ಬೆಂಗಳೂರು: ಮನೆ ಬಿಟ್ಟು ಕೊಡದಿದ್ದಕ್ಕೆ ಅತ್ತೆಯನ್ನೇ ಹೊಡೆದು ಕೊಂದ ಸೊಸೆ

ಆಸ್ತಿ ಆಸೆಗಾಗಿ ಸೊಸೆ ಅತ್ತೆಯನ್ನು ಕೊಲೆ ಮಾಡಿದ ಘಟನೆ ಬೆಂಗಳೂರಿನಲ್ಲಿ ನಡೆದಿದ್ದು, ಸೊಸೆ ಈಗ ಪೊಲೀಸರ ಅಥಿತಿಯಾಗಿದ್ದಾಳೆ.

ಬೆಂಗಳೂರು:ಆಸ್ತಿ ಅನ್ನೋದು ಸಂಬಂಧವನ್ನೇ ಹಾಳು ಮಾಡಿ ಬಿಡುತ್ತೆ. ಕೆಲವೊಮ್ಮೆ ಕೊಲೆ ಮಾಡುವ ಹಂತಕ್ಕೂ ಹೋಗಿಬಿಡುತ್ತೆ. ಇಲ್ಲಾಗಿದ್ದೂ ಕೂಡ ಅದೇ. ಆಸ್ತಿ ಬೇಕೆಂದು ಪೀಡಿಸುತ್ತಿದ್ದ ಸೊಸೆ ಕೊನೆಗೆ ಅತ್ತೆಯನ್ನ ಕೊಂದೇ ಬಿಟ್ಟಿರುವ ಆರೋಪದಡಿ ಶ್ರೀರಾಮಪುರ ಪೊಲೀಸರು ಬಂಧಿಸಿದ್ದಾರೆ. ಸುಗುಣ ಬಂಧಿತ ಆರೋಪಿತೆ. ರಾಣಿಯಮ್ಮ (76) ಕೊಲೆಯಾದ ವೃದ್ದೆ.

ರಾಣಿಯಮ್ಮ ಶ್ರೀರಾಂಪುರ 7ನೇ ಮುಖ್ಯರಸ್ತೆಯಲ್ಲಿ ವಾಸ ಮಾಡುತ್ತಿದ್ದರು. ಗಂಡ ಕೂಡ ಹಲವು ವರ್ಷಗಳ ಹಿಂದೆ ಮೃತಪಟ್ಟಿದ್ದ. ತನ್ನ ಮೂರು ಜನ ಗಂಡುಮಕ್ಕಳಿಗೆ ಸಮಾನವಾಗಿ ಒಂದೊಂದು ಮನೆ ನೀಡಿದ್ದರು. ನಂತರ ಯಾರ ಸಹವಾಸವೂ ಬೇಡ ಅಂತಾ ತಾನೇ ಒಂದು ಮನೆಯಲ್ಲಿ ವಾಸವಿದ್ದರು. ಸ್ವತಃ ಊಟ ಬಟ್ಟೆ ಎಲ್ಲವನ್ನೂ ನೋಡಿಕೊಂಡು ಯಾರ ಸಹವಾಸಕ್ಕೂ ಹೋಗದೇ ತಾನಾಯ್ತು ತನ್ನ ಕೆಲಸ ಆಯ್ತು ಅಂತಾ ಕಷ್ಟದ ಬದುಕು ಕಟ್ಟಿಕೊಂಡಿದ್ದರು.

ಆದರೆ, ಅವಳು ರಾಣಿಯಮ್ಮ ಇದ್ದ ಸಣ್ಣದೊಂದು ಕೋಣೆಯ ಮೇಲೂ ಎರಡನೇ ಸೊಸೆ ಸುಗುಣ ಕಣ್ಣುಬಿದ್ದಿತ್ತು. ಅಷ್ಟಕ್ಕೂ ಈ ಸುಗುಣ ದೂರದವಳಲ್ಲ. ಸ್ವತಃ ರಾಣಿಯಮ್ಮ ತಮ್ಮನ ಮಗಳೇ. ನಮ್ಮವಳೇ ಅಂತಾ ತನ್ನ ಎರಡನೇ ಮಗನಿಗೆ ಮದುವೆ ಮಾಡಿಸಿಕೊಂಡಿದ್ದರು. ಆದರೆ ಆಕೆಯೇ ಸದ್ಯ ಜೀವ ತೆಗೆದಿದ್ದಾಳೆ.

ಅಷ್ಟಕ್ಕೂ ಆಗಿದ್ದೇನಂದರೆ ಶ್ರೀರಾಂಪುರ 7ನೇ ಮುಖ್ಯರಸ್ತೆಯಲ್ಲಿರುವ ಇದೇ ಮನೆಯ ಕೆಳ ಮಹಡಿಯ ಚಿಕ್ಕ ಕೋಣೆಯಲ್ಲಿ ರಾಣಿಯಮ್ಮ ವಾಸವಿದ್ದಳು. ಮೊದಲ ಮಹಡಿಯಲ್ಲಿ ಎರಡನೇ ಮಗ ಹಾಗೂ ಸೊಸೆ ಸುಗುಣ ವಾಸವಿದ್ದರು. ಎರಡನೇ ಮಗನಂತೂ ಕುಡಿತದ ದಾಸನಾಗಿ ಪರಿವೇ ಇಲ್ಲದಂತೆ ತಿರುಗಾಡ್ತಿದ್ದ. ಇನ್ನೂ ಇಡೀ ಮನೆ ವೃದ್ಧೆಯ ಹೆಸರಲ್ಲೇ ಇತ್ತು. ಹೀಗಾಗಿ ಮನೆಯನ್ನ ತಮ್ಮ ಹೆಸರಿಗೆ ಮಾಡಿಕೊಡುವಂತೆ ಸುಗುಣ ಸದಾ ಪೀಡಿಸುತ್ತಿದ್ದಳು.

ಅದರಂತೆ 12ರ ರಾತ್ರಿ ಕೂಡ ಸೊಸೆ ಮನೆ ತನ್ನ ಹೆಸರಿಗೆ ಬರೆದು ಕೊಡುವಂತೆ ಕೇಳಿದ್ದಾಳೆ. ಈ ಸಮಯದಲ್ಲಿ ಮಾತಿಗೆ ಮಾತು ಬೆಳೆದಿದೆ. ಕೋಪಗೊಂಡ ಸುಗುಣ ಏನು ಮಾಡಲು ಸಾಧ್ಯವಾಗದ ವೃದ್ಧೆ ಮೇಲೆ ಪ್ರತಾಪ ತೋರಿದ್ದಾಳೆ. ಕೈಗೆ ಸಿಕ್ಕವಸ್ತುಗಳಿಂದ ಹಲ್ಲೆ ಮಾಡಿದ್ದಾಳೆ. ಗಲಾಟೆಯ ನಡುವೆ ತಳ್ಳಿದಾಗ ಕೆಳಬಿದ್ದು ಕತ್ತು ಮುರಿದು ರಾಣಿಯಮ್ಮ ಸಾವನ್ನಪ್ಪಿದ್ದಾಳೆ. ಕೊಲೆ ಪ್ರಕರಣ ದಾಖಲಿಸಿಕೊಂಡ ಶ್ರೀರಾಂಪುರ ಠಾಣೆ ಪೊಲೀಸರು ಆರೋಪಿ ಸುಗುಣ ಬಂಧಿಸಿದ್ದಾರೆ.

ಇದನ್ನೂ ಓದಿ :ತುಮಕೂರು: ಮನೆ ಛಾವಣಿ ಕುಸಿದು ವೃದ್ಧೆ ಸಾವು