ದ ರಾಜ್ಯ ಸರ್ಕಾರ ಕೋವಿಡ್ ಪಾಸಿಟಿವಿಟಿ ದರ ಕಡಿಮೆಯಾಗುತ್ತಿದ್ದಂತೆ ಹಂತ ಹಂತವಾಗಿ ಅನ್ಲಾಕ್ ಪ್ರಕ್ರಿಯೆ ಕೈಗೆತ್ತಿಕೊಂಡಿದೆ. ಸದ್ಯ ಜಾರಿಯಲ್ಲಿರುವ ಅನ್ಲಾಕ್ 2.0 ಜುಲೈ 5 ರ ಮುಂಜಾನೆ 6 ಗಂಟೆಗೆ ಅಂತ್ಯವಾಗಲಿದ್ದು, ಅನ್ಲಾಕ್ 3.0 ಜಾರಿಗೆ ಬರಲಿದೆ.
ಬೆಂಗಳೂರು ನಗರ ಸೇರಿದಂತೆ ರಾಜ್ಯದ ಎಲ್ಲಾ ಜಿಲ್ಲೆಗಳಿಗೂ ಅನ್ವಯವಾಗುವಂತೆ ಅನ್ಲಾಕ್ 3.0 ಮಾರ್ಗಸೂಚಿಯನ್ನು ಸಿದ್ಧಪಡಿಸಲಾಗುತ್ತಿದ್ದು, ಆಯಾ ಜಿಲ್ಲಾಧಿಕಾರಿಗಳಿಗೂ ಅನ್ಲಾಕ್ ನಿಯಮ ಸಡಿಲಿಕೆಯಲ್ಲಿ ಸ್ವಲ್ಪ ಬದಲಾವಣೆ ಮಾಡಿಕೊಂಡು ಕಠಿಣ ನಿರ್ಬಂಧ ಮುಂದುವರೆಸುವ ಅಧಿಕಾರ ನೀಡಲಾಗುತ್ತದೆ ಎಂದು ಸರ್ಕಾರದ ಮೂಲಗಳು ತಿಳಿಸಿವೆ.
ಮಾಲ್ಗಳಿಗೆ ಅವಕಾಶ :
ಎಲ್ಲಾ ಬಗೆಯ ವಾಣಿಜ್ಯ ಚಟುವಟಿಕೆ ಆರಂಭಗೊಂಡಿದ್ದರೂ ರಾಜ್ಯಾದ್ಯಂತ ಮಾಲ್ಗಳಿಗೆ ನಿರ್ಬಂಧವಿದೆ. ಅನ್ಲಾಕ್ 3.0 ವೇಳೆ ಮಾಲ್ಗಳನ್ನು ತೆರೆಯಲು ಅನುಮತಿ ನೀಡುವಂತೆ ಮಾಲ್ಗಳ ಮಾಲೀಕರ ಸಂಘದಿಂದ ಸಿಎಂ ಯಡಿಯೂರಪ್ಪಗೆ ಮನವಿ ಸಲ್ಲಿಸಿದ್ದು, ಸಕಾರಾತ್ಮಕವಾಗಿ ಸ್ಪಂದಿಸಿದ್ದಾರೆ. ಹೀಗಾಗಿ ಜುಲೈ 5 ರಿಂದ ಬೆಂಗಳೂರು ಸೇರಿ ರಾಜ್ಯಾದ್ಯಂತ ಮಲ್ಟಿಫ್ಲೆಕ್ಸ್ ಹೊರತುಪಡಿಸಿ ಮಾಲ್ಗಳನ್ನು ತೆರೆಯಲು ಅವಕಾಶ ಕಲ್ಪಿಸಲಾಗುತ್ತದೆ. ಬೆಳಗ್ಗೆ 8 ರಿಂದ ಸಂಜೆ 7 ಗಂಟೆವರೆಗೆ ಮಾಲ್ಗಳಲ್ಲಿ ವಹಿವಾಟು ನಡೆಸಲು ಅವಕಾಶ ನೀಡಲಾಗುತ್ತದೆ.
ಮಾರುಕಟ್ಟೆಗೆ ಅವಕಾಶ:
ಬೆಂಗಳೂರಿನಲ್ಲಿ ಸದ್ಯ ನಿರ್ಬಂಧ ವಿಧಿಸಿದ್ದರಿಂದ ಸ್ಥಗಿತಗೊಂಡಿರುವ ಕೆ.ಆರ್.ಮಾರುಕಟ್ಟೆ,ರಸೆಲ್ ಮಾರುಕಟ್ಟೆ,ಯಶವಂತಪುರ ಎಪಿಎಂಸಿ,ಮಾಡಿವಾಳ ಮಾರುಕಟ್ಟೆ ಸೇರಿ ದೊಡ್ಡ ದೊಡ್ಡ ಮಾರುಕಟ್ಟೆಗಳಲ್ಲಿ ವಹಿವಾಟು ಆರಂಭಕ್ಕೆ ಅವಕಾಶ ನೀಡುವ ಸಾಧ್ಯತೆ ಇದ್ದು, ಜಿಲ್ಲೆಗಳಲ್ಲಿಯೂ ಸ್ಥಗಿತವಾಗಿರುವ ಮಾರುಕಟ್ಟೆಗಳ ಆರಂಭಕ್ಕೆ ಅವಕಾಶ ನೀಡುವ ಸಾಧ್ಯತೆ ಇದೆ.
ಬಾರ್,ಕ್ಲಬ್ಗೆ ಅವಕಾಶ:
ಸದ್ಯ ಅನ್ಲಾಕ್ 2.0 ರಲ್ಲಿ ಶೇ.50 ರ ನಿಯಮದಂತೆ ಹೋಟೆಲ್ಗಳಲ್ಲಿ ಆಹಾರ ಸೇವಿಸಲು, ಟೇಬಲ್ ಸರ್ವೀಸ್ ಮಾಡಲು ಅವಕಾಶ ಕಲ್ಪಿಸಿದ್ದು, ಇದೇ ನಿಯಮವನ್ನು ಅನ್ಲಾಕ್ 3.0 ರಲ್ಲಿ ಬಾರ್,ಪಬ್, ಕ್ಲಬ್, ಕ್ಲಬ್ ಹೌಸ್ಗಳಿಗೂ ಅನ್ವಯಿಸಿ ಅವಕಾಶ ನೀಡುವ ಸಾಧ್ಯತೆ ಇದೆ. ಪಾರ್ಟಿಗಳನ್ನು ಹೊರತುಪಡಿಸಿ ಕೇವಲ ಚಟುವಟಿಕೆ ನಡೆಸಲು, ಬಾರ್ಗಳಲ್ಲಿ ಕುಳಿತು ಮದ್ಯ ಸೇವಿಸಲು,ಬಾರ್ ಅಂಡ್ ರೆಸ್ಟೊರೆಂಟ್ಗಳಲ್ಲಿ ಟೇಬಲ್ ಸರ್ವೀಸ್ಗೂ ಅವಕಾಶ ನೀಡಲಾಗುತ್ತದೆ ಎನ್ನಲಾಗಿದೆ.